National Conference for Kharif Campaign-ah tel

National Conference on Agriculture for Kharif Campaign chu Zirtawpni khan New Delhi-ah neih niin Mizoram atangin Agriculture Minister PC. Vanlalruata chu a tel a ni.

National Conference for Kharif Campaign hi India rama Agriculture kaihhnawih Conference pawimawh tak niin, Central sawrkara Agriculture Minister leh Official pawimawh tak tak bakah State hrang hrang Minister te leh Official te an tel a. He hunah hian Agriculture Minister PC. Vanlalruata chuan Mizoram ang tlangram-ah chuan a Fur a Thal-a zawh theih feh kawng (all-weather farm road) neih a pawimawh thu leh India hmarchhak-ah ruahtui a tam avangin kuthnathawktu ten an huan ram panna tur kalkawng tha an mamawh thu sawiin, kalkawng tha zawk an neih theih nan Central sawrkar thawhpuiah a sawm a. Hei bakah hian ruahtui khawlna tur tuizem lian zawk leh tha zawk te pawh Mizoram in a mamawh thu a sawi bakah Price Support Scheme hnuaia Behliang, Chhawchhi leh Nihawi te lei tan a nih tur thu sawiin, central sawrkar hotute hnenah lawmthu a sawi bawk.

Agriculture Minister chuan Mizoram-ah District thar pathum a awm tak avangin KVK thar pathum mamawh belh a nih thu pawh sawiin, KVK thar dinna tur proposal pawh thehluh a ni tawh thu leh approval a chhuah vat theihnan Central sawrkar tanpuina a ngen nghal bawk a. Mizoram chu India ram hmun dang, phai lam te ang lo takin tlangram leilung leh boruak dai nuam tak nei a nih avangin Central Scheme te pawh kan ram leilung mila tihdanglam theih nise tiin rawtna a thlen a, farmer te’n hma an lo sawn zel theihnan Central sawrkar chu theihtawp chhuaha thawhpui a inhuam thu a sawi a ni.