MZP in khualzin rawn lut turte tan thuchhuah siam

Mizo Zirlai Pawl (MZP) chuan Mizoram rawn tlawhtu(Tourist) hrang hrang lo pung chho mekah khualpang zin leh thildanga Mizoram rawn tlawhtute chu Mizo nunzia leh khawsakphung te an ngaihpawimawh leh zah tura an beisei thu leh an phut thu an sawi.
Nimin-a thuchhuah an siamah MZP General Hqrs. chuan hnamdang (Tourist) Mizoram rawn tlawhte'n Social Media leh thil dang danga thehdarh tur Digital content an siamte chu Mizo hnam, sakhua leh khawtlang timualpho thei tur chu siam lo turin a chah a. Mimal In leh biak In-ah te video emaw thlalak pangngai emaw pawh ni se phalna nei lo chuan pawng lak mai mai lo tur leh Mizo min hmuh dan a dik lo zawnga a hruai theihna tur thilah phei chuan fimkhur hle turin an hriattir a. Mipui nawlpui awm dan leh nunphung pangngai aia uchuakin khawiah pawh awm lo tura ngenin, a bikin Sakhaw hmun leh biak In te hi zah a, Mizo hnam leh nunzia te zahin, Mizo mipuite mit ti kham lo zawnga awm turin khualzinte an chah a ni.

Hmeichhia leh hmeichhe naupangte chu an thla emaw, video emaw la a, mi ngaihdan hruai kawi thei tur zawnga pholan te chu an duh loh thu MZP chuan sawiin, Khawlai ilo a hmuh remchan apiang kawm a, Mizo chanchin a hluhlang zawng leh kimchang lo thehdarh zui pawh an rem ti lo tih an sawi a. Mizo chanchin ngaihven leh hrechiang duh chuan thil hre zik tluak leh puitling deuhte atanga thil ngaihven hram hram turin khualzinte chu an ngen thu an sawi a. “Mizote hi chuan hmeichhia leh naupangte hi kan humhalh a, an laka nungchang mawi lo taka lantirtute chu a en liam mai mai dawn lo a, a tul dan ang zelin khawtlang angin emaw, dan hmangin hma kan la zel dawn a ni,” an ti a. Mizoram rawn tlawh tur reng reng chuan Inner Line Permit (ILP) neih ngei ngei tur a nih thu an sawi bawk a ni.