MUHCS 1.0 leh 2.0 ah danglam lutuk a awm lo

Mizoram Universal Health Care Scheme (MUHCS) 2.0-ah Pensioner tih loh, Sawrkar hnathawk nghet, mi nawlpui leh Golden Card neite tan thil thlak danglam a awm lo a, Mizoram sawrkar hnuaia thawk mek All India Service leh Central Service ten MUHCS 2.0 an zawm ngei a ngai tawh dawn thung.
Finance Secretary Ramchuana chuan nimin-a a pisa-ah thuthar theh-darhtute a kawmna ah MUHCS 1.0 leh MUHCS 2.0 danglamna te sawiin, MUHCS 2.0-ah chuan Sawrkar hnathawk nghet bakah mi nawlpui leh Golden Card neite tan thil thlak danglam a awm lo a, mi nawlpui te 'Contributory' ti-a sawi thin chu 'General' tia thlak a ni a, CSS hnuaia thawkte tan kum khatah vawi hnih (2) Contribution pek phalsak an ni a, MUHCS 2.0-a danglam lian ber chu Pensioner-te tana siam Category A leh B paih bo niin, thla tin Rs. 1000 theuh an thawh a ngai tawh dawn a ni.

Mizoram Universal Health Care Scheme (MUHCS) 2.0 hi All India Service (AIS)/Central Service (CS) zinga Mizoram sawrkar hnuaia thawk mek ten an zawm ngei a ngai tawh dawn a, an thla tin contribution zat leh hamthatna chu Mizoram sawrkar hnuaia thawkte ang tho a ni dawn a. AIS leh CS pensioner te chuan Mizoram chhungah chauh MUHCS an zawm thei a, State pawnah erawh CGHS zawm duh tan an zawm thei thung a ni.

An hamthatna leh contribution zat chu Civil Pensioner Scheme anga kalpui tur a ni a, hetihlai hian vawi khatah Contribution pek tlak nghal vek tur a ni a. State pawna inenkawlna atana an zinna senso tumsak an ni dawn lo a ni. MUHCS zawmtute chu khawi Category-ah mah awm kawp phal a ni lo a, awmkawp te chu System lamin a paih zel dawn a. Non-Empaneled Hospital-ah refer theih dan khauh zawka siam a ni bawk.