Lenkawl

Serchhip District Bawrhsap, Paul L. Khuma chuan thuchhuah siamin tun dinhmunah Serchhip District chhungah Gas leh tuialhtheiah harsatna kan la tawk lo tih tarlangin, “Kan neih te hian mipui mamawh min la phuhru zo a, mipuite tan hlauhthawn tur a awm lova, kan dinhmunte uluk taka vil reng a ni a, mipuite chi ai lo turin kan in ngen e,” a ti a. Petrol/Diesel leh Gas black-a hralh hmu leh hria an awm a nih chuan Helpline No. 03838 222432-ah emaw, Mobile No. 9612959363-ah emaw hriattir vat turin a ngen bawk a ni.

Serchhip-a Asst. District Horticulture Officer (ADHO) hna chelh mektu Hannah Lalrohlui Betlu chu Junior Grade of Mizoram Horticulture Service atangin Senior Grade of Mizoram Horticulture Service-ah kaisangin March 30, 2026 khan District Horticulture Officer (DHO) Serchhip hna chelh tura dah niin Serchhip-a DHO nilai R. Lalrintluanga chu Aizawl-a Deputy Director hna chelh tura sawn a ni a. Amaherawh chu April 1, 2026 khan thuchhuah dang siam leh niin R. Lalrintluanga hi Serchhip-ah DHO hna chelh tura tih leh niin Hannah Lalrohlui Betlu hi Directorate of Horticulture-ah Deputy Director hna chelh tura sawn leh a ni ta zawk a ni.

Mizoram Electricity Regulatory Commssion (MZERC) chuan April 1, 2026 atanga hman tan turin êng chhit/hman man a bithliah fel a. Mizoram sawrkarin power-a sum indaih lohna chengg vbc. 151.51 a tumsak theih dawn avangin kum thara êng chhit man chawhrual chu Unit khatah Rs. 7.65 a ni dawn.

Kristian te ni pawimawh, Lal Isua Krista thihna hneha a thawhlehna ni, Easter Sunday chu Mizoram chhunga Kohhran hrang hrang ten nimin khan urhsun takin an hmang.

Lunglei bul Rotlang West leh Hauruang Local Council huamchhungah Maheswary Mining Pvt. Ltd te chuan Lungalhthei a awm leh awm loh zawn hna an thawh chu zo tawhin, Kolkata-ah enfiah tura thawn mek a ni a. Geology & Mining Department-a Mining Engineer, Lalnunsiama Fanai chuan hmun 12-ah lei hi verh a ni tih sawiin, heng zinga hmun 3-ah hian lungalhthei hnuhma hmuh a ni a, nikum November khan Kolkata-a an hmunpuiah thawn tawhin result nghah mek a ni tih a sawi a. Lungalhthei ai mahin leilunga thil pawimawh, vang si tam lutuk lo chu an beisei zawk thu a sawi. Lunglei-a Geology & Mining Department kum 2025-26 chhung khan Mizoram Sawrkar-ah chhiah cheng nuai 10 vel an chhunglut a ni.

Health Minister Lalrinpuii chuan Mizoram Synod-in an Kohhran mi harsa te’n MUHCS an zawm theihna tura hma a la chu lawmawm a tih thu a sawi.

Mizoram State Agriculture, Horticulture and Marketing Cooperative Federation (MAHFED) Ltd. chuan a man pangngai aia to zawka leitha hralhtu nia sawi, M/s Zekyl Enterprises chu insawifiah turin a hriattir.

MNF Thalai President Robert Romawia Royte MLA chuan kum liam ta 2025-26 chhunga SASCI sum kir leh ‘lapse’ cheng nuai sing thum chuangah Chief Minister, Finance Minister ni bawk chuan mawh la ngam se a duh thu a sawi.

ZPM Thalai Hqrs. President Jeje Lalpekhlua MLA chuan MNF kaihhruai AMC sawrkar in Mizoram leh Aizawl mipuite hnam angin a ti mual-pho tih a sawi.

Inrinni kalta, April 4, 2026 kha Mizoram-a ‘Harhna Thlen Ni’ niin Mizoram-a Presbyterian Kohhran chuan he ni pual hian hun an hmang a ni. Mizoram-a Harhna thlen hmasak ber hun hi Synod chuan uluk taka a zirchian hnuah April 4, 1906 chu Zorama Harhna lo thlen hmasak ni atan kum 1982-a Synod Inkhawmpui chuan a pawm a, kum 1984 atangin kum tin April 4 hi ‘Harhna Thlen Ni’ tiin Kohhran ni pawimawha chhiar a ni ta a. Kum 2006 khan Harhna thlen kum 100-na pawh Kohhran hoten ropui takin kan lo lawm tawh bawk a ni. Kumin hian ‘Harhna dik chang turin sual sim a ngai’ tih chu thupui-ah hman niin Kohhran hrang hrangte chuan zan lama Inkhawm ah he ni thupui hmang hian thuchah an ngaithla a ni.

Mizoram-a a hmasa ber ni turin Lunglei Ramthar Local Council House-ah Community Livelihood Center hawn a ni a, Ramthar Local Council Chairman F. Lalzawmliana chuan Veng mipui te pawhin tangkai taka an chhawr ngei a beisei thu leh an hlut thiam a pawimawh bakah a hman dan leh enkawl danah pawh uluk taka enkawl chu Veng mipui mawhphurhna a nih thu a sawi bawk. Community Livelihood Center-ah hian Chawhmeh leh thlai dahthatna (Cold Room), Buh herna, Vaimim Herna bakah Thlai repna khawl (Solar Dryer) te dah niin, heng khawl dahte hi vengchhung khawtlang mipui a duh apiangte tan a thlawna hman theih a ni ang.

Inrinni kalta, April ni 4 khan Central YMA chuan an thudawn bawhzuiin Khamrang-ah Zopuii Gas Agency-a dah tur eirawngbawlna Gas tihchingpen lai an man a, helai hmunah hian Truck khalhtu te leh Khamrang mi pahnih inthurualte chuan Gas hi bur 6 siam lo tumin a ruak bur pakhat thun khah nan a tak awm bur 15 vel an tichingpen thin niin an sawi a, hemi te hian Bur 2 an lo thun khat hman a ni. A tichingpentute hi zilhhauh an nih hnuah tih tawh loh an intiam a, Gas tihchingpen nana an hman bur 6 leh a hmanrua man sak an ni.

