Lenkawl

Kum 2025-2026 Academic Session chu kan hmang zo dawn hnai ta a, zirna In hrang hrang ten Promotion Exam nei chho mekin Zirna In tam zawk chu tun thla chhung bak hawn a ni dawn rih lo a, March thla chhung zawng hian ‘Kum tawp chawlh’ kan tih thin ang hun kha hman a ni dawn a. Thla khat vel lai naupang ten School chawlh an hman dawn avang hian nu leh pa te pawhin he hun awl nia lang hi kan tu leh fa ten tangkai tak leh hlawk taka an hman dan tur kan ngaihtuahpui a tul hle mai a. Kawng tha lo zawhna hun remchang atana an hman lohna tur atan leh thil tha zirchhuahna hun remchang atana an hman zawk theihna tur kan ngaihtuahpui a tulin a pawimawh hle a ni.

Chief Minister Lalduhoma chuan Serchhip-a Ruihhlo pual-a Gospel Camping buatsaiha lut, eizawnna mumal nei leh bultanna nei lo te chu sawrkar in a tanpui dawn tih a sawi.

Presbyterian Serchhip Pastor Bial leh Serchhip Vengchung Pastor Bial-a Kohhran Pavalai Pawl (KPP) te chuan nimin, Pathianni hmang khan Bial huap Intawhkhawmna an nei a, heng Intawhkhawmna Zirtawpni zan atang khan neih niin Report hrang hrang ngaihthlak a nih hnuah Inrinni khan intihhlimna hun te hmangin Inrinni zan atanga nizan thleng khan Speaker te hnen atangin thuchah an ngaithlak bawk a ni. Pastor Bial huap KPP Intawhkhawmna hi Serchhip Pastor Bial ten Serchhip Hmar Veng Kohhran Biak In-ah neiin Serchhip Vengchung Pastor Bial ten Serchhip Bazar Kohhran Biak In-ah an nei bawk a ni.

Tun thla February ni 9 atanga Presbyterian New Serchhip Kohhran Biak In-a Ruihhlo ngai te puala Gospel Camping buatsaih chu Feb. 20-a zawhfel a nih hnuah nizan thleng khan Follow-up Programme hman zui a ni a, chhimtu mipui an thahnemin Bialtu MLA leh Chief Minister, Lalduhoma pawhin nizan khan he Follow-up Programme hi a rawn hmanpui a ni. Ruahman lawk ang chuan Vawiin atanga tunkar Zirtawpni thleng khian a hmun ngai ah hian a duh apiangte tan Gospel Camping neih chhunzawm leh tur a ni ang.

Thenzawl khuaa mipa naupang pathum tui-a tlahlum te chu an ruang lumen a nih hnuah nimin khan vuiliam an ni.

Serchhip-a Land, Revenue & Settlement Department-a thawk Francis Lalruatfela chu lirthei chetsualna avanga hun engemaw chen hliam a tawrh hnuah Inrinni zan khan boralin nimin khan vuiliam a ni. Aizawl Tlangnuam atanga Serchhip-a hnathawhna avanga rawn awm Francis Lalruatfela (36) H/o Caroline Saidingpuii Sailo hi tun thla ni 14 khan a thianpa nen Scooter hmangin Serchhip atangin Aizawl an pan a, kawng lakah chesual palhin hliam na tak a tuar a, Thingsulthliah CHC panpui a nih hnuah Feb. 15 khan Ebenezer Hospital panpui a ni a, a Thluak-ah thi a tlin nasat avangin zai ngam a ni lo a, ICU-ah enkawl zui ni mah se Inrinni, February 21, 2026 zan dar 7:15 vel khan a boral zui ta a ni.

Mizoram Universal Health Care Scheme hnuaia Empanelled Hospital ni lova damlo te inenkawlna senso Rs. 27,45,81,659 chu pekchhuah a ni tawh a. February ni 3, 2026 thlenga sum bat la awm cheng vbc. 25 chuang pawh sawrkar kum kal mek chhungin pek tlak vek tum a ni bawk.

Adviser to CM (Technical)  Er. H. Ginzalal MLA chuan Inrinni khan Aizawl Peak Restaurant-ah NHIDCL hotute thutkhawm neihpuiin NH-306 Kolasib to Sairang an sawiho a. NHIDCL hotute chuan he kawng siam mek hi tun Thal chhung ngeia siam zawh a nih tur thu leh, Fûr a lo thlena harsatna lo awm palh thil thuah boulder leh rora chhekkhawl an tum thu an sawi bawk.

Forensic Science Laboratory (FSL) Mizoram-a mi thiamte chu kum 2000 atanga kumin (2026) January thla thlengin pawikhawihna hmun 1,815 ah kal tawhin, kum 2024-2025 chhung khan FSL mithiamte chuan tualthahna chungchang tum 20 an enfiah bawk a ni.

Mizo Language Development Board (MLDB) chuan India Constitution Eight Schedule-a Mizo tawng dah a ni theihna turin hma an la mek.

Central YMA General Secretary Prof. Malsawmliana chuan ruihhlo la ti lo te venghim turin Kohhran huangchhung leh chhungkua atanga inzirtir a tul thu a sawi.

Inrinni khan Aizawl-ah Inner Line Permit (ILP) enfiah runpui neih niin Aizawl-a hnamdang awm zingah ILP nei lo leh fello mi 68 zet hmuh an ni.

Adviser to CM (Implementation of Handholding Scheme) Dr. KC. Lalmalsawmzauva chuan ei leh bar a intodelhna turin leh kuthnathawktute thlai tharchhuah man man zawka tihral thin a nih theih nan Mizoram Sawrkar chuan Bana Kaih Scheme chu tangkai takin a hman mek thu a sawi.

ZPM Thalai President leh MLA Jeje Lalpekhua chuan National Highway-06 siamthat hna thawh mek chu an vil reng dawn tih a sawi.

Mizoram sawrkar-a Art & Culture Department chuan Ministry of Culture, Govt. of India atanga thu an dawn angin Inrinni zing khan Aizawl-ah a huhoa tlan leh thirsakawr khalhna hun, ‘Ekta Diwas Unity Run & Cycling’ an hmang. Sawrkar laipui chuan ramchhunga State leh Union Territory zawng zawngte chu Union Home Minister hmasa ber leh Iron Man of India tia hming an vuah Sardar Vallabhai Patel-a pian champha-phak kum 150-na hriatreng nan October ni 31, 2024 leh October ni 31, 2026 inkara hun hman dan tur hrang hrang a duang a. Hemi hnuaiah hian Ekta Diwas thupui ‘One India, Self-Reliant India’ tih hmangin Art & Culture Department chuan Unity Run & Cycling chu Mizoram Cycling Association leh Aizawl City Run Club te thawhpuiin a buatsaih a, he hunah hian mi 140 vel tlanin Cyclists mi 55 an tel bawk a ni.

