SNA SPARSH hmangtu Department ten Meeting nei

SNA SPARSH hmangtu Department Administrative Head-te pualin nimin khan SASCI & SNA SPARSH chungchang Meeting cum Workshop neih a ni a, he hun hi Chief Minister Lalduhoma chuan a telpui a ni.
Planning & Programme Implementation Conference Hall-a he hun hman ah hian Chief Minister Lalduhoma chuan Technology thar lo chhuak zelah Central Fund kan dawn dan leh a hman dan kalphung pawh a lo changkang ve zel tih sawiin, hei hi awlsamna min thlentu tur an nih thu a sawi a. SNA SPARSH pawh hi kan sum hnar lian ber kan kalpuina anih angin a hmangtu Department ten chiang taka an hriat a tul thu sawiin, “Kum liam ta aia kumin ah tha zawka kan kalpui theih nan Meeting cum Workshop pawh hi kan buatsaih a ni,” a ti a. “Nikum khan kan thawhhona a that avangin SASCI Part 9-ah Efficiency in Financial Management Incentives cheng vbc. 350 kan dawng a. Kumin ah hian SASCI Part tina reform-link Incentive awm zawng zawngte dawng thei khawpa tan lak kan duh a. Chutianga kan kal theih nan chuan Mizoram sawrkar chuan Administrative Head zawng zawngte chu Charter of Financial Advisers hnuaiah (Financial power) thuneihna pek an ni a. Hei hian Administrative Approval leh Expenditure Sanction pek chhuah kawngah awlsamna min thlen dawn a ni,” a ti bawk.

Kum hmasa lam atanga an tawnhriat pawimawh tak chu Mother sanction an hmuh tawh chuan a hun taka pawisa hman chhuah a, a hun taka SNA SPARSH Account an khar (close) theih a ngai tih a nih thu pawh Chief Minister chuan sawiin, “Administrative Head ten a hun taka Utilization Certificates kan peih ngei ngei a ngai tihna a ni a. Lo inpeih thlap zel turin kan chah che u a ni,” a ti a. SASCI Part 9 kalpui dan tharah Direct Benefit Transfer (DBT) zela Scheme tinte kan kalpui a ngai dawn tih pawh sawiin, “State Welfare Scheme pawh a huam vek a; department zawng zawngin DBT mode kan hman vek a ngai tih hria ang u. Tun SASCI kal mek (2026-27) a Part 4 leh Part 9-ah hian Mizoram tana incentive (thawh that vanga dawn belh theih) hmuh theih cheng vbc. 650 a awm a. Kan State tana thatpui dawrh theih thil a nih avangin hmu thei ngei turin kan tang tlang dawn nia,” tiin hemi atan hian Workshop chu tangkai taka hmang turin a chah bawk a ni.

SNA SPARSH hmangtu Department Administrative Head-te puala SASCI & SNA SPARSH chungchang Meeting cum Workshop hi Institute of Government Accounts & Finance leh Mizoram sawrkar Finance Department te tangkawpin an buatsaih a ni a, Finance Department-a Commissioner Vanlaldina Fanai chuan kaihruaiin a hawnna neih zawh hian mithiamten zirtirna an pe zui a ni.