Tun thla April ni 21-a Aizawl Municipal Corporation (AMC) Bial/Ward 19 inthlan vote thlak lo awm tura Election Model Code of Conduct (EMCC) bawhchhia a puhna tam tham tak a lut tawh a. Hriat theih chinah Principal Chief Conservator of Forests (PCCF) pisa-in March ni 21-a LDC (provisional employee) atana mi 15 lakna tur advertisement an lo chhuah chu State Election Commission chuan a ngai thutak hle a. EMCC bawhchhiatna a nih thu PCCF leh Advertisement lo tihchhuahsaktu Director, Information & Public Relations chu insawifiah tura tih an ni a. State Election Commission hmaah inlanin, an thil tih cancel tira ngaihdam an ni.

Serchhip District paltlangtu National Highway-02 in Serchhip khawpui chhung a helna kawng siamthat hna thawh mek chu Ningani khan MJA Serchhip District Member te chuan a hmunah tlawhin an enfiah.

Serchhip Bialtu MLA leh Chief Minister Lalduhoma hmalakna in Serchhip khawchhunga zirna In hrang hrang 12 te hnenah White Board (Non-Magnetic 2 in 1 Whiteboard and Chalkboard) sem leh a ni a, heng te hi Bialtu MLA aiawhin Serchhip ZPM Block Thalai hruaitute chuan Ningani khan an School-ah kal chilhin an hlan a ni. Tun tuma dawngtute hi Brilliant Higher Secondary School, New Serchhip; Govt. Serchhip High School, P&E Veng; Govt. JM High School, Serchhip Vengchung; New Serchhip Secondary School, Khawtetlang; Marian High School, P&E Veng; Presbyterian English School, Serchhip; Goodwill English Academy; Govt.Model Primary School, Serchhip Veng-chung; Govt. Chanmari Primary School; Govt. Agri Primary School; All Saints School, New Serchhip leh Chawngbuangi Memorial School, Dinthar Veng te an ni.

Pradhan Mantri Surya Ghar Muft Bijli Yojana (PM-SGMBY) hnuaia Serchhip District-a Model Solar Village atana thlan Buangpui khuaa hmalak dan tur chu Ningani khan District Bawrhsap hovin a Pisa-ah sawiho a ni.

Kristian te ni pawimawh ‘Good Friday’ chu nimin khan khawvel hmundang te rualin Serchhip a Kohhran hrang hrangte pawhin urhsun takin an hmang.

Mizoram Universal Healthcare Scheme (MUHCS 2.0) chu hman tan a ni leh a, MUHCS hnuaiah hian online leh Offline kaltlangin chhungkaw 12,121 an inziaklut tawh a. AB PM-JAY chhungkua tan chuan Golden Card hmangin MUHCS hnuaiah hian enkawlna a dawn theih zel dawn a ni.

Tun dinhmunah Mizoram-ah Vawk pul hri, African Swine Fever (ASF) a len hriat a ni rih lo a, khawi lai hmunah erawh vanduai thilthu a thihpui an awm thung.

Nimin zing khan Sairang atanga Aizawl pan Truck pakhat chu Vaivakawn Veng huamchhung ah chesualin a kang zui a, mihring thi an awm lo. Thudawn danin Truck chetsualna hmun hi Aizawl atanga Sairang panna Vaivakawn Veng huamchhung a ni a, Truck hi Kolasib atanga Aizawl lam pan niin, kawngsira lirthei chesual tur venna, thir phun su chhia in kawngthlang-ah ft. 200 vel ah a lum a; helai hmun hnaia awm te’n an hmuh danin Truck hian Tuailhthei barrel hrang hrang ah a phur a, a Tuialhthei phurh te hi a kang zui ta a ni. Kangmei a chhuah nasat avang hian Fire & Emergency Service te ko-in an thelh a, Truck khalhtu, Lalremruata, Kolasib New Diakkawn a cheng chu motor hian vawrh chhuakin kawngpui ah a vak chhuak a, hliam a neih avangin damdawi In ah enkawl zui a ni.

Lunglei Police te chuan an thudawn bawhzuiin nizan hmasa zanlai khan Lunglei Zotlang-a Jedaz Petrol Pump atanga Dan lova tuialhtheih hralh lai an man a, he thil-a inhnamhnawi nia hriat te chu thubuai siam sak nghal an ni.

Rural Development Department Minister leh Tawi Bialtu MLA, Prof. Lalnilawma chuan Ningani khan a Bial chhung Maite khuaa Community Nursery siam chu a hmunah a tlawh.

Lai Autonomous District Council (LADC) Budget Session chu Ningani khan zawhfel a ni ta a, kum 2026-2027 LADC sum hman tura ruahman cheng nuai 28,028.63 chu lungrual taka Passed a ni.

Sports & Youth Services Department changtu Minister Lalnghinglova Hmar chuan ‘Khelo India Tribal Games 2026’ neih zawh taka a Mizoram tana Weightlifting a Medal la mi pariat (8) te chu Ningani khan a Pisa-ah a lawmpui.

Mizoram Chief Secretary Khilli Ram Meena chuan Ningani khan Kolasib District-a 4 Lane kawng laih mek leh tun dinhmuna kawngpui hman lai mek NH306&06 te chu a hmunah kal chilhin, kawng siamtu NHIDCL leh Contractor te chu a chak thei ang bera an hna la peihfel loh te thawk turin a hriattir.

Mizo Zirlai Pawl (MZP) chuan April 10, 2026 khian Federal Council Sitting an nei dawn a, he hunah hian Mizoram zirna atana thil pawimawh hrang hrang ngaihtuah an tum.

Mizo Students’ Union (MSU) General Hqrs. chuan Mizoram Public Service Commission (MPSC)-in April 1, 2026-a Assistant Professors hnalak result a tihchhuah ah Mizo vek an tling thei chu lawmawm an tih thu sawiin, tling thar zawng zawngte pawh zirlaite leh ram leh hnam hmangaihna rilru nen a hnathawk turin duhsakna an hlan bawk.

