Sihphir-a Urea hralh ruk leh dan lova pekchhuah chungchangah insawifiah turin hriattirna pe

Mizoram State Agriculture, Horticulture and Marketing Cooperative Federation (MAHFED) Ltd. chuan a man pangngai aia to zawka leitha hralhtu nia sawi, M/s Zekyl Enterprises chu insawifiah turin a hriattir.

Mizoram sawrkar thuchhuah tarlan danin, MAHFED Ltd. in thu dawn danin Sihphir leh a chhehvelah Fertilizer (Control) Order, 1985 kalhin Urea hralh ruk leh dan lova pekchhuah a awm ni a hriat a ni a. He thudawn bawhzui hian Managing Director, MAHFED Ltd. chu March 20 leh March 23, 2026 khan Sihphir-ah kalin a hmun ngeiah enfiah in leitha pekchhuah a nih dan zirchianna leh kuthnathawktute nen a inkawmna an nei nghal a. Heng te atang hian a mamawhtute tana sawrkar in man tlawm zawka Urea a pek chhuah thin chu sawrkar bithliah, Kg 45/bag khat Rs. 260.40 aia sang tak, bag khat Rs. 450 te a hralh a ni tih hriatchhuah a ni.

He thil hian Fertilizer (Control) Order, 1985 Clause 3(3) a kalh bakah Essential Commodities Act, 1955 hnuaiah hrem theih a ni a, hetianga Urea hralhna ah hian M/s Zekyl Enterprises chu inhnamhnawih nia hriat niin, he Enterprises hian Fertilizer (Control) Order, 1985-in a phut lehkha pawimawhte pawh a neilo ni a hriat a ni a; Hei hian a chung a tarlan tak Dan (FCO 1985) Clause 7 chu a kalh bawk a ni.

Heng zawng zawng thlir chung hian MAHFED Ltd. chuan hma la nghal in, a chunga tarlan tak Cooperative Society hnenah hian Show Cause notice a pe nghal a. Thuneitute nen tangrual in M/s Zekyl Enterprises in dan kalha hma a lo lak tawhna te chhui zui nghal a nih bakah, a rang thei ang bera dan kalh a hmalakna awmte tih tawp leh dan kalh a che nia hriat te chunga dan ang tak a hmalak dan tur a ngaihtuah nghal bawk a ni. Sawrkar chuan kuthnathawktute dikna chanvo tihbawrhban sakna leh dan kalh a chetna chu uluk takin a vil zui zel dawn tih tarlangin, heng thil a in hnamhnawih lo tur leh sawrkar lo thawhpui zawk zel turin mi zawng zawng a ngenin a hriattir a ni.