Mizoram-a Gas rawn thleng a muan deuh thu sawi

Mizoram RGGLV Distributor Association President Vanlalvuta Chinzah chuan Mizoram-a eirawngbawlna Gas dinhmun chu chhe lutuk a la nih loh thu sawiin, Gas erawh a thlen muan deuh thu a sawi.
Akashvani News in a kawmnaah Mizoram RGGLV Distributor President Vanlalvuta Chinzah chuan Distributor lamin Gas an mamawh ang dawng tho mah se duh hun hunah a rawn thlen theih loh thu leh a rawn kal muan thu a sawi a. A hmaa ni hnih khat leka an order lo kal nghal thin chu ni 4/5 hnuah pawh dil ngial chauhin a rawn thlen thin thu a sawi a. Hei hi a hmunpui lama an duh anga mamawh te sawi hun huna pek tur a awm loh vang a nih thu a sawi a ni. Mizoram RGGLV Distributor President Vanlalvuta Chinzah chuan sawrkar pawhin theihtawpin hma a la tih sawiin, Mizoram chu buai chhe lutuk a la ni lo a, dawn erawh a dawng tlem hret hret nia a lan thu a sawi a. Mipuite hnen atangin pawhin Distributor te a Gas mamawh dil an tam chhoh thu sawiin, tunlaia awareness a that tawh avangin mipuite pawhin ram dinhmun hrethiamin an mamawh an phuhru thei lo a nih pawha an hriatthiam thin thu a sawi a ni.

Hetihlai hian sawrkar laipui chuan Asia khawthlang buaina avangin Oil Company te chu ni 30 tal daih eirawngbawlna Gas chhekkhawl turin a hriattir a, Petroleum and Natural Gas Ministry-a Joint Secretary Sujata Sharma chuan ramchhungah Petrol, Diesel leh LPG a la awm that thu sawiin, hlauthawng lo turin mipuite a chah a ni.