Special Intensive Revision of Electoral Rolls nei tanin BLO ten Enumeration Form an sem ta

Election Commission of India in ruahmanna a siam angin Mizoram-a Electoral Roll siam thar hna, Special Intensive Revision of Electoral Rolls, 2026 chu Inrinni, May 30, 2026 khan kalpui tan a ni ta a. BLO hrang hrang ten anmahni Bial-ah theuh Enumeration Form semchhuah hna an thawk tan a ni.
Electoral Roll Special Intensive Revision 2026 atan hian Inrinni atang khan District hrang hrang a Booth Level Officer (BLO) ten anmahni huamchhung theuhah House-to-House visit neiin hma an la tan a, House-to-House visit hi June 28, 2026 thlengin neih tur a ni ang. BLO ten House-to-House visit an neih chhung hian In tina tuna Electoral Roll-a hming chuang mek te chu Electoral Roll siam thar tura thun dilna, Enumeration Form chu Voter zawng zawng tan copy 2 theuh an sem anga. Copy 1 (khat) la letin copy 1 (khat) dang leh chu voter ten an kawl dawn a ni. BLO te hian a tul angin voter te Enumeration Form an dahkhah pui ang a. Enumeration Form dahkhah sa chu BLO ten an lakhawm leh dawn a ni. Hemi bakah hian Enumeration Form an lakkhawm sa a voter-te detail chu BLO app hmangin Online-ah an thun leh dawn a ni.

Serchhip District-ah pawh SIR 2026 hi kalpui tan niin Serchhip District chhunga Assembly Constituency pathum; 26-Serchhip (AC), 27-Tuikum (AC) leh 28-Hrangturzo (AC)-ah te hian Electoral Roll-a chuanglai mi 55,389 an awm mek a, Inrinni khan heng Constituency hrang hrangah te hian Electoral Roll thar atana inziah-luhna tur Enumeration Form 4,417 (7.97%) semchhuah niin 26-Serchhip (AC)-a BLO 29 te chuan Enumeration Form 1,801 an sem a. 27-Tuikum (AC)-a BLO 32 ten Enumeration Form 1,545 leh 28-Hrangturzo (AC)-a BLO 27 ten Enumeration Form 1,071 an sem a. Enumeration Form semchhuah te hi lakkhawm a nih leh hnuah July 5, 2026-ah Draft Roll tarchhuah a ni ang.

Serchhip District Election Officer (DEO) Paul L. Khuma chuan Vawiin chawhnu hian thuthar thehdarhtute kawmin SIR 2026 kalpui mek chungchang hi a sawipui ang.