Raltlan te buhfai sem dawn
Home Department hotute sawu danin tunhnai khan raltlante hnenah buhfai sem tur hi chinfel a ni a, Buhfai hi Ministry of Consumer Affairs, Food and Public Distribution (MCAF&PD) in Food Corporation of India (FCI) kaltlangin Mizoram Food, Civil Supplies & Consumer Affairs (FCS&CA) Department hnenah a rawn thlen tawh a. Buhfai leina senso cheng vbc. 5 hi Ministry of Home Affairs (MHA)-in a tum thung dawn a ni. Buhfai hi a lo thleng tawhin District zawng zawng a thuneitu ten an semchhuah turin District tin Kudam-ah dah tura ruahman a ni a. Tun thla ni 30 aia tlai lova semchhuah vek tura ruahmanna siam a ni. Buhfai hi a vai chuan metric tonne 1,291 chuang zet a ni a. District tin a raltlan awm zat a zirin sem a ni dawn a. Central sawrkar hian kum 2024 khan Mizo-ram-a awm raltlante hi cheng vbc. 5 hu buhfai a thlawnin a lo sem tawh bawk a ni.
Home Department chhinchhiah danin Mizoram-ah hian Myanmar atanga raltlan rawn lut mi 29,702 an awm mek a, Bangladesh atanga raltlan pawh mi 1,671 awmin Manipur atanga raltlan mi 7,344 an awm mek bawk nia chhinchhiah a ni a. Myanmar raltlan awm tamna ber chu Champhai District niin mi 12,083 awm anga chhinchhiah a ni a, buhfai hi quintal 4,460 ruahman niin raltlan awm tamna ber dawttu Lawngtlai District tan quintal 2,850 sem tura ruahman a ni a. Lawngtlai District-ah hian Myanmar raltlan mi 6,328 leh Bangladesh raltlan mi 1,353 an awm mek a ni.
Home department Addl. Secretary, State Level Task Group on Displaced Persons a Chairman ni bawk Andrew H. Vanlaldika chuan raltlante a thlawna buhfai sem tur hi MHA lam chuan nikum April thla khan hriattirna an siam tawh a, MCAF&PD lam nena indawrna-in hun a duh tak deuh avangin kumin ah sem theih tura ruahmanna siamfel a ni ta chauh tih a sawi a ni.