Mizoram-ah zuk leh hmuam ti za zela 58.7 an awm

Mizoram-ah Vaihlo, Zuk leh hmuam ti za zela 58.7 an awm anga chhut niin India ramah a sang pawl nia chhut a ni.

State Tobacco Control Cell, National Tobacco Control Programme, National Health Mission buatsaihin nimin khan DHME Auditorium, Aizawl-ah Sawrkar hnuaia Dental Surgeon thawk mek te tan ‘Training of Trainers for Mizoram Government Dental Surgeon’ neih a ni a, he hunah hian Health Department-a Addl. Director, Dr. Zonunmawii Pachuau chuan Global Adult Tobacco Survey (GATS) 2016-17 in a tarlan danin Mizoram chu vaihlo, zuk leh hmuam ti tam lamah India ram pumah kan sang hle tih sawiin, 58.7% in vaihlo zuk leh hmuam ti kan awm thu a sawi a. Hemi piah lamah hian Global Youth Tobacco Survey – 4, kum 2019-a neihin a tarlan danin zirlai kum 13 atanga 15 inkar zingah vaihlo zuk leh hmuam hmang mek chu 58% zet an awm thu sawiin, nu leh pa ten an fate vaihlo zuk leh hmuam ti lo tura zirtirna an pek tam a pawimawh takzet tih a sawi a, mi thiamte chuan ruihhlo hman tanna kailawn (Gateway substance) an tih chu vaihlo zuk leh hmuam hi a nih thu sawiin, hriselna a khawih chhiat bakah economy thlengin a nghawng thei a ni tihte kan ngaihtuah a hun tawh hle a ni, a ti bawk.

Nimin-a he hun hman hi Dr. Zoramthangi Renthlei, Additional Director (Dental) cum State Nodal Officer, National Tobacco Control Programme chuan kaihruaiin NTCP-a State Consultant R. Lalremruata chuan National Tobacco Control Programme hmalakna hrang hrang a tarlang a, Hospital tina Doctor-te hnathawh tur leh an tih tur hrang hrangte leh vaihlo sim thei tur a puih dan tur chungchangte a sawi bawk a. State Legal Consultant Vanlalzari kaihhruaiin NTCP in COTPA 2003 te, PECA 2019 (E-Cigarette khuahkhirhna dan) chungchangte zirhona neih a ni bawk a. NTCP-a Programme Assistant T. Lalbiaksanga chuan lawmthu sawiin hun a khar a ni.