ZPM in Rajya Sabha MP candidate an puang; Party dang Candidate tur hriat ala ni lo
Tun thla ni 18-a Mizoram Rajya Sabha MP Inthlanna neih tura an Candidate tur puanna hun hi nimin khan ZPM Party chuan Aizawl-a an party Office-ah neiin ZPM Vice President C. Lalnunnema chuan Rajya Sabha MP thlanna neih tur atan hian nizan hmasa khan Nomination Committee chu thukhawmin lungrual taka thutlukna an siam thu a sawi a. “Candidate tur mi tha tam tak kan nei a, mi tha an tam hi chuan ngaihtuah pawh a harsaa rin a nih laiin, harsatna nei lova tluang taka thutkhawm hi neih a ni,” tiin ZPM Rajya Sabha Member of Parliament Candidate atan ZPM PAC Member Secretary leh Spokesperson ni lai K. Laltluangkima chu ruat a nih thu a puang a ni.
ZPM Rajya Sabha MP Candidate atana puan K. Laltluangkima pawhin Rajya Sabha MP pakhat chauh kan State-in kan neih thu sawiin, “Kum 6 term a ni a. Hemi chhung hian kan ram tana kan tih theih chin ang zawng zawng chu tih kan tum ang,” a ti a. “Kan party hruaitute dawhtheihna leh inpekna avangin Vawiin hi kan thleng a. Hun reilo te chhungin Mizoram party lian ber kan ni theiin ka hria. A te ber atanga a lian ber thlengin kan inenkawl dan hi a tha em em a ni,” a ti a. “Ka aia tha tam tak an awm a, kan thawkho zel ang. Theihtawpin ka inzir ve zel anga hmasawn ve ka tum anga, nangmahni tanpuina leh in tân theihtawpin ka inpawtfân ang,” a ti bawk.
Mizoram Rajya Sabha MP thlanna neih tur atan hian tun thla ni 1 khan hriattirna tihchhuah ni tawhin June ni 8, 2026 thlengin Nomination paper thehluh theih a ni anga, June ni 18, 2026 zing dar 9:00 leh tlai dar 4:00 inkârah Vote thlakin hemi ni tlai dar 5:00-ah Vote tla te hi chhiar nghal an ni ang. Rajya Sabha MP thlanna ah hian MLA te chauhin Vote an thlak dawn avangin Assembly-a Member 27 nei ZPM Candidate hi tling ngei tura ngai a ni a, party dang ten Candidate an neih dawn leh neih dawn loh hi tun thlengin hriat ala ni lo thung.
ZPM in Candidate tura an puan tak K. Laltluangkima hi October 16, 1963 khan Saitual khua ah a piang a, St.Anthony's College atanga Bachelor of Commerce zo in Trinity & All Saint College, Leeds atangin Christian Communication Studies a zawh bakah Maryland, USA atangin Master of Plumbing a zo leh bawk. Kum 1997-ah tuna ZPM ni ta MNF (N) zawmin CCF kaihhruainain kum 1998-ah khan Bilkhawthlir Bial-ah MLA candidate a ni lo ni tawh a. Tunah hian ZPM Party-ah Committee sang PAC Member Secretary leh Spokesperson nihna a chelh mêk a. Aizawl Mission Veng-ah an chhungkua in an khawsa mek a ni.
Comments
Post a Comment
I ngaihdan i sawi hian mipui ngaihdan i tarlang a ni!