Information & Public Relation Department buatsaih-a Kolkata khawpui hmun hrang hrangte fang turin Mizoram hmun hrang hranga MJA Member mi 9 leh anmahni hruaitu I&PR Department mi pahnih te chuan Inrinni khan Aizawl an chhuahsan a, I&PR Director K. Vanlalsangi chuan vailiamin tun thla ni 26-ah Aizawl an rawn thleng leh ang.

India leh Myanmar ramri-a venhimna hna thawktu Assam Rifles te chuan Zirtawpni khan Lawngtlai District-a Kakichhuah-ah Mobile Vehicle Check Post siamin Chhimtuipui lui (Kolodyne) kaltlanga Mizoram-a rawn luh tum Lawngleng te an endikna ah Methamphetamine nia hriat mum 80,000 manin a vaiin kg. 3.95 a rit a ni a, cheng vbc. 11.85 man a ni. Inrinni khan Champhai District Police leh Assam Rifles te chuan Zokhawthar-ah Methamphetamine kg. 15 leh gram 916-a rit an man leh bawk a ni.

Mizoram Legislative Assembly Budget Session neih mek chu ni thum chhung chawlh a nih hnuah Vawiin chawhma dar 10:30 hian chhunzawm a ni leh dawn a. Hun hmasa lam darkar khat chhung zawhna leh chhanna hun atan hmang lehin hemi hun hian Paper hrang hrang leh Report te House-ah pharh a ni anga, Sialkal Range Development Council Bill, 2026 leh The Mizoram Shops and Establishments (Regulation of Employment and Conditions of Service) (Amendment) Bill, 2026 te chu pharha sawiho zui nghal a ni ang.

Kum kalta 2025 chhung khan Tlabung-a Environment, Forest and Climate Change Department leh Bangladesh ramri-a duty BSF-te chuan Bangladesh-a tawlh tur ni ngeia hriat Teak tum 1,945 zet an man. Tlabung-a Environment, Forest and Climate Change Department chhinchhiah danin, kum kalta 2025 April thla atanga December thla thleng khan Bangladesh-a tawlh tur ni ngeia hriat Teak tum 1,945 man ni a, heng zinga Teak tum 1,150 chu ramri-a duty BSF sipaite man niin a dang 795 chu Forest Department-te man a ni thung. Dan lova tawlh Teak tum 1,945 man khawm sa, lilamna atanga sum hmuh chu Rs. 28,18,196 a tling a, Sawrkar sum bawmah heng Teak lilamna atanga sum hmuhte hi chhunluh a ni.

Nikum October 21-23, 2025 chhunga YMA Inkhawmpui Lian vawi 75-na Sakawrdai-a neih in ‘Zohnahthlak chi peng hrang hrang Mizoram a chengte zingah, chi bil hmalakna a awm tawh loh nan Central YMA in hma la rawh se’ an tih bawhzuina atan Central YMA chuan thuchhuah siamin, ‘Mizoram hi Zofate inlungrual tak leh inrem taka kan chenhona a nih avangin kan hnam in-lungrualna tichhe thei chibil zawnga hmalakna te, chibil hamthatna tur leh dawmkawnna tur zawnga hmalak bikna hrang hrangte hi sawrkar, Kohhran leh pawl hrang hrang ten ti lo turin kan in ngen,” an ti a. Mizote hi Hnam tlem te kan nih avangin Hnam pual bila thil tih hrang hrangte hian Mizo Hnam inpumkhatna a tichhe thei tih hriaa Hnam pumpui thatna tur chauha ngaihtuahna seng tlang turin an ngen bawk.

Nimin February 20, 2026 kha ‘Mizoram State Day’ niin he ni pual hian Mizoram hmun hrang hrangah Ram tana Tawngtaina ni, State Day of Prayer atan hman a ni a, Serchhip-ah pawh New Serchhip YMA Hall-ah he ni pual hian tawngtai rualna neih a ni.

Mizoram Upa Pawl (MUP) Serchhip South Area chuan nimin khan Conference vawi 9-na hmangin ram leh hnam tana tawngtai rualna an nei nghal bawk.

Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.

Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.

Mizoram Upa Pawl (MUP) General Hqrs. President Nghaklian-mawia chuan nimin khan Thenzawl Area MUP Conference vawi 24-na chu khuallian niin a hmanpui a, MUP member te chu mi vannei, Pathian malsawmna dawng an nih thu sawiin, Thenzawl chu sawrkar hmalakna hrang hrangah pawh an vannei hle nia a hriat thu a sawi. Tar Chawmna chungchang sawiin, a changtu Minister leh Social Welfare Department-a thawktute nen theihtawp chhuahin hmalak mek a nih thu a sawi bawk. PCI Thenzawl Field Veng Kohhran Hall-a Thenzawl Area MUP Conference hi an President, C. Hranglura chuan kaihruaiin an Member boral mi 36 te sunna hun an hmang a, an huamchhung ah hian Thenzawl, Buangpui, Neihloh, Zote South leh Kanghmun South atangin Branch 12 an awm a ni.

Tuikum Bialtu MLA leh Agriculture Minister PC. Vanlalruata chuan nimin khan a Bial chhunga Chhingchhip Community Hall-ah Chhingchhip Area MUP Conference Vawi 32-na chu khuallian niin a hmanpui a, sawrkarin Upate a ngaih pawimawh thu sawiin, Tar Pension tanpuina sawrkarin a tipung tih a sawi a, Tar Pension chungchanga an harsatna pawh sawrkarin a hriatpui thu leh hmalak zel a nih thu a sawi a. Nungchang mawi leh tha, pi leh pute atanga kan chhawm thin kha mahni tu leh fate hnenah hrilh tam turin a chah bawk. Chhingchhip Area MUP hian MUP Branch 7 huamin, Member 709 an awm a, he Conference-ah hian Lengkhawm zai-a Intihsiakna an neih bakah Member thi 33-te sunna hun an hmang bawk.

Mizoram Larsap General (Dr) Vijay Kumar Singh chuan nimin, February 2026-a Mizoram State Day pualin Mizoram leh ram chhung mipui zawng zawngte Chibai bukin, Mizoram leh India ram chak leh hmuingil din turin inhlan thar leh theuh turin mipuite a sawm bawk.

Food, Civil Supplies & Consumer Affairs Minister B. Lalchhanzova'n Buhfai Supply tura Tender chhang hniam ber pe lova LZ Juice hnena Supply pek a nih avangin Sawrkar-in sum hloh a neih hriat a nih loh thu niminpiah-a Assembly Session-ah zawhna ziaka a chhanna ah a tarlang a, kum 2024 April atanga March 2025 thleng khan Buhfai Supply tura thlan LZ Juice te chuan Buhfai Quintal nuai 2 an supply hman tih pawh a sawi bawk.

