Serchhip RD Block-a VEC Conference neih niin MGNREGA kalpui dan inhrilhfiahna leh zirhona neih a ni

Serchhip RD Block-a Block Development Officer (BDO), Dr. Lalramdintluanga chuan Mahatma Gandhi National Rural Employment Guarantee Act (MGNREGA) kalpui dan khirh tulh tulh anga lang chu Job Card holder leh Worker dik tak ten hna thawk tak tak chunga an hlawh tur dik tak an hlawh theih nana kalpui a nih vang tih a sawi.
Serchhip RD Block huamchhunga MGNREGA-a Village Employment Council (VEC) Conference vawi 1-na chu nimin khan Thenzawl-a Lalat Resort-ah neih niin he hun a hmanpuina ah Serchhip BDO Dr. Lalramdintluanga chuan he huna kalkhawm VC hrang hranga VEC te chu MGNREGA hna chungchanga kalkhawm an nih thu sawiin, “He Scheme hnuaia inhlawhna kan kalpui dan hi a khirh tulh tulh angin a lang na a, Job Card holder leh Worker dik tak ten hna thawk tak tak chunga an hlawh tur dik tak an hlawh theih nana kalpui chhoh a ni mai zawk a ni,” a ti a. India ram pum thlirin MGNREGA hna hi a hlawhtlinna a tha lo hle tih sawiin, “Hei hi a chhan chu Job Card lem a tam vang te, aikal intirh a awm thin te, hnathawktu tur tak takin hna an thawh loh vang te, thawh tur dik tak thawh a nih tawk loh thin vang te a ni,” tiin Sum tam tak a kalral dan ngaihtuahin a hlawhtlinna chin a sang lo em em tih a sawi a. “Chuvangin sawrkar laipui hian dik taka hna thawh a nih theih nan hma a la chho nasa em em a. Hnathawktu tur dik takin dik taka hnathawk chunga a hlawh tur tak a hlawh theihna turin khauh takin thil a rawn kalpui tawh mai bakah kalphung thar te a rawn duan belh bawk a. Hei hian dik taka he Scheme kan kalpui dan turah nghawng tha tak a neih laiin, hmanrua leh Technical Problem vangte in harsatna tam tak kan tawk chho mek a. Chung kan harsatna tam tak chu sutkian a nih theih nan keimahni lama kan lo tihfelfai ve theih chinte tha taka kan thawh theih nan he hun hi thil inhrilhfiahna hun atan buatsaih a ni,” a ti.

Serchhip BDO chuan he huna kalkhawm Serchhip RD Block huamchhunga VC te, VEC te leh VMC te chu an hna chu eizawnna ni lovin khawtlang leh mipui rawngbawlna hna thawktu an nih zia hre thar tura chahin, “MGNREGA hna kan thawhna kawngah hian mahni sahmim puarna ringawt ngaihtuah lova mipuiten an thawh tur leh an chantur dik tak chang tura thawhsaktute in ni a. Chuvangin mahni in hlawkna kan neih phah dawn lo a nih pawhin, khawtlang tana ke penchhuak kan nih tawh rau rau chuan mipuite rawngbawl hna lam hi kan ngaih pawimawh thar leh a tul em em mai a. MGNREGA hna hi tha taka thawh a nih a, hnathawktu mipuiten an chanvo tur tak an chan theih nana khawtlang mipuite kaihhruai hna thawk zel turin ka ngen duh cheu a ni,” a ti bawk a. He huna kalkhawmte chu MGNREGA kalpuina kawnga an hnathawhna ah hlawkna engemaw tal chharchhuak tura he hun buatsaih hi chhawr tangkai turin a chah bawk a ni.

Nimin-a VEC Conference hi Serchhip RD Block-a APO MC. Zirsangliana chuan kaihruaiin MGNREGA kalpuina kawnga hriat tur pawimawh hrang hrangte chu Department-a thawktu ten an sawifiah a. ‘Best VEC’ chawimawina chu Chhim Veng Serchhip VEC hnenah hlan niin ‘Best VMC’ chawimawina chu Rullam VMC hnenah hlan an ni bawk a. ‘Best Mate’ atan F. Lalhmingliana New Serchhip North chu thlan a ni bawk a, heng mite hnenah hian chawimawina thuziak hlan an ni.

Serchhip RD Block VEC Conference-ah hian Block huamchhung khaw hrang hrang atangin mi 450 vel an tel a, Mizoram-a Rural Development Block hrang hrang zingah Serchhip RD Block hi VEC Conference nei hmasa ber nia hriat niin thawktu hrang hrang ten an hnathawhna kawnga an hriatthiam loh te thawktute hi an zawtfiah nghal bawk a. VEC lam atangin thu-sawi ngaihthlak a nih bakah Francis Lallawm-kima, AA chuan lawmthu a sawi bawk a ni.