Serchhip District-a zirna In 142-ah PM POSHAN kalpui
Ministry of Education hnuaia Pradhan Mantri Poshan Shakti Nirman (PM POSHAN) Scheme kaltlangin Mizo-ram-ah kum 2025-26 chhung khan School 2,505-a zirlai 120,000 chuangin chawchhun leh chaw tha hrang hrang an dawng a. School Education Department hnuaia PM POSHAN hotute chuan tunhmaa Mid-Day Meal Scheme tia hriat thin hi kum 2021 khan sawrkar laipui chuan PM POSHAN Scheme tiin a thlak thu sawiin, PM POSHAN kaltlang hian sawrkar kum liamta 2025-26 chhung khan Mizoram chhunga District 11-a zirna In 2505-a zirlai 1,26,715-te hnenah chawchhun leh chaw tha dang chi hrang hrang pek a nih thu an sawi a, heng zirlai naupangte hi Pre-Primary School atanga pawl 8 zirlaite an ni a, PM POSHAN hnuaiah hian eirawngbawltu 4843 awmin, nikum khan zirlaite hnenah hian chaw Metric Ton 2928.22 pek a nih thu an sawi bawk.
PM POSHAN kalpuina zirna In hi District hrang hrang zingah Lunglei District-ah tam berin, School 441-ah kalpui a ni a, hetihrual hian zirlai naupang tam berna chu Lawngtlai District niin zirlai 22,287-in hamthatna an dawng a. Zirna In leh zirlai naupang tlem berna chu Khawzawl District niin School 77-a zirlai 3,222-in chaw-chhun an dawng a. Serchhip District-ah chuan zirna In 142-ah PM POSHAN hi kalpui niin zirlai 7088 ten chawchhun an dawng thin a, hemi buaipui tur hian Cook-cum-Helper turin mi 264 lak an ni bawk.
Kum 2025-26 chhung khan PM POSHAN kaltlang hian Mizoram-a zirna In hrang hrangah nu leh pa leh khawtlang mipui thawhlawm atangin thei ei ni (fruit day)-te, thlai leh sa thawhkhawm ni (tithi bhojan)-te, thlai huan (kitchen gardens) siam te, zirlai naupangte hriselna endikna te neih niin, Social Audit leh thawktute puala training-te buatsaih a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!