Mizo Writers Association (MWA) chuan kum 2025 chhunga Mizo tawnga lehkhabu lehlin tha ber atan H. Ngurthansanga lehlin ‘Second Chance: Israel Narvaez’ tih Darla Milne ziah an thlang a. He lehkhabu hi Mau Mau Gang hotupa Israel Narvaez chanchin a ni a, a nuna Isua a tawn theih nana hun vawi hnih a neih dan tarlan a nih bâkah, Kristiante tana ngaihdamna, piantharna leh rinna thiltihtheihna sawi fiahna lehkhabu tha tak a ni.

Aizawl Municipal Corporation (AMC) General Election, 2026 atana BJP Mizoram Manifesto chu Ningani khan BJP Mizoram President Dr. K. Beichhua chuan a Pisa-ah a tlangzarh a, AMC General Election atan BJP Mizoram chuan Manifesto tha tak leh Aizawl khawpui hmel danglam dawrh theihna tur an nei chu lawmawm a tih thu sawiin, “Manifesto hi keini BJP chuan kan siam satliah ngai lova, kan tih theih tur ngei kan siam thin a ni,” a ti bawk.

Nikum (2025) September atanga kumin (2026) February thla chhunga Khawzawl District a ruihhlo man chi hrang hrangte chu Ningani khan Khawzawl District Drug Disposal Committee te bultumin KVK, Khawzawl-ah tihchhiat a ni a, Bawrhsap K. Vanlathiana chuan a telpui a ni. Tun tuma Drugs halral hi Rs. 119,915,000/- man Methamphetamine kg 20.743 te, Rs. 11,419,000/- man Heroin (No 4) gram 582 leh Rs. 9340/- man Ganja kg. 1.868 te a ni a. Heng ruihhlo kaihhnawih ah hian Khawzawl Police Station-ah thubuai 9 ziahluh niin mi 17 man an ni a. Heng ruihhlo halral hi avaiin Rs. 131,343,340/- hu nia chhut a ni.

Mizoram Rajya Sabha MP K. Vanlalvena chuan Bangladesh nena insumdawn tawnna tura kum sawm kalta a inremna siam tawh tun thlenga hmalakna awm mumal lo leh Kawrpui Lei dawh thuai a tul thu Ningani khan Parliament-ah a sawi a. Rajya Sabha MP chuan Union Home Ministry bul tumin  Khawthlang Tuipui chungah cheng vbc. 54 senna tur Lei (bridge) dawh tan a ni ta chu lawmawm a tih thu sawiin, kum 2021-ah Bangladesh ramri hrula BSF Camp engemawzat a tlawh thu te, BSF Camp thenkhat chu eng kawng mahin a pawh loh thu leh henglai hmuna damlo te pawh inkalpawhna kawng a awm loh avanga an boral phah thu te BSF hotute leh khawtlang hotu ten a hnena an lo thlen thu te a sawi a ni.

 

Serchhip Tuikhuah Veng atanga Serchhip Vengchung leh Field Veng lam panna kawng siam that turah harsatna a awm avangin nimin khan Serchhip NGO Coordination Committee chuan Chief Minister hnenah an lo thlen.

District Hospital, Serchhip-a Dialysis khawl bun thar chu hman theih tura peihfel a nih hnuah nimin khan Bialtu MLA leh Chief Minister, Lalduhawma chuan hawngin Vawiin atang hian a mamawhte tan hman tan tum a ni a, tun dinhmunah he khawl hmang tangkai tur hi mi pasarih an awm mek nia thudawn a ni.

Naktuk April 3, 2026 (Zirtawpni) hi Kristian te ni pawimawh, Good Friday a ni a, sawrkar Pisa chawlh a puan a nih angin zirna In leh sawrkar Pisa te khar a ni ang. Good Friday hi Kristian te chuan Pathianni anga serhin he ni pual hian hun an hmang dawn a, Kohhran tam ber te chuan zanin atang hian Good Friday Programme hi an hmang anga, Kohhran thenkhat ah chuan zanin hian Lalpa Zanriah Sacrament kilho a ni ang.

Kum 2026-2027 Academic Session atan Mizoram-a High School leh Higher Secondary School te chu nimin atang khan an lut tan ve leh ta.

Mizoram Information Service (MIS) Officer thenkhat te awmna hmun chu tunhnai khan siksawi niin Serchhip-a District Information & Public Relations Officer hna chelh mektu Lalnun-mawii chu Directorate of I&PR-ah Deputy Director hna chelh tura sawn a ni a, a aiawh tur hian Junior Grade of MIS atangin Directorate-a awm mek R. Vanneihtluanga chu dah a ni. R. Vanneihtluanga hi Serchhip khua atanga MIS a tling a ni.

Chief Minister leh ZPM Leader Lalduhoma chuan Congress leh MNF te chu an kuhmum rei lutuk nia sawiin, “Keini erawh chu kuhmum hman meuh lovin kan par nghal mawlh mawlh mai a ni,” a ti.

Chakma Autonomous District Council (CADC) hnuaia thawktute chuan Thla 4 chuang hlawh lak tawh loh avangin Vawiin, April 2, 2026 atang hian nawrh huaihawt an tum.

Mizoram Universal Health Care Scheme (MUHCS) 2.0 chu nimin, April 1, 2026 atang khan kalpui tan a ni leh ta a, nakum (2027) March 31 thleng kalpui tur a ni ang.

Mizo Language Development Board (MLDB) buatsaih ‘Thawnthu tawi Inziahsiak’ lawmman semna chu nimin khan Aizawl-a ATI Auditorium-ah neih a ni a, IPR, P&S Department changtu Secretary Betsy Zothanpari Sailo chuan khuallian niin a hmanpui a, khawvel hmasawn zelah mahni tawng bosala hnamdang tawng leh nunphungin thangtharte zingah hlauhawm khawpa Mizote min tibuai tan mek nia a hriat thu tarlangin, chu chu ram leh hnam hmasawnna daltu a nih mai a hlauhawm hle tih a sawi bawk. Thawnthutawi Inziahsiak-ah hian ‘Zirlai mak leh hlu ber chu’ tih ziaktu Vanlaltanpuii, pawl 8, Springdale Academy, New Champhai chu pakhatna niin Rs. 10,000/- a dawng a, ‘The Chocolate’ tih ziaktu Joseph Lalduhawma, PES Melbuk chu pahnihna niin ‘College pass chhuak ve kha’ tih ziaktu Phoebe Lalremruati, Noah’s Foundation, School, Aizawl leh ‘Ka rohlu ber’ tih ziaktu R. Vanlaldampuii, PES Champhai Zote te chu pathumna an ni.