Mizoram sawrkar Flagship Programme, Bana Kaih Scheme kaltlanga kuthnathawktute Sawhthing lei leh hralh kalpui mekah sawrkarin sumdawngten kuthnathawktute Sawhthing an leisakna tur hniam ber a bituk chu chawhrualin Rs. 32.56 a ni mek.

Mizoram Legislative Assembly Budget Session-ah ‘The Mizoram (Prevention of Public Land Encroachment) Bill, 2026’ lungrual taka pass a ni.

Mizoram sawrkar Art & Culture Department in Inrinni tin-a Falkawn-a ‘Living Museum’ an buatsaih thin ah Indian National Trust for Art and Cultural Heritage (INTACH) Hqrs., New Delhi chuan  Documentary Film an siam a, he Documentary Film siamna atan hian Art & Culture Department chuan a bikin man neiin Show a lo buatsaih sak a, hemi atan hian INTACH partner Mime Media Private Limited an rawn kal a ni.

Agriculture & Farmers’ Welfare Minister PC. Vanlalruata chuan Lawngtlai District-a Liapha khuaah Oil Palm Mill bun thar tumin hma an la mek thu a sawi.

Thla thar March 8-a International Women’s Day lo thleng tur hman dan tur chu niminpiah khan Aijal Club-ah Social Welfare Minister Lalrinpuii hovin rel a ni a, kumin hian International Women’s Day hi Pathianni a nih avangin March 18-ah hman tura ruahman niin kumin-a Thupui, 'Pekin Lukhawng a Nei' tih chu a taka tihhlawhtlin a nih theihnan hmalak dan tur hrang hrangte sawiho a ni bawk.

Mizoram State Day 2026-ah ram hruaitu hrang hrang ten Mizoram mipuite duhsakna chibai an buk.

Food, Civil Supply & Consumer Affairs (FCS&CA) Minister B. Lalchhanzova chuan sawrkar laipui in Mizoram-a Ration Card Pawl-a awm thei zat tura a bituk chu hnawhkhah a nih tawh thu sawiin, Ration Card Sen-ah mi 60,000 thunluh leh turin ruahmanna siam a nih thu a sawi bawk.

Tun thla ni 9 atanga Presbyterian New Serchhip Biak In-a Ruihhlo ngai te puala Gospel Camping neih chu tluang taka neih niin tukin hian Campers te an chhuak dawn ta a, zing dar 7:00 hian Campers te thlahna inkhawm neih a ni ang. Ruahman lawk ang chuan Camping neihna hmun ah hian naktip Pathianni, Feb. 22, 2026 zan thleng hian Camping Follow-Up Programme hman zui a ni anga, Lalpa hnathawh beiseitu zawng zawng leh Lalpa fakna a tel duh apiang te tel turin an sawm bawk a ni.

Nimin khan Serchhip-ah District Bawrhsap Paul L. Khuma hovin Special Assistance to States for Capital Investment (SASCI) Scheme hnuaia Serchhip khawpui chhunga hnathawh mek chungchang leh an dinhmun te thlirho a ni.

Vawiin Feb. 20, 2026 hi State dinhmuna Mizoram hlankai a nih kum 39-na, Mizoram State Day vawi 39-na a ni a, he Ni hi sawrkar Pisa chawlh a puan a nih angin sawrkar Pisa leh zirna In te khar a ni ang.

Health Minister Lalrinpuii'n Mizoram-a Private Damdawi In zinga Mizoram Universal Health Care Scheme (MUHCS) zawm lo te chu an rate a san em avangin sawrkarin inremna a la siampui ngam lova, inbiakna a kalpui mek tih a sawi.

Chief Minister Lalduhoma'n Mizoram chu India-a Digital State hmasa ber nih tir an tum tih a sawi.

Mizoram sawrkar-a Tourism Department chuan ‘ Uttar Poorva Transformative Industrialization Scheme (UNNATI) 2024’ chungchang sawifiahin, mi 44 te Consent to Establish pek an nih tawh thu an sawi.

Mipuite tan sawrkar dawr awlsamna tura sawrkar dan leh dun tihtlem kawnga sawrkar laipui hmalakna ‘Compliance Reduction and Deregulation Phase II’ chungchang sawihona chu niminpiah khan Chief Secretary Khilli Ram Meena kaihhruaiin Aizawl-a Secretariat Conference Hall-ah neih a ni a. He hunah hian Chief Secretary chuan sawrkarin dan leh dun mipuite zawm tur a tihtlem chu mipuite tan sawrkar dawr a awlsam zawk nan leh ram hmasawnna atana thil pawimawh tak a nih thu a sawi a. Phase I-ah ngaihpawimawh bik Priority Area 23 zingah Mizoram sawrkar chuan 17 hlawhtling taka an zawh tawh thu a tarlang a ni.

Lawngtlai leh Siaha District thuneitute chuan an District chhunga dan lo-a lo lut leh Trading (Maketing) chungchang sawihona biakhmuh-theihna kaltlangin an nei. He Meeting hian Free Movement Regime (FMR) chu khauh zawkin District Magistrate pahnih ten kenkawh nise an ti a, Dan leh thupek kenkawh chu ngaipawimawhin khauh takin dan kenkawh nise an ti a. District pahnihin Standard Operating Procedure (SOP) an siam chu zirchianna neih a Joint SOP siam nise, State sawrkar lamah thehlut tum nise an ti bawk. Heng bakah hian Surprise checking of illegal Immigrants (undocumented) neih nise tiin Joint Consultation Meeeting hi a hma lamin neih leh nise an ti bawk.

Health Minister Lalrinpuii chuan National Health Mission (NHM) hnuaia thawkte chu CSS Employees Scheme, 2024 anga dah ngheh zel tum an nih thu a sawi.

Mizo Zirlai Pawl (MZP) in nikum December 10-a Students' Aid Fund an tlangzarh hnuah nimin khan a tum khatna atan Students' Aid Fund Management Committee (SAFMC) chu Aizawl a MZP Pisa-ah an thukhawm a. Students' Aid Fund hi zirlai harsa chhawmdawl ngai a mamawh apiang tan dil theih niin, a thlawn tawpa pekchhuh (grant) leh a pung awmlo a puk (interest- free loan) turin ruahman a ni a, Aizawl-a MZP Office-ah dilna thehluh theih a ni bawk. Nimin a thutkhawm ah hian dilna lut te thlirho niin puih dan tur leh sum pek tur zat an ruahman nghal bawk a ni.

Social Welfare Department hnuaia Old Age pension (Tar chawmna) chu June 2025 thleng pek fel a ni tawh tih Assembly Budget Session neih mekah Social Welfare, Women & Child Development changtu Minister Lalrinpuii chuan a sawi a, June, 2025 thleng bak Central sawrkarin pawisa a la release loh avangin pek tlak a ni thei rih lo a. State contribution tur erawh budget-ah dah fel sa vek a ni thung. Old Age Pension hi kum 60-79 inkarin thla khatah Rs. 1200 (Central Rs. 200 leh State Rs. 1000) an la a, kum 80 chung lamin thla khatah Rs. 1500 (Central Rs. 500 leh State Rs. 1000) an la ni.

