NCB atanga motor dawn Central YMA kutah hlan

Sawrkar laipui Ministry of Home Affairs hnuaia Narcotics Control Bureau atanga ruihhlo donaa hman tur Motor paruk (6) chu nimin khan Excise & Narcotics Minister Lalnghinglova Hmar chuan Central YMA kutah a hlan a, tunah hian Motor dang pathum chu kawng lakah a rawn thang mek bawk a ni.
Commissionerate of Excise & Narcotics Conference Hall-a Motor inhlanna hunah hian Excise Minister Lalnghinglova Hmar chuan ruihhlo do kawnga thawhhlawk tak, Mizote tana pawl chhuanawm ni bawk YMA kutah an mamawh tak mai lirthei hlan a ni chu lawmawm a tih thu sawiin, “Vawiin hi ni chhinchhiahtlak tak a ni. Ruihhlo dona ah pawl hrang hrangin kan tih theih leh thatna zawn te, kan thil neih te a inang lo a. Kan theihna zawnah, kan hunlai theuha theihtawp kan chhuah hian kan ramin a chhawr a, Mizoram tan a hlu a ni” tiin, mahni insengsoa ruihhlo donaa hma la thin Central YMA hotute chungah lawmthu a sawi a. Sawrkar hmalakna hrang hrangah mipuiin neitu rilru an put loh chuan hlawhtlin a har tih sawiin, “Tourism leh Sports ah pawh kan infrastructure thahnem tak chu Public-Private-Partnership (PPP) kaltlangin mimal leh pawl in an enkawl mek a, PPP hi uar chhoh zel kan tum. Ruihhlo dona kawngah pawh tun aia hmasawn tur chuan Department, YMA leh mipui kan tanrual zel a ngai a ni.” a ti a. NCB Director General Anurag Garg nen ruihhlo do kawnga Mizoram mamawh hrang hrang sawiin July 1, 2025-ah New Delhi-a inkawmna hun tha tak an neih thu a sawi bawk.

Nimin-a Motor inhlanna hun hi Excise & Narcotics Department-a Secretary C. Lalruaia chuan kaihruaiin Central YMA President R. Lalngheta pawhin Excise & Narcotics Department leh Central YMA inkara thawhhona tha tak awm chu lawmawm a tih thu a sawi a. “Thawhhona tha zawk kan neih zel ka beisei a. Dan hriatna chungchang leh thildang ah pawh Department in min finchhuah zel ula, a tul chuan zilhhauna pawh dawng turin kan inhawng a ni,” a ti bawk.

Tun tumah hian Bolero Camper leh Eeco Van pathum ve ve inhlan niin Bolero Camper pathum dang chu kawngah a thang mek bawk a, Excise & Narcotics Department-a Deputy Commissioner T. Lalramzauva chuan report pein March 15, 2025-a Union Home Minister Amit Shah-a’n Mizoram a rawn tlawh tuma Central YMA in dilna an thehluh kal zel atanga motor te chu lei a nih thu a sawi a. Ministry of Home Affairs thurawn angin dilna chu Excise & Narcotics Department kaltlanga thehluh niin January 21, 2026 khan Bolero Camper paruk leh Maruti Eeco Van pathum lei nan cheng nuai 88.95 phalna hmuh a nih thu a tarlang bawk. He hunah hian Excise Commissioner Z. Lalhmangaiha, Officer leh Staff te bakah Central YMA hruaitu engemawzat an tel a ni.