India ram Chhiarpui 2027 chu nimin khan neih tan a ni ta a, nimin zing khan Chief Minister Lalduhoma chuan a chenna In-ah Census of India 2027 Phase-I (Houselisting leh Housing Census) Self-Enumeration tiin he Chhiarpui hi Mizoram-ah chuan tan a ni.

Mizoram Information Service Association (MISA) chuan nimin khan Aizawl-a I&PR Conference Hall, Lianchhiari Run-ah General Conference an hmang.

Mizoram sawrkar chhinchhiah danin, kum 2024-2025 inkara SASCI sum hmuh atangin Mizoram chhungah Zirtirtu Quarters 62 sak a ni.

Mizoram University Department of Botany chuan Sekhupthur species thar ‘Begonia mizoramensis’ tih chu an hmuchhuak thar a, a species hming hi Mizoram hming chawi a phuah a ni a, Thiak-ah leh Khawrihnim-ah hmuhchhuah a ni. He thlai hmuhchhuah thar hi ral mai thei dinhmun a ding niin, Conservation status Critically Endangered (CR)-ah dah a ni a, Research Paper hi Taiwania Journal-ah online a en theih a tihchhuah a ni bawk.

All Mizoram Vawk Vulh Association (AM-VVA) chuan Mizoram chhunga African Swine Fever (ASF) a lo leng leh tan tih sawiin, State pawn atanga Vawk lakluh atangin ASF hi a darh ni ngeia rin a nih thu an sawi a. African Swine Fever (ASF) hri hi a darh zel lohna turin State pawn atangin Vawk lakluh phal a nih loh thu sawiin, he thuchhuah bawhzui hian thu zawm lo apiang te chungah a tul anga hmalak a nih dawn thu an sawi bawk.

Social Welfare Department leh Mission Foundation Movement (MFM) tangdunin kum upa te enkawlna lam, Gariatric Caregiver zirchhuak mi 120 te hnenah nimin khan Certificate an hlan a, heng Training chhuak te hnena Certificate hlanna hi Champhai, Lunglei, Mamit leh Saitual-ah te neih a ni a, hetiang Training hi College zirlai zinga zir ve duh ten remchanna an neih theihna turin District hrang hrangah hian hun hnih (2)-a kalpui a ni.

All Mizoram Vawk Vulh Association (AM-VVA) chuan Mizoram chhunga African Swine Fever (ASF) a lo leng leh tan tih sawiin, State pawn atanga Vawk lakluh atangin ASF hi a darh ni ngeia rin a nih thu an sawi a. African Swine Fever (ASF) hri hi a darh zel lohna turin State pawn atangin Vawk lakluh phal a nih loh thu sawiin, he thuchhuah bawhzui hian thu zawm lo apiang te chungah a tul anga hmalak a nih dawn thu an sawi bawk.

Niminpiah tlai khan Goa Mizo Welfare te buatsaihin ‘Chapchar Kut 2026’ chu Sneh Banquete Hall, Porvorim, Goa-ah hman niin Central YMA President R. Lalngheta leh Fin. Secretary MS. Ralte te chuan an hmanpui a, Central YMA President chuan Mizo thalaite chu Zu leh ruihhlo avanga buai mai mai hman an ni tawh lo tih sawiin, zu tamna hmunah pawha zu in ngai lo thalai tam tak an awm avangin Mizote an tihmingtha a, midang tan hnathawh ve na tur kawng in hawng zel tih a sawi bawk. Goa Mizo Welfare-ah hian Member 1200 chuang an awm a, Chapchar Kut hmangtu te hian Kut ruai an theh nghal bawk a ni.

Chief Minister Lalduhoma chuan kum 2025-2026 Financial Year-a ni hnuhnung ber, niminpiah March 31, 2026 tlai khan Aizawl-a Treasury Office tlawhin thawktute nen an inkawm a, an hnathawh dan te a sawipui bawk. He hunah hian Chief Minister chuan kumin ah Finance Department-a thawktute thawhrimna zarah SASCI hnuaiah Efficiency in Public Financial Management lawmman an hmuh thu sawiin, Sawrkar laipui hnuaia sum kalpuina SNA SPARSH leh GST TDS avangin engemaw harsatna neuh neuh tawk mah se State sum enkawlna kawngah hma an sawn nasat thu a sawi bawk. He hunah hian Minister Dr. Vanlalthlana leh Adviser to CM TBC Lalvenchhunga bakah sawrkar mi pawimawh ten Chief Minister hi an tawiawm a ni.

 

Mizoram Journalists’ Association (MJA) Serchhip District Member te chuan nimin khan Thenzawl-a Deer Park tlawhin helai hmuna Sazuk khawi an kalpui dan te an thlirho.

District Hospital Serchhip-a Dialysis khawl bun thar chu hman theih a nih hnuah Vawiin hian hawn a ni dawn a, naktuk atangin hman nghal tura ruahman a ni.

Food, Civil Supplies and Consumer Affairs Department chuan tunlai khawvel geo politics boruak avanga eirawngbawlna gas leh tuialhthei chungchang ah mipuiten harsatna an tawh loh nan puitu turin State Level-ah leh District Headquarters tinah Command/Helpline Centre a din a, mipuiten mahni District theuha Helpline Centre te hi hmang tangkai turin an ngen a. Serchhip District tan Helpline Contact Number chu 03838-222432 niin State Helpline Centre chu 1967 (Toll Free) leh 9436159263 (Joint Director, FCS&CA) a ni ang.