Mizoram Legislative Assembly thutkhawm nimin a neih ah Chief Minister Lalduhoma putluh ‘The Mizoram Goods and Services Tax (First Amendment) Bill, 2026’ leh Revenue Minister B. Lalchhanzova putluh ‘The Mizoram (Prevention of Public Land Encroachment) Bill, 2026’ te chu pharha sawiho a nih hnuah lungrual taka pawm a ni.

Hulhliap Short Stay Centre chhuakte tana a thlawna Skill Training buatsaih thin chu a Batch li-na atan nimin khan Aizawl Dawrpui Vengthar-a MFM Skill Training Centre-ah neih tan a ni a, tun tumah hian Hulhliap SSC chhuak mi 23-in Aluminium Fabrication an zir dawn a ni. Hulhliap Short Stay Centre chhuakte tana a thlawna Skill Training hi Batch thum buatsaih ni tawhin Trade hrang hrang - Assistant Electrician, Aluminium Fabrication leh Food Processing te kalpui a ni tawh a, mi 92-in training an zo tawh a ni.

Food, Civil Supplies & Consumer Affairs Department changtu Minister B. Lalchhanzova chuan Mualkhang Gas Bottling Plant tihchangtlun tumna a awm thu nimin khan Assembly House a hrilh a, hmalak dan tarlangin, “Sawrkar tharin mawhphurhna a lak atangin chak taka tihfel ngaite a tih fel avang leh a theih ang kawng kawnga Sawrkarin IOCL lam a nawr vangin ni 4.7.2024 khan IOCL hian cheng vbc. 225.71 an rawn sanction fel a, ni 22.7.2024-ah Plant Manager, Mualkhang Bottling Plant in Minister, FCS&CA hnenah a hlan fel a ni,” a ti a. Hei bakah hian “1.8 Hectares Extension atan Forest Clearance lam a fel loh avangin Mualkhang Gas Bottling Plant tihzauhna hna thawh theih loh reng chu Forest Clearance cheng nuai 26.75 pek tlak anih hnuah ni 10.06.2025 khan Forest Clearance approval kan hmu a ni,” tiin tunah hian Boundary wall 85% leh Land development Works 60% zawh tawh a nih thu a sawi bawk.

Serchhip District chhunga Green Herd SP ten bawlhhlawh lakkhawm leh sawngbawl hna an kalpui mek dinhmun leh harsatna an neih te chu nimin khan Serchhip Town Sanitation Task Force thukhawm chuan an sawiho.

Games & Sports Association (GSA) Hualtu buatsaih Zonuntluanga Memorial Football Tournament, Running Trophy 2026 khelh zawh takah Zorempuia FC, Hualtu chu an Champion.

Serchhip District Commission chuan tunhnai khan Cinsumers ten harsatna an thlen ah thuremna tichhuakin KIFA Company dintute chu an hnuaia hnathawk, Serchhip Darnam Veng ami hlawh an pek kim loh Rs. 21,000/- chu pek luihtir an ni.

Bharat Mandapam (Pragati Maidan), New Delhi-a ‘The India AI Impact Summit 2026’ neih mek denchhena ‘BHARAT-VISTAAR’ hawnna chu niminpiah khan Union Minister for Agriculture & Farmers’ Welfare Shivraj Singh Chouhan hovin neih a ni a, he hun hi KVK Serchhip pawhin North Vanlaiphai-a KVK Complex atangin biakhmuh theihna hmanga lo zawm a ni.

Mizoram Journalists’ Association (MJA) Serchhip District hruaitute chuan nimin khan an President, Kapliana Pachuau hovin Serchhip District Bawrhsap Paul L. Khuma chu a Pisa-ah an kawm a. He hunah hian MJA hruaitute chuan District chhunga sawrkarin mipuite tana hna a thawhte mipuiten an hriat a, mipuite tana thawktu sawrkar Department-ten an hnathawhna kawnga harsatna an neihte pawh hriatpui tura hmalak an tum thu te, sawrkarin mipuite tana hna a thawhna kawnga tangkaina an neih chuan sawrkar pui tura an inhawn reng thu te an sawi a. Bawrhsap pawhin District chhunga sawrkar hmalakna hrang hrangte sawi langin, heng hnathawh te hi vilpui tur leh a tha tawk lo te chu a hnena thlen thin turin a lo chah bawk a ni.

Agriculture Minister PC. Vanlalruata chuan nikum lama Sawhthing a leina-a sum chingpen nia sawi chu sum pekchhuah hmaa hum hman a nih avangin hmuh let tur a awm lo tih a sawi a. “Secondary Collection Centre thenkhat atangin Sawhthing hralhna data dik lo upload vanga Sawrkar Price support pek tur pung ta hluai kha a ni,” a ti.

Nimin-a Mizoram Legislative Assembly thutkhawm zawhna leh chhanna hunah East Tuipui Bialtu MLA Ramthanmawia chuan a Bial chhung khaw pathumah ZPM chauh sawrkarin a leisak dawn nia sawi a awm tih sawiin, Chief Minister Lalduhoma chuan bawhzui a nih tur thu House a hrilh.

Social Welfare Minister Lalrinpuii'n ruang phurhna an ruahman hnuah ruang phurh nan Rs. 197,78,002 an seng tawh tih a sawi.

Chief Minister Lalduhoma’n tunhnaia Assembly Petition Commission thutlukna Speaker hnena thehluh a leak out chungchangah a thehluttu Member chu Committee on Privileges hmaa din tir a duhsak lo tih sawiin, Speaker nena tha taka an sawi tlang thei a nih chuan tihtawp tha a tih thu a sawi.

Congress Thalai chuan Aizawl Chawlhhmun-a Chief Minister Lalduhoma Insak chu nimin khan a hmunah an tlawh MPYCC te chuan he In sak mek hi Chief Minister fapa Ruata ta niin a inziak tih sawiin, SBI hnuaia UNNATI Scheme hnuaiah nikum 2025-ah loan an la niin sawi mah se thudik lo a nih thu an sawi a, UNNATI hnuaia Subsidise dil hi mi 16 awm tawhin mi 3 approved tawh zingah Lalduhoma fapa hming a tel lo a, dilna 4 hnawl a ni a, dilna lut thar a awm bawk tih an sawi a ni. MPYCC chuan UNNATI chu loan la ten an loan lak zatve an hmuhlet leh theihna Scheme a nih thu leh mi pakhatin vbc. 250 thleng an la thei tih sawiin, “Pu Lalduhoma’n loan awlsam taka lak theih anga sawia thalaite pawh ti ve tura a sawi hmuh hi thil ngaihthlak nuam tak niin lang mah se mi bik tan lo chuan tih ve mai mai theih a ni lo,” an ti a. Chief Minister la ni rei lo ber Lalduhoma’n Mizoram Chief Minister lo ni tawh zawng zawng hausakna a khum thuai dawn niin an ngai tih an sawi bawk.

