Lengpui Airport runway chei that hna June thla chhunga zawh beisei a ni

Lengpui Airport cheithat hna chu thawh mek a niin hnathawh tura ruahman 95% vel thawh zawh a ni tawh a, harsatna dang a awm loh chuan June thla chhung hian zawhfel hman beisei a ni.

Aviation Department-a thawktute sawi danin tun dinhmunah Lengpui Airport tlan kawng (run way) chei that hna hi 95% vel zawh a ni tawh a, ruahmanna hmasaah April thlaa zawh tum ni mahse ruahsur vangin hna a khaihlak a, tum angin hna a thawh theih loh tih an sawi a. Lengpui tumhmun tlan kawng cheithat hna hi Brahma company, Rajasthan ten an thawk mek a, Mizoram PWD ten an vilpui a. Runway siamthatna atan hian Meghalaya atangin lung chang tha bik lakluh a ni a. Airport cheithat hna hi zawh anih ve leh a that tawk leh tawk loh enfiah nghal a ni ang.

Aviation thawktute sawi danin Lengpui tum hmunah hian Indigo leh Alliance Air te an service mek a, khualzin pawh an thahnem thei hle a. Khualzin zinga a zatve deuhthaw hi Manipur lam an ni. Aizawl leh Churachandpur inkarah kar khatah vawi 2 Helicopter thlawh (service) tir thin a ni a, mipuiin an chhawr tangkaiin seat pawh a full deuh reng a. Helicopter service hi tihbelh tumin hmalak mek a ni. Lengpui Airport-ah hian khualzin lut chhuak an pung nasa hle a, nikum 2025-2026 chhunga sum a thawh chhuah hi Rs.18,00,36,304 a tling a. Airport atanga sum hmuhna hnar lian ber chu Usher Development Fee (UDF) leh Aviation Security Fee (ASF) atangin a ni a, hei bakah hian Rental Charges te, Display Hoarding leh Lengpui Airport-a Parking Fee an lakte atangin sum an hmu bawk.

Thudawn danin Lengpui Airport-a thlawhna tlan kawng (run way) hi a that tawk loh avangin Central Road Research Institute chuan siamthat nise tiin rawtna a thlen a, hemi bawhzui hian Mizoram sawrkar chuan Lengpui Airport thlawhna tlan kawng siamthatna tur a ruahman a. Lengpui thlawhna tumhmun tlan kawng hi a that zawng tehna Pavement Classification Number (PCN) ah 38 a ni mek a, hei hi PCN 55-ah tihsan tum a ni. Pavement Classification Number a that tawk loh vang hian thlawhna lian pawhin a phurh tawk aia tlem a phur thin a, Airbus ten passenger 180 an phurh theih laiin Lengpui thlawhna tum hmunah hi chuan a phurh theih zat aia tlem (10%) a phurh a ngai thin a. Passenger 180 phur thei pawh 165 chauh te an phur thin nia thudawn a ni.