India rampum-a Chhiarpui neih tur chu ramchhung hmun dangte rualin Vawiin, April 1, 2026 atang hian Mizoram-ah pawh tan a ni dawn.

MNF Legal Board hruaitute chuan Inthlan dawn apianga Hmeichhe Candidate-ten mawi lo tak taka Social Media-a beih an tawk thin chu pawi an tih thu sawiin, India rama literacy rate sanna State tih atan chuan a mawi lo ni mai lovin tih loh tawp tur a nih thu an sawi bawk. 

Mizoram State Rural Livelihood Mission (MzSRLM) hnuaia din Ropuiliani Women Farmer Producer Company Limited (FPC) chuan Mamit leh Kolasib District-a an Shareholders te tharchhuah Aieng an lei Metric Ton 71 (kg 71,600) chu nimin khan Kolasib DC Office Complex atangin vailiam a ni.

Mizo Juda awm thenkhat tiamin India rama Juda Hnam awmte chuan Vawiin atanga serh tan tur, Kalhlen Kut an hmang ve dawn lo.

Chief Minister Lalduhoma chuan Finance Commission 15-na ruahman angin VC-te pualin Mizoram in cheng vbc. 362 a dawn kim thu a sawi.

Mizoram-a NCC Fest & Parasailing Camp hmasa ber tur chu thla thar May 5 - 11, 2026 chhung khian Lunglei-ah buatsaih tum a ni.

Manipur-a Lamka Branch YMA te chuan Mizo Comics lar tak, ‘Sudden Muanga’ tih ziaktu, Lalsangzuala’n he Comics a ziakna hmanrua leh a bungraw hlui dangte chu Mizoram State Museum-a dah turin Central YMA kutah an hlan.

Mizoram chu India rama HIV Positive sanna ni mahse HIV damdawi, ART eite an hrisel that a, an damrei chu thil lawmawm a nih thu MSACS hotuten an sawi.

Mizoram Rural Bank (MRB) chuan Corporate Social Responsibility (CSR) kaltlangin nimin khan Computer 32, Printer 4 leh Smart Interactive Board pakhat chu hmun li-ah an hlan a, nimin-a CSR kaltlanga an thilpek hi Rs. 19,94,220/- hu zet a ni. Thilpek inhlanna hun MRB Head Office Board Room-a neih ah CSR Committee Secretary V. Lalrinmawia chuan Mizoram Rural Bank chuan Bank profit atanga chhuta CSR kaltlanga pawl, khawtlang leh Sawrkar Office hrang hrang tana an luanchhuah thin tawh thu a sawi a, tun tumah hian ITI (LESDE), MJA, Champhai SP Office leh HATIM-ah te heng thilpek hi an hlan a ni.

Mizoram Press Owners’ Association chuan nimin khan thuchhuah siamin hun engemaw chen atanga Mizoram Sawrkar leh Mizoram Press Owners’ Association tangdunin Mizoram Text Book chhutna tur Printing Press, Phunchawng Mel-10 hmuna a din chu kumin (2026) hian hlawhtling tanin, a vawi khatna atan Mizoram chhungah hlawh-tling takin Zirlaibu Colour a chhut a ni tih sawiin, lawmawm an tih thu an sawi a. Kum lo kal zel turah pawh Mizoram Text Book chhut nana vai rama sum tam tak liam thla zel lova, Mizoram chhunga sum a luh a, mi engemaw zatin he Press hi eizawnna atana an hman theih zelna tur a hma lakpui zel turin sawrkar an beisei tih an sawi bawk.

Kolasib District Magistrate Lalmuan Puia chuan tunhnai maia thenawm Assam State-in Inthlanpui (General Election) an hmachhawn dawn avangin Election Commission of India (ECI) inkaihhruaina hnuaiah State inrina (Inter-State border) huamchhungah te venhimna uluk zawk leh khauh zawka kalpui mek a ni tih sawiin, Duty leh Patrolling te pawh neih uar a nih thu a sawi a. Hemi a nih avang hian ramri hrula khawsa leh veivak thinte pawh fimkhur thiam tur leh thil pawi thleng thei laka inveng theuh turin mipuite a ngen bawk.

Legal Metrology Enforcement leh Centre For Consumer Education tangkawp chuan nimin khan Rangvamual-ah Liquified Petroleum Gas (LPG) cylinder phurtu lirthei endikin LPG bur 30 vel chu tih chingpen a nih thu leh a buk a tling lo tih an hmuchhuak a, Centre For Consumer Education chuan hetianga Gas tihchingpen a ni thin chu consumer-te chanâi chhuksakna a nih avangin pawi an tih thu leh a tichingpentute hrem tura hma la tura sawrkar an phut thu an sawi bawk.

 Hulhliap Short Stay Centre (SSC) atanga chhuak te tana Skill Training – Plumbing General leh Assistant Electrician neih a training chhuak mi 22 te hnenah nimin khan Certificate hlan niin heti hian tun thleng hian Hulhliap SSC chhuak mi 118 hnenah Certificate pekchhuah a ni tawh. MFM Skill Training Centre, Dawrpui Vengthar-a Training chhuak te hnena Certificate hlanna hun hi Task Group on Aftercare, Skill Training & Handholding-a Member Secretary Vanlalhruaii chuan kaihruaiin MFM Director, Upa Dr. R. Vanlalzauva chuan tun tumah hian Certificate sem chhuah tur 22 an awm thu sawiin, mi 13 ten Assistant Electrician zirchhuak in mi 9 ten Plumbing General training an zawh thu a sawi a. Heng Training hi March 16 khan tanin Trainer atan Lalremruata(Electrician) leh Gideon Vanlalruata (Plumbing trainer) te hman an nih thu a sawi bawk.

 

Serchhip RD Block-a Block Development Officer (BDO), Dr. Lalramdintluanga chuan Mahatma Gandhi National Rural Employment Guarantee Act (MGNREGA) kalpui dan khirh tulh tulh anga lang chu Job Card holder leh Worker dik tak ten hna thawk tak tak chunga an hlawh tur dik tak an hlawh theih nana kalpui a nih vang tih a sawi.

Serchhip District Jail-a tang mek leh Jail-a thawktute tan Health Camp neih a ni a, a thlawnin damdawi sem nghal a ni bawk.