Social Welfare Minister Lalrinpuii chuan Sethawn-a ruihhlo ngaite enkawlna Jordan Centre enkawlah Synod ngaihchan mek an nih thu sawiin, “Ruihhlo do kawngah sawrkar a tang nasa hle,” a ti.

Mizoram Legislative Assembly-a MNF Member leh Opposition Leader Lalchhandama Ralte chuan Mizoram Civil Service Combined Exam 2025 result lo chhuak enthat ngaia awm chuan Mizoram sawrkar chu sawrkar tha leh chak a ni tak tak em tih zawhna a siam tir niin a sawi.

Chief Minister Lalduhoma chuan, Lengpui Airport chhehvel ram Indian Air Force hnena leitir chungchangah MNF sawrkarin hma a lo lak tawh chu a diklo tih hre lovin an lo hmalak tawhna ti danglamin a pulunga hralh lovin hawhtir, Lease System in an kalpui tih nimin khan Assembly House-ah a sawi a, Preliminary Notification awm hmaa rate an lo tifel chu a diklo an tih thu leh a pulunga hralh tur chu titawpin, Preliminary leh Final Notification hi an chhuah a, a ram man dawngtu leh a commission tu ten an dawn hi khawihah nge a kal tak ang tih chu CBI in a chhui dawn tih a sawi a, “Session-a lo sawi a ngai lova, an chhui chhuak mai ang,” a ti bawk.

Mizoram Legislative Assembly pakuana thutkhawm vawi 6-na neih ah Mizoram sawrkar a Minister hlui boral ta, ST. Rualyapa leh MLA hlui boral ta, KL. Rochama te sunna hun hman a ni a, he hunah hian House Leader Lalduhoma chuan an chanchin tlangpui tarlangin, ani bakah hian Oppostion Leader Lalchhandama Ralte, BJP MLA Dr. K..Beichhua, Congress MLA C. Ngunlianchunga leh MNF MLA Dr. R. Lalthangliana te pawhin an ui thu an sawi a, anmahni sun nan ngawi rengin minute khat an ding a ni.

Mizoram Board of School Education (MBSE) chuan Vawiin, February 19, 2026 chawhnu dar 2:00 hian nikum December thlaa Diploma in Elementary Education (D.EI.Ed) Examination, 2025 a buatsaih result tihchhuah a tum a, result hi MBSE Office-a tarchhuah bakah leh MBSE website www.mbse.edu.in-ah en theih in a awm ang.

Agriculture Minister PC. Vanlalruata chuan kum 2025-2026 chhungin Agriculture Link Road siamna atan cheng vbc. 59.22 hmuh a nih thu nimin a Assembly Inkhawm-ah MNF Member Prova Chakma zawhna chhangin a sawi a, “Sum hmuhna te chu NABARD RIDF atangin cheng vbc. 49.18, SASCI atangin cheng vbc 2.70 leh NMEO-OP atangin cheng vbc 7.343 a ni,” a ti a. Sum hmuh te hi kawng awmsa Plain Cement Concrete Pavement-a siamna tur leh kawng thar laihna turte an nih thu a sawi bawk.

Jammu & Kashmir tlawha zin mek Mizo-ram Chanchinbu mite chuan nimin khan CSIR-Indian Institute of Integrative Medicine, Pulwama tlawhin Thlai hmanga damdawi leh rimtui siam chhuah zirtirtu, mithiam ten an lo dawngsawng a. Lavender, Rose, Nihawipar, Rosemary leh thlai hrang hrang atanga an thil siamchhuah dan leh hmalak dante an lo hrilh a. Kashmir chu Thlai leh Pangpar hmunpui a an siam thu leh chumi ni tur chuan theihtawp an chhuah chhunzawm zel thu an sawi bawk.

Directorate of Information & Public Relations buatsaih Film tawi insiamsiakna ‘Mizoram Short Films Competition 2026’ chu nimin khan endik tan a ni a, he Film insiamsiak ah hian Film 41 thehluh niin Mizo film Insiamsiak awm tawh zawng zawngah tel an la tam ber tum a ni. Ruahman dan chuan February ni 24 hian Mizoram Short Film Competition 2026-a ti thate hnenah lawm-man semna hun hman a ni ang.

Economics & Statistic Department chuan thuchhuah siamin tunhnaiah Registrar General of India (RGI) Office chuan CRS Portal atanga thla khat chhunga Digitzed Birth leh Death Certificate pekchhuah theih zat bituk a rawn siam thar thu leh hei vang hian Digitized Birth leh Death Certificate chu tunhma angin siam nghal zung zung a harsa ta tih an sawi a. Hetihlai hian mipui lam atangin Digitized Birth leh Death Certificate mamawhna sang chho zelin District hrang hrangah Economics & Statistics Office chuan Digitized Certificate dilna an dawn tam thu sawiin, Digitized Certificate dil hun chhung (pekchhuah theih hun chhung) a rei lo thei ta lo tih an sawi a, mipuiten harsatna an tawk chu pawi an tih thu leh mipuite hriatthiamna an ngen thu an sawi bawk.

State Institute of Rural Development & Pan-chayati Raj (SIRD&PR) buatsaihin nimin khan Mamit LAD Conference Hall-a Mamit khawpui chhunga Sawrkar Office hnathawk te tan hna thil atana tul hrang hrang zirhona neih a ni a, he Training hi Mamit Addl. DC Carolyn L. B Khiangte chuan khuallian nia hawngin an mamawh em em zirhona hun SIRD&PR ten Mamit-ah ngei kalchilha an buatsaih chu lawmawm a tih thu a sawi a ni. He hunah hian Office hna atana tul hrang hrang te Dr. C Lalthlansanga, Core Faculty, SIRD&PR chuan a lem nen zirtirin K. Lalmuanzova, AF, SIRD&PR chuan CCS Conduct Sules chungchang ah zirtirna a pe bawk a ni.

Serchhip District Commission chuan Consumers ten harsatna an thlen ah thuremna tichhuakin KIFA Company dintute chu an hnuaia hnathawk, Serchhip Darnam Veng ami hlawh an pek kim loh Rs. 21,000/- chu pek luihtir an ni.

MIZOFED-a thawktu thenkhat ten ekyc a inziahluhna man an lak sak nia sawi chungchang chu nimin khan Serchhip-ah Bawrhsap hovin sawiho a ni.

Games & Sports Association (GSA) Hualtu buatsaih ‘Zonuntluanga Memorial Football Tournament Running Trophy 2026’ chu Hualtu Playground-ah khelh mek niin nimin khan Semi Final khelh a ni a, Zorempuia FC, Hualtu chuan Lalbuki & Saikaithanga Memorial FC chu 4-2 a hnehin Final an lut a, Venghlun FC, Chhingchhip ten Lalhlimpuii FC, Hualtu chu 4-3 a hnehin Final an lut bawk. Vawiin hian Final khelin zawhfel a ni ang.

