Serchhip District Jail-ah Health Camp buatsaih a ni

Serchhip District Jail-a tang mek leh Jail-a thawktute tan Health Camp neih a ni a, a thlawnin damdawi sem nghal a ni bawk.
Serchhip District Legal Services Authority leh District Hospital, Serchhip tangkawpin Serchhip District Jail-a tang te leh thawktute tana Health Camp an buatsaih hi District Legal Services Authority-a Secretary leh Judicial Magistrate First Class Josangzeli Tlau chuan kaihruaiin District Medical Superintendent Dr. ZD. Lalmuanawma chuan hetiang hun an buatsaih chhan te a sawi bawk a, ani bakah hian Serchhip District Jail-a Superintendent C. Vanlaltlana pawhin thu a sawi bawk a ni.

He Health Camp-ah hian District Hospital Serchhip atangin DMS Dr. ZD. Lalmuanawma bakah Chief Dental Surgeon Dr. H. Lalengzauva; Medicine Specialist Dr. Lalhriatpuia Chhangte; ART-a Medical Officer Dr. Fabian Malsawmkima leh CMO Office-a DPO, Dr. Sangthanmawii bakah thawktu dang thahnem tak an kal a. District Jail-a tang mek mi 71 leh naute pakhat bakah thawktu mi 10 te tan Health Check up an nei a. Non-Communicable Disease (NCD) leh TB Screening neih nghal a ni a, an mamawh angin damdawi te pawh a thlawna pek nghal an ni bawk.