Mizo Zirlai Pawl (MZP) Headquarters Serchhip chuan nimin khan Serchhip Press Club-ah kum 2026-2028 chhunga hruaitu tur thlanna neiin President-ah Darchhuana (Chhim Veng); Vice President-ah Lalrinsanga (Vengchung); Secretary-ah Rosangliana (Hriangtlang/Chanmari Veng); Joint Secretary-ah Benjamin C. Lalrinmawia (P&E Veng); Treasurer-ah Jacinta Vanlaltleipuii (IOC Veng) leh Fin. Secretary-ah Prisky Zothanpuii (Dinthar Veng) te thlan an ni. MZP Hqrs. Serchhip hruaitute hi inthlan atanga ni 20 chhunga mawhphurhna inhlan tura tih an ni.

Nimin khan UPC Mizoram-a Serchhip Bial Pentecostal Youth Department (PYD) te chuan Serchhip Blood Bank-a dah turin thisen Unit 17 an pe a, thisen petute hi mipa 10 leh hmeichhia 7 niin Serchhip Blood Bank-ah kalin thisen hi an pe a ni.

Mizoram-a Muga pangang khawitute mamawh Muga Pangang tui siamchhuahna hmun tur atan Thenzawl-a State Sericulture Farm chu Central Silk Board, Ministry of Textile Government of India hnenah pek a ni dawn.

Mizo Students’ Union (MSU) General Hqrs. hruaitute chuan sawrkar hnathawk aikal la te chung-changa an thurel bawhzuiin nimin khan School Education Minister Dr. Vanlalthlana hmuin Zirtirtu aikal la mi 14 an awm thu an thlen a, hemi rual hian hma la tur leh bawhzui turin Education Minister hi an ngen bawk. Education Minister chuan MSU hruaitute chu a bawhzui tur thu leh hmalak nghal a nih tur thu a lo hrilh a ni.

Aizawl Municipal Corporation (AMC) Ward 19-a inthlannaa chuh tumte tan inhnuhdawh hun chu nimin tlai dar 3:00 khan tawpin inhnukdawk an awm lo a, ZPM, MNF leh Congress ten Candidate 19 theuh neiin BJP in Candidate 11 an nei dawn a ni.

April 21, 2026-a Aizawl Municipal Corporation (AMC) inthlanpui lo awm tur atan Political Party hrang hrang ten ngawrh takin Campaign an kalpui mek.

Minister of State Lalnghinglova Hmar chuan nimin khan New Delhi-ah Asian Development Bank (ADB) hotute kawmin Sports leh Tourism hmasawnna tura ADB atanga tanpuina awm thei te an sawi a; Finance Ministry lam nen an inkawm bawk.

Tunhnai a phalna nei lova Mizorama lo lut ramdang mi 2-te chu thubuai siamsak lova thawnkir an ni tawh.

Chief Secretary Khili Ram Meena chuan mipuite chu Gas leh tuialhthei sem chungchanga harsatna tawk leh man to zawka hralh chingte sawrkar hotute hnena thlen turin a hriattir.

Hnahthial District Hospital-a damlo awmpuitute hahdamna leh riahna hmun tur - Patient Attendant Shelter chu nimin khan Bialtu MLA Jeje Lalpekhlua chuan a hawng.

Association for Voluntary Blood Donation (AVBD) Champhai District-a Asst. Secretary, PC. Lalchuangkima chuan nimin khan Champhai District Hospital Blood Bank-ah a vawi 100-na atan thisen a pe a, Mizoram-a vawi 100 thisen pe thei hmasa ber nia hriat a ni. Mizoram-a thisen pe tam ber record siam mektu, C. Lalremruata, Aizawl Electric Veng chuan midangte ten thisen vawi 98 pe tawhin hei hi PC. Lalchhuangkima hian a rawn khum a, AVBD Champhai District chuan chawi-mawina thuziak an hlan a ni.

Mizoram Excise & Narcotics Department chuan kum 2024 atanga kumin January ni 31 thleng khan Mizoram Excise Act, 1974 hnuaiah mi 702 man niin thubuai 752 ziahluh a ni a, hemi hun chhung vek hian Mizoram Liquor Prohibition (MLP) Act, 2019 hnuaiah mi 10, 474 man niin thubuai 11, 561 ziahluh a ni bawk. END hotute chuan ruihhlo do kawngah nasa zawkin tan an lak dawn thu sawiin, ruihhlo zuar leh ti thinte chu dan hnuaiah khauh taka hremna pek zel an nih tur thu an sawi a ni.

Indian Red Cross Society (Mizoram Branch) chu nimin khan an Chairman thar leh Health & Family Welfare Department changtu Secretary K. Lalrinzuali hovin SAD Conference Hall-ah an thukhawm a, kum kaltaa IRCS (Mizoram Branch) hmalaknate an thlirho bakah kumin atana hmalak lehna turte an rel a. Kumin World Red Cross Day (May 8) puala Mizorama District-te huam tura hmalak dan turte ngaihtuah niin a theih ang anga Branch huang zauhna tur leh mipui vantlang tana hlawk zawka kal zeldan turte an rel a ni bawk.

Nimin khan State Level Monitoring Cell on LPG/POL chu Food, Civil Supplies & Consumer Affairs Department changtu Secretary Teresy Vanlalhruaii hovin a Pisa-ah an thukhawm a, he hunah hian tunlai Gulf region buaina avanga India ram leh khawvel hmun hrang hranga Gas leh a kaihhnawih buaina awm mekah Mizoram chhung dinhmun chu a that thu tarlan niin, mipuite an chi-ai mai lohna tur leh buaina a awm loh nana sawrkar hmalakna hrang hrangte thlirho a ni a, buaina tipunlun thei thil Hoarding,diversion leh Black marketing te a awmlohna tura sawrkar hmalakna te pawh thlirho a ni bawk. He thutkhawm ah hian sawrkar Official te bakah Mizo Consumer Union,Mizoram Indane Distributors Association leh RGGLV Distributors te atangin harsatna an tawhte ngaihthlak niin hmalak zel dan turte an sawiho nghal bawk a ni.

