India ram Chhiarpui 2027 neih tan a ni ta

India ram Chhiarpui 2027 chu nimin khan neih tan a ni ta a, nimin zing khan Chief Minister Lalduhoma chuan a chenna In-ah Census of India 2027 Phase-I (Houselisting leh Housing Census) Self-Enumeration tiin he Chhiarpui hi Mizoram-ah chuan tan a ni.

Chief Minister hi Directorate of Census Operations, General Administration Department leh Aizawl Municipal Corporation Officials pawimawhten tawiawmin Chhiarpui an kalpui zuina turah duhsakna a lo hlan a. Census of India 2027 hi thawh hniha kalpui tur niin Thawh hmasa zawk, Houselisting leh Housing Census hi April 1, 2026 atanga tan a ni a. Thawh hnihna, Population Enumeration hi February 2027-ah neih tan tur a ni a. Tun tum Census hi Digital hmanga Census kalpui hmasak ber tur a ni dawn a, mahni-a Self-Enumeration tih theih a ni.

Self-Enumeration hi April 1 atanga April 15, 2026 thleng neih tur niin, April 16 atanga May 15, 2026 thleng House Listing leh Housing Census Mizoram pumpui-ah kalpui a ni anga. Mahnia inziaklut turte chuan Official portal (se.census.gov.in) ah mobile phone hmangin inziahluh theih a ni a. Form submit hnuah Self-Enumeration ID (SE ID) a lo chhuak (generate) anga, hei hi Enumerator-te an lo kal hunah lo pek tur a ni.

Chief Minister a inziahluh hnu nimin zing dar 9:30 khan Home Minister K. Sapdanga pawh a chenna Inah a inziaklut a, PWD Minister Vanlalhlana pawh zing dar 9:00-ah a inziaklut bawk a. Chhiarpui 2027 hi India ram pum Chhiarpui vawi 16-na a ni a, India ramin zalenna a neih hnua a vawi 8-na a ni bawk. Chhiarpui hnuhnung ber chu kum 2011 kha niin, kum 2021 khan hripui Covid-19 vangin chhiarpui hi neih theih a ni lo thung a ni.