Mizoram Public Service Commission (MPSC) chuan MCS (Combined Competitive) Examination, 2025 Final Result chu nimin khan tichhuak tharin Panel List-a awm pakhat a tling thar.

Mizoram Larsap Gen. Vijay Kumar Singh chuan ram hruaitu thiam tak te kaihhruaina hnuaiah Mizoram chu remna leh muanna awmna hmun a ni chhunzawm zel tih sawiin, Mizoram Legislative Assembly rorelna kalphung zahawm tak vawnhim kawnga sulhnu duhawm tak neih tawh thin chu chhawmnung zel turin assembly Member te a sawm bawk.

Cheng vbc. 43.83 senga Tawng lui Lengte kai-a Lei dawh thar, ‘Faith Bridge’ tia hming vuah chu nimin khan Chief Minister Lalduhoma chuan a hawng.

Lai Autonomous District Council (LADC) a MNF leh Congress thawkdun United Legislature Party (ULP) Sawrkar-a Deputy Chief Executive Member (CEM) leh Executive Member mi 8 te chu nimin khan Lawngtlai Bawrhsap Donny Lalruatsanga chuan rinawmna thu tiamtirin a lalut.

Mizo Students’ Union (MSU) hruaitute chuan tun thlenga College Zirtirtu qualify lo ten zirtirna an la pe chu pawi an tih thu an sawi.

Mizoram Pradesh Congress Committee (MPCC) thalaite chu nimin khan Aizawl-a Vanapa Hall kawt-ah pungkhawmin Electric Bill sang avanga mipui thlavang hauhin hun an hmang a, Electric Bill sang tak xerox copy chu an duhlohna lantir nan an hal. MPYCC te chuan ZPM sawrkar chu Electric Bill tisang lo tura an intiamna bawhchhia ah puhin Electric bill an tisang chu mipui te zahlohna leh palzutna niin an sawi a. He hunah hian MPYCC Senior Vice President Ngurdingpuia Pachhuau chuan nikum kum tawp lam atanga ZPM sawrkarna hnuaia uchuak taka Electric Bill sang avangin mipui te thlavang hauh nan punkhawm an huaihawt tih sawiin, mipuite eng chhit leh bill chawi a inmil loh nasat avangin chhungkaw tam tak an buai phah tih a sawi a, ZPM sawrkar chuan mipuite ah chhiah lak dan ringawt a zawng nia sawi bawkin, mipui harsatna sutkian ni lova Mizoram Rohlu hralh a ni zel chu pawi an tih thu an sawi a, Tuirial Hydel Project pawh hralh tuma hmalak mek nia sawiin, Mizoram rohlu leh hmun pawimawh hralh chu an ...

Sawrkar laipui, Ministry of Corporate Affairs Secretary Deepti Gaur Mukerjee leh Officer rualte chuan niminpiah khan Mizoram Sawrkar hotute kawmin Prime Minister’s Internship Scheme (PMIS) chungchang an sawiho.

Mizoram-a Rural Development (RD) Block 12-a Self Help Group (SHG) Member-te hman tur lirthei 19 (Mahindra Pik Up 17 leh Maruti Super Carry 2) te chu nimin khan hlanna neih niin he hun hmanpuitu Rural Development & Administration Department Minister Prof. Lalnilawma chuan heng Motor te hi a vailiam a ni.

Mizoram Larsap General VK. Singh chuan CM's Special Package chu a dawngtu an tam zawk theih nan Rs. 50,000-ah tihhniam a nih thu a sawi.

Aam Aadmi Party (AAP) Mizoram hruaitute chuan ZPM kaihhruai Mizoram sawrkar chu anmahni intiam ang ngeia kalphung thara kal tura an phût thu thuthar lakhawmtute hnenah sawiin, Party mi leh sa duhsakna uchuak ang chite chhawmnung zel tawh lo tura an ngen thu an sawi bawk.

Mizoram khawpui Fai Inelna 2025-a lawm-man pakhatna dawngtu Siaha chuan nimin khan an lawmman lak hi MADC Golden Jubilee Hall ah an lawm a, he hun hi MADC-a CEM, M. Laikaw leh Siaha Bawrhsap VL. Hruaizela Khiangte ten an hmanpui a ni.

Power & Electricity Department chuan Smart Meter hman a nih avangin Electric Bill a san phah loh thu an sawi. Nimin khan P&E Department changtu Commissioner K. Lalrinzuali hovin Smart Meter hmanga Automatic Billing kalpui tan mek avanga Electric Bill tam anga thuthang awm chung-chang sawiho a ni a. He thutkhawm a thuchhuakin a tarlan danin Electric Meter Reading chu mihring (Meter Reader) hmanga reading lak a nih hian an reading lak chu Office-ah an thehlut leh a, Office Bill siamfel hun chhung hi thla khat (1) vel a ni thin a. Consumer hnena Bill semchhuah leh a nih meuh chuan thla khat a lo liam tawh thin avangin Consumer in thla khat hnuah Bill a hmu chauh thin tihna a ni. Smart Meter ah chuan GPRS hmanga reading lak nghal a nih avangin reading lak rualin Bill siam nghal theih a ni a, Bill a san phah lo tih an tarlang a ni.

Mizoram Legislative Assembly 9-na thutkhawm vawi 6-na leh Budget Session ni bawk chu nimin khan neih tan a ni ta a, thla thar March 16 thleng a awh ang.

District Hospital, Serchhip-a Dialysis khawl bun tawh chu hman a nih theihna turin Technician dah a ni dawn nia thudawn a ni. District Hospital Serchhip-a Dialysis khawl hi bun fel tawh niin Nurse pahnih te chuan Training an nei zo tawh a, Technician dah la ni lo mah se Bialtu MLA leh Chief Minister Lalduhoma chuan MLA Fund atangin Technician hi a ruai dawn nia thudawn niin Vanlalrengpuii Kawlni, P&E Veng Serchhhip chuan nimin khan Joining Report a pe a ni. Ser-chhip-ah hian Dialysis khawl hi pahnih bun niin Serchhip-ah hian Dialysis tih ngai hi mi 40 vel an awm mek nia hriat a ni bawk.

Serchhip District NCORD Committee chu nimin khan an Chairman leh Bawrhsap Paul L. Khuma hova thukhawmin ruihhlo dona kawnga an hmalakna te thlirlet a ni.