United Pentecostal Church-North East India (UPC-NEI) hnuaia Pentecostal Youth Department (PYD) Serchhip Bial te chuan Inrinni khan Hmawngawn lui dung thenfai hnatlang an nei.

March ni 26, 2026 atanga Chhattisgarh (Raipur)-a ‘1st Khelo India Tribal Games’ neih chu nimin khan zawhfel niin Weightlifting-a Mizoram aiawha Serchhip District atanga kal zingah Zosangzuali (Keitum) chuan +86 kg. Category-ah Gold Medal a la a, amah chiah hi Hmeichhia a Mizoram tana Gold la niin Mipa in Gold 3, Silver 3 leh Bronze 1 an la a ni.

Serchhip Zawlpui Agro Farmers Producers Company Ltd. chuan Inrinni khan Serchhip Mat Phai, Zawlpui Zau-a Sunflower (Nihawichi) chinna hmun an tlawh a, Guwahati atangin APRINS Project Co-ordinator Papori Chutia leh Zonal Co-ordinator Udipta Buragohain ten an telpui a ni.

Kristian te ni pawimawh ‘Tumkau Ni’ chu nimin khan khawvel hmun hrang hrangah Kristian ten ropui leh urhsun takin an hmang.

Serchhip Bialtu MLA leh Chief Minister Lalduhoma chuan Zirtawpni khan ‘Thenzawl PWD Road Division’ hawngin he Office hi thla thar April 1 atangin mipuite tan dawr theih a ni ang.

Thenzawl Lothazawl Playground-a Artificial Football Turf phah tur lungphum chu Zirtawpni khan IPR&PS Minister B. Lalchhanzova chuan phumin cheng vbc. 10.33 sengin hna thawh a ni ang.

Gauhati High Court chuan Sairang leh Vairengte inkar kawngpui siamthat hna thawktu pakhat chu hna an la zawh loh za zela 65 chu engtin nge April thla chhunga an zawh theih dan tur a zawt.

Mizoram Civil Pensioner Association (MCPA) chuan Mizoram Universal Health Care Scheme (MUHCS) 2.0 chu Pensioner te tan tha an ti lo tih sawiin, MUHCS 1.0 hman chhunzawm tir turin Mizoram Sawrkar an ngen a, Pensioner tam zawkin MUHCS an zawm theihna tura hmalak an inhuam thu an sawi bawk.

Champhai District Khuangleng khaw daia John Lalrinchhana Ar vulhna, Steven Poultry Farming hmuna Ar vulh lai, White Leghorn 811 vel chu Zirtawpni zan khan Ui-in an seh hlum nia hriat a ni a, Ar dang 150 leh Ar note 37 bawr vel chin hriat lohin an awm bawk.

Mizoram Journalist Association (MJA) chuan Zirtawpni kalta, March 27, 2026 khan General Conference vawi 52-na hmangin an pawl hruaitu tur an thlang nghal bawk.

Sawrkar hnathawkte'n mipui tana tangkai zawk leh tha zawka an hnate an thawh theih nana ruahmanna hrang hrang sawihona chu Zirtawpni khan neih a ni a, Chief Secretary Khilli Ram Meena chuan he hun hi a kaihruai a ni.

Agriculture & Farmers’ Welfare Department changtu Minister PC. Vanlalruata chuan Kerala tlawhin Cocoa chin kawnga an hmalakna hrang hrangte a zirchiang.

ZPM Thalai General Hqrs. hruaitute chuan National Highway-06 siamthat hna thawh mek endikna an neih mekah kar kalta Zirtawpni khan Four Lane in a khawih loh tur enfiah lehin Khamrang - Sairang chu J. Infratech Pvt. Ltd. leh BR Goyal Pvt. Ltd ten enkawlin, J. Infratech Pvt. Ltd. te hian RCC-a chhun turah 80% leh Resurfacing turah 60% an zo tawh a, BR Goyal Pvt Ltd. te chuan Black topping & Re-surfacing an thawh turah 80% leh RCC-a chhun turah 100% an zofel tawh bawk a, Company hotute sawi danin ni 15 chhung a zofel thei turin an inbeisei a ni.

Urban Development & Poverty Alleviation (UD&PA) Department, Aizawl Smart City Limited (ASCL), Aizawl Municipal Corporation (AMC) leh Central Young Mizo Association (CYMA) tangkawp, Aizawl Khawpui Faina atana Coordination Committee buatsaih, ‘Aizawl Khawpui Faina Hnatlangpui leh City Branch YMA Fai Intihsiak’ chu Inrinni zing khan Aizawl Vanapa Hall kawtah a khuhhawnna neih a ni a, Aizawl khawpui hmun hrang hrangah Faina Hnatlang neih zui nghal a ni. 

Mission Organic Mizoram (MOM) enkawl Company te kaltlangin Mizo Hmarcha chu kumin ah a vawi khat nan hralhchhuah a ni.

Thla thar April 21-a Aizawl Municipal Corporation (AMC) Inthlanna neih tura chuh tuma hming pelut te tana inhnuhdawh hun chu Vawiin, March 30, 2026 tlai dar 3:00 hian a tawp dawn ta a, Ward 19-a inthlanna neih tur chuh tum hian mi 68 in hming an pelut a ni.

Inrinni (March 28, 2026) tlai dar 2:00 leh 3:00 inkar khan Lawngtlai District chhung, Sangau RD Block huamchhunga Thaltlang khua chu ruah leh rial in nuaiin In 13 chu luahzui tlak lohin a chhia a, In dang 28 pawh a chhe nual bawk. Thaltlang khua hi In 110 awmna khua a ni a, chhiatna thlenna hmun hi sawrkar mi pawimawh ten tlawh nghalin chhawmdawlna hna thawh nghal a ni.

Mizoram State Project Monitoring Committee (MSPMC) chuan tunhnaia Project hrang hrang an endik te thlirin Nilaini kalta khan Planning & Programme Implementation Department Conference Hall-ah Review Meeting an nei a. MSPMC hian sawrkar kum kallai (April, 2025 - March, 2026 chhung) hian Project hrang hrang 72 an endik tawhin Inspection neiin vawi 82 an feh chhuak tawh a. Chung zinga Project 16, tunhnaia an endikte report chu he hunah hian thlirho niin rel ngai leh bawhzui ngai pawimawh hrang hrangte an sawiho bawk a ni.

