Chhungkaw 25,416 ten In sak tanpuina dawng kim tawh

Sawrkar laipuiin thingtlang mite tana Insak tanpuina a duan, PMAY-G hnuaiah Mizorama Insak tanpuina dawng thei chhungkaw 29,967 zinga chhungkaw 25416-in tanpuina an dawng kim tawh a; PMAY-G 2.0 pawh kalpui thuai tum niin Insak tanpuina dawng tura thlante endik mek an ni a, tun thla ni 10 hmaa endik hna hi zawh tur niin ni 10 hnu lamah chuan sawrkar laipui atangin Insak tanpuina hi dawn theih beisei a ni.
Rural Developement Director K. Lalrohlua chuan Akashvani News Aizawl zawhna chhangin, India rampum ah thingtlang mite tan Insak tanpuina (PMAY-G) hi April ni 1, 2016 atangin kalpui mek zel a la ni a, tanpuina dawng theite chu SECC 2011 leh Awaas+2018 survey atanga thlante an ni a, Mizorama tanpuina dawng thei chhungkaw 29,967 atangin 25,416 ten Insak tanpuina an dawng kim tawh a, tanpuina la dawng kim lo chhungkaw 4,551-te pawisa dawn tur hi Central sawrkarah dil leh mek a ni, a ti. 

Sawrkar laipui chuan kum 2024-25 atanga kum 2028-29 chhung atan PMAY-G 2.0 kalpui leh turin ruahmanna a kalpui leh mek a, heng atan hian kum 2024 khan a dawng tur thlanna chu Gram Sabha kaltlangin neih a ni a, Gram Sabha-in a thlanchhuahte chu Surveyor-ten In tinah kalin Digital (AwaasApp) hmangin survey hi neih a nih thu leh Awaasplus 2024 Survey atangin chhungkua 54,461-te chu Assisted Surveyor ten Digital (AwaasApp) hmangin an survey a, chhungkua 140-te chu Self Survey hmanga mahni lo inziaklutte an ni a, an vaiin chhungkaw 54,601 survey list neih a nih thu a sawi.

Heng Survey-te hi endik nawn leh vek an nih hnuah a tam zawk chu tanpuina dawng thei huangah dah leh an ni a, hei hi khaw tina Gram Sabha-in a pawmpui leh hnuah Final list a lo chhuak dawn a ni.