Kawngpui tha duhna avanga din, JAC on National Highway, Kolasib bultumin nimin khan Kolasib Diakkawn YMA Hall kawt atangin mi thahnem takin Fur ruahtui tlak hmaa Mizoram ei leh bar lakluhna kawngpui siamthat phutin kawng an zawh a, he kawngzawh-a tel te chuan Kolasib District chu kawng hrang hrangin hlamchhiah an nih thu sawiin, kawngpui chungchangah District thuneitu te bakah NHIDCL leh an hnuaia Contractor te pawh tum engemawzat an thutkhawmpui tawh thu sawiin, heng hian awmzia a neih loh thu an sawi a, Contractor te chu heng huna an intiam anga an awm zui ngai loh thu leh hmasawnna hmuh tur a awm loh thu te tarlangin, NHIDCL General Manager BK Srivastava chu Mizoram chhuahsan tura an duh thu an tarlang bawk a ni.

Bana Kaih Scheme hnuaiah February ni 10, 2026 thleng khan chhungkaw 384 hnenah loan cheng vbc. 34.038 pekchhuah a ni tawh a, CM Special Package hnuaia pawh Progress Partner thlanchhuah mi 2713 hnenah cheng vbc. 22.625 pekchhuah a ni tawh bawk.

Sawrkar kum kal mekah Mizoram Universal Health Care Scheme (MUHCS) atana cheng vbc. 154 hmuh ni tawhin damlo enkawlna Bill pekchhuah cheng vbc. 126 a tling tawh.

Lawngtlai District Bawrhsap Donny Lalruatsanga chuan Lawngtlai AOC Veng-a cheng Lalramsanga thihna chungchang ah thilsual titu te chu ramdang mi ni mah se hremna pek ngei an nih theihna tura hmalak a nih tur thu a sawi.

MNF Party chuan Aizawl Municipal Corporation (AMC) Inthlanpui lo awm tura an party Candidate tur puanna Inkhawm nimin khan neiin AMC Bial 19-a an Candidate tur puanchhuah an ni.

Mizote siamchhuah leh kutchhuak thil chi hrang hrang zawrhna website MadeByMizo.com chu nimin khan Commerce & Industries Department changtu Minister F. Rodingliana chuan a tlangzarh.

Mizoram sawrkarin Natuional Insurance Company (NIC) thawhpuia ranvulhtuten an ranvulh te an thih palh pawha sum an hmuh theihna tura February ni 10, 2026-a 'Animal Insurance' a tlangzarh chu a taka kalpui turin thla thar, March thla tir lam atangin District tinah Vety Officer te tan training buatsaih a ni dawn.

Aizawl Bungkawn Veng thalai te chuan nimin khan ‘CID Tlang’ a CID thawkte pisa kai tur hmuh turin Peaceful Sitting Demonstration an nei a, helai hmun atang hian CID te chu chhuak tura an duhna thuziak hrang hrang an pholang a ni. Bungkawn Veng thalaite chuan kum tam tak kaltaa an pi leh pute hma lo lak tawhna CID Tlang chu Ceng mipuite tana insawizawi nan leh an tu leh fate lo awm tur tana hmunhma tha tak neih nan an duh avangin CID te chu chhuak tura an duh thu hi an sawi a. CID Tlang chu Vantlang kut-a a luh theihna turin hun rei tak hma an lo lak tawh thu sawiin, CID Tlang chu tunhmaa a hming 'Dokhama Tlang' tih puttir leh ngei an tum thu an sawi bawk.

Mizoram Civil Services (Combined Competitive) Examinations-2025 Final Result chu siamthat a ni dawn.

Central sawrkar in MGNREGA a kalpui mek tunhnaia G-RAM-G hmanga a thlak tak chungchang ah Mizoram Pradesh Congress Committeee (MPCC) President Lal Thanzara chuan nimin khan Prime Minister Narendra Modi-a hnenah lehkha thawnin MGNREGA hi a ngai bawka kalpui leh tura ngenna a thlen.

ZPM Legal Board chuan nimin khan Assembly Speaker Lalbiakzama hnenah Dec. 22, 2025-a MLA, Er. Rohmingliana’n ‘Assembly Committee on Petitions’ aiawha Report/Recommendation a thehluh chungchangah Assembly House dan kalh leh tih dan phung pela report a thehlut nia lang chhuifiah tura ngenna an thehlut.

Mizoram Youth Commission (MYC) chuan nimin khan Aizawl-a an Pisa-ah MYC Group B leh C leh MCS Combined Coaching Class-a an Zirtirtu mi pahnih, tun tum MCS Combined Result chhuaka MCS leh MPS-a tlingte lawm-puina hun an hmang a. he hunah hian MYC Chairman Malsawmzuala Ralte chuan Coaching Class Zirtirtu mi pahnih te a lawmpui thu sawiin, MYC Coaching Class chu thalai hna zawng mek ten zawm zel se a duh thu a sawi bawk. MYC in an lawmpui te hi MCS Combine Exam-a 8-na ni a MCS-a tling Lalruatfela, Serchhip leh 20-na nia MPS-a tling K. Lallungmuana, Khawbel (Serchhip District) te an ni.

Chief Minister Lalduhoma chuan an sawrkar chhungin First Formulation bika Pension chinfel tawh zat chu 25,038 a nih thu leh sawrkar hmasa hun chhung khan Pension case chinfel 974 a awm thu Social Media kaltlangin a tarlang a. Chief Minister chuan Pension hlawh siamthatna (First Formulation - Revision of Pension/Family pension of Pre 2016 pensioners/family pensioners based on 7th Pay Commission) ah hma an lak nasat thu tarlangin, Pensioner leh an chhungte tam takin he pension hlawh punna hi an chhawr tawh niin a sawi a. Hetiang taka hma an sawn theihna chhan chu Directorate of Local Fund Audit & Pensions thawktute thawhrim vang niin an chungah lawmthu a sawi tih a tarlang a. An zarah an vanglai hun tha sawrkar tana hmang raltu pensioner ten an pension pung an lak theih phah a ni, a ti bawk.

 

Mizoram Civil Services (Combined Competitive) Main Examination, 2025 result chhuaka Mizoram Civil Service (MCS)-a tling Lalruatfela S/o Rohmingliana, Serchhip Bazar chu Inrinni khan Serchhip Kawnpui South Branch YMA huaihawtin khawtlang huapa lawmpuina leh chawimawina hun buatsaih a ni.

Nimin khan Chhingchhip dai-ah Buhfai phur truck pakhat chesualin kawngthlang ah a tlan-liam a, he Motor khalhtu Gospel Lalhmingthanga chu vanduaina thlenna hmunah a boral.

Serchhip-a Excise & Narcotics Department chuan Zirtawpni kalta chhun dar 12:40 khan New Serchhip-ah Heroin nia hriat gram 7.50 manin a neitu nia hriat Lalbiakdawla (49), New Serchhip Bazar Veng nia inchhal pawh man nghal a ni a. Hemi ni vek tlai dar 3:30 vel khan Linda Lalremruati (40), New Serchhip Venglai nia inchhal hnen atangin Heroin nia hriat gram 5.56 chu an man leh bawk. Heng Heroin nia hriat kaihhnawih a man te hi ND&PS Act hnuaiah thubuai siam sak an ni a, Inrinni khan Court-ah hruai an ni. Heng mi pahnih te hi Heroin kaihhnawih ah man an lo ni fo tawh niin thudawnna chuan a sawi bawk.

