MUHCS chungchang a thutlukna ah Minister a lawm

Health Minister Lalrinpuii chuan Mizoram Synod-in an Kohhran mi harsa te’n MUHCS an zawm theihna tura hma a la chu lawmawm a tih thu a sawi.

Health Minister Lalrinpuii chuan Social media kaltlangin he thu hi sawiin Kohhran lian ber atanga thawhpuina tha tak an dawng chu lawmawm a tih thu a sawi a. Anni lam pawh hmasawn zel tura an inbuatsaih sauh sauh tur thu a sawi bawk a ni. Mizoram Synod hian an hnuaia tualchhung Kohhran hrang hrang te chu an member harsa te'n Mizoram Universal Health Care Scheme (MUHCS) an zawm theihna tura hma la turin a ngen a. He thu hi Mizoram Synod Secretary Rev. B Zohmangaiha lehkha, thla hmasa ni 23-a tihchhuahah tarlan niin tunah hian tualchhung Kohhran hrang hrang Secretary te’n lehkha hi an dawng tan mek a. Mizoram Synod chuan Mizoram sawrkarin Health care Scheme a neih mek, MUHCS chungchang chu Officer's Meeting (OM) chuan ngun taka an ngaihtuah hnuin tualchhung Kohhran ho-ah an Kohhran member te retheihna avanga zawm ve thei lo ten an zawm ve theihna tura a tul anga hma laksak tura ngenna siam ni se tiin thu a ti tlu tih a tarlang a ni.

Hemi hmalam hian United Pentecostal Church of Mizoram chuan zirchianna an neih hnuah Mizoram Universal Health Care Scheme chu zawm tha an tih thu leh an Kohhrana thawk, Mizoram khua leh tui, MUHCS zawm thei zawng zawngte chu MUHCS zawm tura an hriattir chu lawmawm a tih thu Health Minister hian a lo tarlang tawh a. “Mipuite'n Universal Health Care Scheme tha tak mai hi zawm vek ang u,” tiin a mamawhtu ten tangkai taka an chhawr ngei theih nan theihtawp an chhuah dawn thu a tarlang bawk a ni. MUHCS-a inziahluh hun hi hawn mek a ni a, Online leh Offline hmangin inziahluh hi an kalpui mek a ni.