School tan hmain Textbook pekchhuah a nih thu sawi

Directorate of Printing & Stationery chuan Academic Session tan hmain Textbook-te Samagra leh Textbook Dealer-te hnenah hlan vek a nih thu sawiin, District zawng zawnga zirlaite hnenah sem a nih theih nan Mizoram chhunga District tinah heng zirlaibute hi thlen hman vek a nih thu an sawi.
Nimin-a thuchhuah an siamah Academic Session 2026–2027 atana State Council of Educational Research and Training (SCERT)-in a buatsaih School Textbook-te siam leh sem chhuah hna chu a hun takah zawhfel a nih thu Directorate of Printing & Stationery chuan tarlangin, SCERT School Textbook siam hna hi Department of Information & Public Relations, Printing & Stationery (IPRP&S) hnuaia Directorate of Printing & Stationery kuta awm niin, a ngaihven leh a tihhlawhtlin hna tha takin hlenchhuah a ni tih an tarlang a. “He hmalakna hi School Textbook Quality siamthatna kawngah hmalakna thar pawimawh tak niin Textbook Cover Lamination pawh tih tel chhoh a ni ta a. Hei hi a hmaa tih ngai loh a ni a, a hma aiin a senso sang deuh mah se zirlaite tana hman tlak leh deih rei zawk tur a a nih avangin a tangkai hle a ni,” an ti.

Academic Session 2026–2027 atan Textbook Print Order hi SCERT atangin kum 2025 kum tawp lamah dawn a nih thu pawh an thuchhuah ah hian tarlangin, “Soft Copy Final chu 2026 kum tîr lamah peihfel a ni. Hetihlai hian Academic Session hun hi April thla atangin March thla ni 23-ah sawn a nih tak avangin School tan hma ngeia Textbook-te siam zawh hman a tul hle a. Academic Session sawn hma a nih tak avang hian School Textbook a hma lama peihfel tumin Directorate of Printing & Stationery chuan hmalakna chak takin a la a. Hun chep tak karah Dummy Copy siam, Proof Reading, Correction leh a tul dangte rang taka thawk nghalin, Textbook Print, Binding leh Lamination hna zawng zawng chu Session tan hma ngeiin an zofel ta a ni,” tiin District tin a thlen hman thu an sawi bawk a ni.