Tourism Minister in ‘Taxi Pu Titi’ lehkhabu tlangzarhin Taxi Driver te pawimawh zia a sawi
Kum 2025-a Tourism Department in 'Best Taxi Driver' chawimawina an hlan Laldanmawia lehkhabu ziak ‘Taxi Pu Titi’ tih tlangzarhna hun nimin-a a Pisa-a neih ah Tourism Minister chuan “Taxi Driver-te hi Tourism Department thlirnaah chuan kan Tour Guide te an ni a, kan Information Centre hmasa ber an ni bawk,” tiin “Taxi Driver kan neih that chuan Tourism-ah kan thang dawn a, kan neih that loh chuan Rel-a lo lutte hi an lo kal nawn tawh lo mai thei,” a ti a. Heng mite hi an lo kal nawn fo erawh chuan Tourist hmun tha tak kan ni mai dawn tih pawh sawiin, “Chuvang chuan kan inkungkaihna hi a hnai em em a ni. Khualzin lo kal zawng zawng deuhthaw ten kan rama an rawn hman hmasak ber an nih avangin keini tan chuan an pawimawh hle a ni,” a ti bawk.
Tourism Minister chuan Taxi Driver te chu Mizoram phurtute an nih thu pawh sawiin, “Mi chi hrang hrang an phur a, mikhualten a Mizoram chanchin chiang zawka an rawn hmelhriatna hmasa ber chu anni hi an ni a, chuvang chuan Mizoram hi an phur a, an pawimawh takzet a ni,” a ti a. “Taxi Driver tam tak hi chu Mizoram tana pawimawh leh hnam tana mi hlu an ni. Chutiang chiah chuan thenkhatte chu an tangkai tluk zetin hnam tana pawi khawih thei an ni bawk,” tiin Taxi Driver te pawimawh zia a sawi bawk.
He lehkhabu ziaktu H. Laldanmawia hi kum 2025 khan World Tourism Day-ah Taxi Driver tha lawmman dawng tura thlan niin Veng chhung Chanchinbu leh hmun hrang hrangah thu lo ziak tawh thin a. Lehkhabu thlirlawktu Dr. H. Laldinmawia chuan, he lehkhabu-ah hian thuziak 64 a awm thu sawiin, 'Taxi Pu Titi' tia a bu hmingah phuah a nih avang hian nuihzatthlak zawng te, a ngaihnawm lai deuhte awm tura ngaih a awl viau laiin, mihring nun infuih tharna lam lehkhabu 'Motivational literature' lehkhabu tha tak a nih thu a sawi a. Rs. 250/- man ni tura ruahman a ni.