Food, Civil Supplies & Consumer Affairs Dept chuan Mizoram-ah nitin mamawh eitur leh tuialhthei te dan pangngaiin chawkluh reng a ni tih sawiin, mipui supply pek kawngah harsatna a thlen loh thu an sawi a. FCS&CA Department Secretary Teresy Vanlalhruaii chuan, eirawngbawlna Gas leh tuialhthei te chu Mizoram-ah ni tin a lo thleng reng tih sawiin, khawthlang lama Indo a awm avangin mi thenkhat chuan eirawngbawlna Gas leh tuialhthei a harsat hlau in an inla khawl a, amaherawhchu hlauhthawn ang te thleng lovin heng supply te hi a pangngai rengin a rawn thleng tih a sawi a, tun dinhmunah chuan hlauthawn tur a awm lo niin a sawi bawk. Teresy Vanlalhruaii chuan tul lo a mipui lamin Gas leh tuialhthei an lak lawk vak vak loh nan Gas chu book hnuhnung ber atanga ni 25 hnuah chauh a book leh theih tih a sawi a, hei hi mi thenkhat in midang chan ve tur an lo lak heksak lutuk tur venna a ni tih a sawi bawk.

Nimin khan Serchhip-ah Reserved Forest chungchang ngaihtuahin District Level Committee chu Bawrhsap, Paul L. Khuma hovin an thukhawm.

Nimin khan Aizawl Vaivakawn Cultural Centre-ah ‘State Level Viksit Bharat Youth Parliament 2026’ neih niin Govt. Serchhip College atanga tel zingah Malsawmzuali (2nd Sem BA) chu pahnihna a ni a, Mizoram aiawha National Level-a inelna tel turin a tling a ni.

College of Horticulture, Central Agricultural University (CAU), Thenzawl buatsaihin nimin khan Thenzawl-a Horticulture College-ah ‘One day Farmer-Scientist Interaction Programme-cum-Farmers' Fair’ neih a ni.

Telecom Regulatory Authority of India (TRAI) chuan Serchhip District Consumers Association (SDCA) te hmalakna chu nimin khan a hmunah kalin an rawn enfiah.

Mizoram Universal Health Care Scheme (MUHCS) 2.0-ah Pensioner tih loh, Sawrkar hnathawk nghet, mi nawlpui leh Golden Card neite tan thil thlak danglam a awm lo a, Mizoram sawrkar hnuaia thawk mek All India Service leh Central Service ten MUHCS 2.0 an zawm ngei a ngai tawh dawn thung.

Thla thar April 21-a Aizawl Municipal Corporation (AMC) Inthlanpui neih tura chuh tumte tana hming pekluh theih hun chu nimin khan tawpin heng hming pekluh te hi naktuk-ah enfiah a ni ang.

Lunglei Municipal Council (LMC) Board of Councillors (BoC) chu niminpiah khan Lunglei Convention Centre-a BoC Meeting Hall-ah Vice Chairman K.Lalrinawma kaihhruaia thukhawmin kum 2026–2027 chhunga LMC Budget atana ruahman Rs. 18,95,62,000/- chu pawm a ni a. LMC huamchhunga Veng fai inelna buatsaih nise tih relin, hemi atan hian cheng nuai nga ruahman a ni a; Municipal Sanitation Committee bawhzui tura dah a ni bawk. He thutkhawm kaihruaitu LMC Vice Chairman chuan LMC Councillor-te chu an Ward an enkawlna theuhvah theihtawp an chhuaha a hriat thu leh eirukna leh hlemhletna lakah pawh an fihlim tlang hle nia a hriat thu sawiin, lawmawm a tih thu a sawi bawk.

Planning & Programme Implementation Department buatsaih, Economic Survey 2025-2026 Bu-a tarlan a nih danin kum 2025 chhung khan lirthei 78,729 te chu khu an pekchhuah dan enfiah niin an zinga 78055 ten endikna an paltlang zawh laiin paltlang zo lo 674 an awm bawk.

Mizoram Universal Heathcare Scheme (MUHCS) 1.0-a Pensioner ten hamthatna an neih ang chu MUHCS 2.0 ah an nei tawh dawn lo a, hei hi Pensioner te pawisa thawh leh an hmanral a inthlauh lutuk vang niin, Category hrang hrang zingah chawhrualin pensioner-te'n sum an hmang tam ber tih Finance Secretary Ramchuana chuan a sawi.

Mizoram Larsap General (Dr) Vijay Kumar Singh chuan Silk hrang hrang tharchhuah tamna khawpui ni turin theihna kan nei tih sawiin, hemi tur hian tan erawh kan lak nasat lehzual a tul tih a sawi.

Mizoram Larsap General (Dr) Vijay Kumar Singh chuan Mizo thalaite chu pianpui thiamna nei tha leh thawkrim an nih thu a sawi.

Champhai District chhunga awm Leithum khua chuan nimin khan ‘Leithum Haw Runpui’ an nei a, he hun hi Art & Culture Minister C. Lalsawivunga leh Bialtu MLA, Ramthanmawia te chuan an hmanpui a ni.

Nimin khan Serchhip-ah District Level Workshop on Handholding Scheme neih niin Mizoram State Policy Coordination Committee (MSPCC) Member te leh Handholding Scheme CEO ten hun an rawn hmang a. Serchhip District-ah Bana Kaih hnuaia loan dilna 29 chu Bank in pawm tawhin sanction a ni tawh tih he hunah hian tarlan a ni.

Serchhip Dinthar Veng Sesah Lui-a tui luanna chu siamthat tum niin hei vang hian Serchhip paltlang tur lirthei thenkhat tlan dan tih danglam a ni.

Khawvel puma TB natna dona ni, ‘World TB Day’ chu nimin khan hmun hrang hrangah hman niin Serchhip-ah pawh ‘Yes! We Can End TB! Led by Bharat, Powered by Janbhagidari’ tih thupui hmangin he ni hi hman a ni.