Kum 2026-2027 atan Elementary School hawngin Samagra Shiksha in zirlaibu an semchhuak nghal

Kum 2026-2027 Academic Session atan nimin khan Elementary School te chu hawn tan a ni leh ta a, nimin vek khan Samagra Shiksha, Serchhip District te pawhin zirlai naupangte hnena zirlaibu sem tur chu Serchhip atanga vailiamin kumin-a zirlaibu sem tur chu a rawn thleng kim tawh nia thudawn a ni.
Mizoram sawrkar in Mizoram-a Elementary School te Calendar Year mil-a kalpui a tum tak avangin kumin hian Session chawlh awm rei lovin nimin atang khan School Session thar atan Elementary School te hi hawn tan a ni a, sawrkar in ruahmanna a siam dan chuan Primary School te hian ni 200 chhung School an kal dawn a, nakum (2027) February 5-ah result puan fel tur a ni dawn a. Middle School te chu ni 220 chhung School kalna hun neiin nakum February ni 5-ah bawk result an puang fel dawn a ni.

Kumdang-a lo kalpui tawh angin sawrkar chuan zirlai naupangte hnenah kumin hian zirlaibu a thlawnin a semchhuak leh dawn a, Serchhip District chhunga Sawrkar School te bakah Govt. Aided School leh Adhoc Aided School hrang hranga sem tur zirlaibu chu nimin khan Samagra Shiksha District Office, Serchhip atangin Deputy DPC, PC. Vanlalluna chuan a vailiam a, heng zirlaibu te hi Admission tifel zirlai te hnenah pekchhuah nghal tur a ni ang.

Samagra Shiksha Serchhip District a thawktute chuan a thlawna Zirlaibu sem turah hian Primary School naupang pakhat tan Rs. 250/- man zirlaibu leh Middle School naupang pakhat tan Rs. 400/- man zel pek a nih thu sawiin, kumin hian School hrang hrang ten zirlai an neih zat hriat theih ala nih loh avangin nikum lama Enrolment an neih dan angin zirlaibu te hi pek a nih thu an sawi a. Hemi mil-a naupang ten an dawn tur ang ang chu a rawn thlen kim tawh thu leh tunah hian Primary School 66-a zirlai 1203 leh Middle School 52-a zirlai 2392, an vaii zirlai 3595 te hnenah Zirlaibu hi sem a nih thu an sawi a, zirlai naupang punna ah chuan la pekchhuah leh tur a nih thu an sawi bawk.