Mizoram Universal Health Care Scheme (MUHCS) policy kal lai chu kumin March ni 31-ah a tawp dawn avangin inziahluhna hun hawn tan a ni leh dawn ta a, April ni 15, 2025 thleng MUHCS 2.0-a inziah luhna hun hawn tur niin March 1 atangin offline-a inziahluhna hun hawn leh tura ruahman a ni.

Mizoram Legislative Assembly Budget Session chu naktuk-ah neih tan a ni dawn a, inbuatsaihna peihfel a ni tawh. Ruahman lawk ang chuan naktuk chawhma dar 10:30-ah Assembly thutkhawm hi tan tur niin thutkhawm tan ni hian House-ah Larsap in thu a sawi anga, Larsap thusawi a lawmthu sawina Motion chu pulut nghalin hei hi Nilaini-ah sawiho tur a ni ang. Sawrkar kumthar 2026-2027 atana Mizoram Budget chu Feb. 26-ah Finance changtu Chief Minister Lalduhoma chuan a pharh ang.

Kumin hian Valentine's Day pualin Mizoram-a Blood Bank hrang hrangah mi tlawmngai ten thisen Unit 614 pein Serchhip-ah pawh Unit 34 pek a ni.

India Hmarchhak-a Cancer Doctor rual intawhkhawmna, Association of Oncologists of Northeast India (AONEI) Annual Conference vawi 21-na chu Zirtawpni zan atang khan Aijal Club-ah neih niin nimin khan zawhfel a ni.

Inrinni khan ‘2nd Aizawl International Half Marathon’ (AIHM) chu Aizawl Mualpui-a Rajiv Gandhi Stadium-ah neih niin a bul tanna leh a kharna chu Larsap General (Dr) Vijay Kumar Singh chuan a hmanpui a ni.

Higher & Technical Education Minister Dr. Vanlalthlana chuan MPSC Combined Exam a hlawhtlina chang te chu Mizoram-a IAS awmte kawmngeih a, thawhhona tha tak neih pui turin a chah.

Labour Employment Skill Development & Entrepreneurship (LESDE) Department buatsaiha Aizawl Lammual-a neih ‘LESDE Kut 2026’ chu Inrinni khan zawhfel a ni a, a kharna hun hi LESDE Department changtu Minister Lalnghinglova Hmar chuan khuallian niin a hmanpui a ni.

January 28, 2026 atanga Parliament Budget Session neih chu Inrinni khan a thawh khatna atan zawhfel a ni ta a, thla thar March 9-ah tan lehin April 2 thleng neih leh a ni ang. Parliament thutkhawm thawh khatna hi thla kalta January ni 28 khan President Droupadi Murmu-i’n House pahnih hmaah thu sawiin a tan a, thutkhawm kal mekah Union Finance Minister Nirmala Sitharaman chuan Union Budget pharhin, Zirtawpni khan Rajya Sabha-ah Union Budget chungchang a sawifiah a. India chu ram intodelh leh rualkhai zawka hmasawnna a awm theihna turin sawrkar chuan hma a lak nasat thu leh ram sum leh pai dinmun pawh a than chak thu a sawi a. Ram chhunga hna nei a tlakhniam thu a sawi bawk.

Ministry of Minority Affairs changtu Union Minister of State George Kurian chuan Inrinni khan Siaha District tlawhin Siaha-a BJP District Office sakna tur lungphum a phum a, he building sakna atan hian sum lamah buaina a awm dawn loh thu sawiin, DPR anga sak a nih dawn thu leh BJP Siaha District mamawh ang zelin sak a nih dawn thu a sawi bawk a ni. BJP Siaha District Office Building tur hi chhawng 6 a sak tur a ni a, kum khat chhunga sak zawh tura ruahman a ni. He Building sakna tur lungphum a phum zawh hnu hian CEM Bungalow-ah MADC hotute leh BJP Siaha District hruaitute kawmin BJP Mizoram President Dr. K. Beichhua chuan a tawiawm a, tlai lamah Delhi a pan leh nghal a ni.

Kum 1993-a Mizoram Legislative Assembly Inthlanpui-a Sangau Bial atanga thlantlin leh Congress sawrkar-a Minister of State ST. Rualyapa, tuna Aizawl Khatla-a khawsa chu Inrinni khan kum 91 mi niin Cancer vangin a boral a, a ruang hi lumen a nih hnuah nimin khan vuiliam a ni.

Hachhek Constituency Development Committee (HCDC) chuan an huamchhunga PMGSY sum hmanga kawng siam mek, Luimawi to Thinghlun leh Zamuang to Bairabi te chu Zirtawpni khan a hmunah an enfiah a, heng kawng siam hna te hi March thla chhunga zawhfel tur niin Luimawi to Thinghlun kawng chu an zawhfel rin a nih thu leh Zamuang to Bairabi erawh an zawhfel ve hman a rinawm loh niin an sawi a. Zamuang to Bairabi kawng siam mekah hian GSB an phah ah lei an pawlh nasa nia sawiin, hetiang ang hian GSB phah tawh lo turin Contractor chu an hrilh bawk.

Mizoram Chief Secretary Khilli Ram Meena chuan Zirtawpni khan Maharashtra Chief Secretary Rajesh Aggarwal chu Mumbai-a a Pisa-ah tlawhin, Navi Mumbai (Vashi) hmuna Mizoram House sak tur chungchang a sawipui a. Kum 2008 khan Mumbai-a City and Industrial Development Corporation (CIDCO) chuan Vashi, Mumbai-ah hian ram, SqM 1983.48 zet chu Mizoram State Guest House cum Emporium atan hmun a lo ruahman tawh a. CIDCO leh Construction Agency te inkara rokhawlhna eng engemaw a awm avangin a sak hna hi engemaw chen tih khawtlai a ni tawh a ni. Zirtawpni-a State pahnih Chief Secretary te inkawmna ah hian Mizoram Chief Secretary chuan Maharashtra Chief Secretary hnenah hian sak tan hun chu kumin March ni 31 thlenga hrethiam hram tur leh sak hna khawtlai avanga chawi tur chu ngaihtuah thatsak turin a ngen a. Rajesh Aggarwal chuan CIDCO hotute pawh a be nghal bawk a ni.

Serchhip District-a tlawmngai pawl hrang hrang panga te telna, NGO Coordination Committee chuan Central sawrkar in India leh Myanmar ramri hung a tumna chu an thlawp thu an sawi.

February 14-a ‘Valentine's Day’ hman thin denchhenin nimin khan DIET Serchhip-a Training mek te chuan Serchhip Blood Bank-a dah turin thisen Unit 34 an pe.