Mipui ten Special Intensive Revision (SIR) 2026 neih mek ngai pawimawh se an duh thu sawi
SIR 2026 kalpui mek chungchang ah hian nimin chawhnu khan District Election Officer, Paul L. Khuma chuan DC Meeting Hall-ah thuthar thehdarhtute kawmin India khua leh tui Vote nei thei zawng zawngte Eelctoral Roll-a ziahluh leh khua leh tui ni lo zinga Electoral Roll-a lo inthun palh an awm chuan paih leh tura hmalak chu Special Intensive Revision (SIR) 2026 in a tum ber a nih thu a sawi a. He hmalakna hi Election Commission of India in ruahmanna a siam angin Mizoram-ah kalpui a nih thu leh kum 2005 Electoral Roll leh tuna Electoral Roll hman mek chu enkawpin Mapping of Electors chu kalpui a nih tawh thu a sawi a. Serchhip District chu a titha ber niin za zela 91.24 te chu mapped a nih thu a sawi.
Mapping of Electors tih zawh a nih hnu May 30, 2026 atang khan Booth Level Officer (BLO) te chuan anmahni huamchhung theuha In tin tlawhchhuakin 'Enumeration Form' sem hna thawh tan leh a nih thu DEO chuan sawiin, Enumeration Form hi semchhuah a nih hnuah dahkhah ngai te dahkhatin lakkhawm leh vek tur a nih thu a sawi a. Tuna Electoral Roll-a hming awm sa te zawng zawng pawhin he Form hi an dahkhah-a an thehluh leh vek a ngaih thu sawiin, hemi thehlut lo te chu Draft Roll-ah an hming a chuang zui dawn lo tih a sawi a. BLO tin te hmalak chin pawh uluk taka an vil thu sawiin, a thawk tha te hnenah pawh lawmman siam tum a nih thu leh thawk tha duh lo te an lo awm a nih pawhin hmalak zui tur a nih thu a sawi bawk.
District Election Officer chuan BLO te hi June 28, 2026-ah chuan an Bial-a In tin lutin 'Enumeration Form' semchhuah leh lakkhawm hna hi zo hman tura ruahman a nih thu sawiin, hemi hnu July 5, 2026-ah Draft Electoral Roll tarchhuah a nih awn thu a sawi a. Hemi hnu hian siamthat ngai te tan dilna hun hawn leh a nih dawn thu sawiin, heng te hi chinfel a nih hnuah Final Electoral Roll chu kumin September 6-ah tarchhuah a nih dawn thu a sawi bawk a. SIR 2026 atan hian mawhphurhna hrang hrang insiamfel a nih tawh thu leh heng te hi chak taka bawhzui chhoh mek a nih thu te a sawi bawk a ni.
He hunah hian Addl. DC Dorothy Muansangi pawhin Serchhip District chu ramdang nena ramri nei a nih avangin dan lova rawn lut nia kan hriat zingah Vote lo nei pawh an awm theih thu sawiin, kum 2005 Electoral Roll nena enmil tur a nih avangin SIR neih mek a pawimawh thu a sawi a. Serchhip-a Election Officer Lalchhanhimi pawhin an hmalakna hrang hrang leh Political Party atangin Booth Level Agent (BLA) te pawimawhna te a sawi a. He hunah hian Serchhip District-a ERO leh AERO te pawh telin he hmalakna hrang hrangte an sawiho nghal bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!