Serchhip District-a Special Intensive Revision-2026 kalpui dan Bawrhsap hovin thlirho a
Serchhip Bawrhsap Pisa-a Serchhip District-a Special Intensive Revision (SIR)-2026 kalpui mek dan thlirletna hunah hian Serchhip District chu Mizoram-ah SIR-2026 Enumeration Form semchhuak zo vek (100%) hmasa ber an nih thu tarlan niin he hna hlawhtling taka kalpui a nih theih nan hian Bial hrang hrangah ngawrh taka hmalak niin Training leh Awareness campaign hrang hrangte lo neih tawh a ni bawk tih tarlan a ni a. District Election Officer Paul L. Khuma chuan he hna pawimawh tak mai tluang taka thawh a nih theih nana thawktute leh mawhphurhna changtu zawng zawngte chungah lawmthu sawiin, thahnemngai taka thawk chhunzawm zel turin a sawm bawk a ni.
He thutkhawm ah hian Serchhip Election Officer Lalchhanhimi; ERO Rebecca Laldinmawii Hrahsel; AERO Vanthangpuia leh AERO Chawngthu Lalrinhlua te telin biakhmuhtheihna kaltlangin Thenzawl SDO (C) leh ERO Lalhlimpuia leh North Vanlaiphai atangin SDO (C) leh ERO Marilyn Lalruatkimi te an tel bawk a. He hunah hian SIR-2026 chu a hlawhtling thei ang ber leh chak zawka kalpui zel a nih theih dan tur hrang hrangte sawiho niin, Voter Awareness Forum (VAF) te, Electoral Literacy Club (ELC) te hmangin hma lak zui zel tum a nih thu sawilan a ni a; Vawiin, June ni 6 hian Mobile Van hmangin Enumeration form thehluh kawnga harsatna awm theihna hmunte tlawh chhuah a ni bawk ang.
Tarlan tawh angin Special Intensive Revision of Electoral Roll 2026 neih mekah Electoral Roll chu a thar hlaka siam tur niin, khua leh tui diktak te kim taka an luhtheih nan theihtawp an chhuah mek a ni a. Enumeration Form thehlut te atang hian thla thar-ah Draft Electoral Roll chu tarchhuah a ni dawn a ni.