NEC Plenary vawi 73-na ah Chief Minister Lalduhoma’n a ngaih pawimawh te a tarlang

Chief Minister Lalduhoma chuan nimin-a NEC Plenary vawi 73-na neih ah Mizoram leh India hmarchhak hmasawnna atana a ngaih pawimawh hrang hrang a tarlangin.

NEC Plenary vawi 73-na hi nimin khan Shillong-a Meghalaya State Convention Centre-ah neih niin Chief Minister Lalduhoma hian Ministry of DoNER hnuaia Convener a nihna High Level Task Force on Northeast Economic Corridor (NEEC) Final Report bu chu Union Home Minister leh NEC Chairman Amit Shah-a hnenah thehlutin thu a sawi a. Chief Minister chuan Prime Minister-in India hmarchhak Bial te tana a hmathlir, Act East chu a tha hle tih sawiin, “Nakin lawka India ram hmasawnna thlentu bulpui ni thei khawpin hmarchhak Bial hi a awmna a remchang a, Natural resource-ah te, mipuiah te, culture lamte thlengin theihna a nei a ni,” a ti a. Connectivity chu kan zaa mamawh thlir a ‘One-Grid Approach’ hmanga kalpui a that thu leh Kawngpui, Railway, Air link, Waterway, Power, Telecom leh logistics te hi inkungkaih takin hmasawntir theih a that thu a sawi a. “Kaladan Multi-Modal Transit Transport Project hi a puitling hnai a, kawng hrang hranga kan inbuatsaih a ngai a. DoNER Ministry hian Investment-Readiness, Trade-readiness, Skill development, Entrepreneurship promotion, Border infrastructure leh Logistics hub, Community confidence-building programme-ah te hma min lakpui (support) se a tha hle,” a ti.

Investment chu project hrang hrang kalpui thluah lovin, kan zaa mamawh thlirin a hlawm emaw, a inzawm (cluster)-a kalpui thaa a hriat thu pawh Chief Minister chuan sawiin, “Investment kalpui nana tha Mau, Agri-Horti Value Chain, Food Processing, Textile, Eco-tourism, Green energy leh digital service-ah chutiang chuan kal ila kan zain kan chhawr tlang hle ang,” a ti a. Tourism chu North East pumpui Circuit pakhat anga Bommon Branding leh Facilitation neia hmasawntir a that a rinawm thu te; Act East Policy leh India-Myanmar-Thailand Trilateral Highway hmangin North East chu logistics leh trade gateway atan siam theih a nih thu te; North East tana ruahman 10% Gross Budgetary Support (GBS) chu a hming maia kalpui lovin, tha takin kalpui thei ila. DoNER emaw NEC hnuaiah emaw Coordination Mechanism siam ni se tih te; Kan thalaite hi kan resource pawimawh ber a nih avangin Skill Development, Incubation, Tourism & Hospitality, Logistics, Agri-business, Green Technology leh Start-up Ecosystem lamah nasa zawka chher an ngaih thu leh DoNER hnuaia Project Approval a lo chak zawk nan State tinah Project Implementation Unit din ni thei se tih te pawh a sawi a ni.

NEC Plenary vawi 73-na hi Union Home Minister Amit Shah chuan kaihruaiin DoNER Minister Jyotiraditya Scindia, Minister of State for DoNER Dr. Sukanta Majumdar leh hmarchhak State Chief Minister te leh Official pawimawh tak takte an tel a ni.