Union Minister hovin Mizoram-a P&E leh UD&PA Department hmalakna thlirletna neih a ni

Zirtawpni kalta khan ‘State Review Meeting of Power and Housing & Urban Affairs, Mizoram’ chu Union Minister Manohar Lal kaihhruaiin neih a ni.

MINECO Conference Hall-a ‘State Review Meeting of Power and Housing & Urban Affairs, Mizoram’ neih ah hian Ministry of Power leh Ministry of Housing and Urban Affairs changtu Union Minister Manohar Lal chuan kawphetha hman man khawn chungchanga harsatna awmte chu zirchianga, hman man kim taka khawnchhuah a nih theih nan a tul anga hma la turin Power & Electricity Department-a thawktute chu a chah a. Smart Meter vuah kawngah Sawrkar building leh sumdawnna hmun lian atanga kalpui tan a pawimawh thu leh kawphetha hman man tha taka khawn chhuah a nih theih nan Pre-paid kalpuinaah 'Security deposit' kalpui tel a pawimawh thu a sawi. Union Minister chuan kawphetha chu ram hmasawnna tura hmanraw pawimawh tak a nih angin kawphetha renchem thiam leh siam chhuahna kawngah ruahmanna tha neih a tul thu a tarlang a. Nizung hmanga kawphetha siamchhuah chu uar deuh deuh turin Power & Electricity Department-a hotute chu a chah a. Mizoram lui pathum, Tlawng, Tuivai leh Chhimtuipui-a Hydro Electric Power plant siam tura ruahmanna kalpui dan tur pawh P&E Minister F.Rodingliana nen Delhi-ah sawi zui pui a tum thu a tarlang bawk a ni.

He thutkhawm ah hian Mizoram kawlphetha dinhmun sawiho niin, Mizoram chhunga Smart Metre vuah tawh zat hi bituk zat atangin za zelah 18 zawhfel tawh a ni a. Revamped Distribution Sector Scheme (RDSS) hnuaiah State Grid tihchak hna kalpui mek a nih thu tarlan a ni bawk a. Chung hmalaknate chuan Smart Meter vuah tura bituk zat 2,92,081 zinga 52,886 smart meters vuah tawh niin, 18.01% hna thawh zawh a nih thu te, Pre-paid Meter conversion programme bul tan nan P&E Department Office atanga hmalak a nih thu te tarlan a ni a. Standard Operating Procedure (SOP) pawh tihfel tep a ni tawh thu leh hemi hnu hian prepaid hmang hmasa apiang tan 2% rebate pek tel a nih tur thu tarlan a ni.

Union Manohar Lal chuan UD&PA leh P&E Department-a thawktute a kawm zawh hian thuthar thehdarhtute a kawm a. Swacch Bharat Mission (SBM) kum 10 kalpui a nih tawh thu leh chumi chhung chuan Mizoram chuan Open Defecation Free (ODF) mai piah lamah ODF + dinhmun a luah mek thu tarlangin, bawlhhlawh sawngbawl kawnga sawt zawka hmalakna kalpui dan turte sawiho a nih thu a sawi a. Khawpui vawnfai, bawlhhlawh thliarhran leh faina leh thianghlimna kawnga hmasawnna a thlen zel theih nan Sawrkar laipui atangin puih an inhuam reng thu he hunah hian a sawi bawk.