Silk hrang hrang tharchhuah tamna khawpui ni turin theihna kan nei - Larsap

Mizoram Larsap General (Dr) Vijay Kumar Singh chuan Silk hrang hrang tharchhuah tamna khawpui ni turin theihna kan nei tih sawiin, hemi tur hian tan erawh kan lak nasat lehzual a tul tih a sawi.
Nizan hmasa khan Mizoram Silk tihhmasawnna, thiamthil pholanna leh chawilarna ‘Tlangro : The Mizoram Silk Runway’ chu Aijal Club Park-ah neih niin he hun a hmanpuina ah hian Larsap General (Dr.) VK. Singh chuan Sericulture Department chu theihna nasa tak nei leh haichhuah tur pawh la nei nasa a nih thu sawiin, Mizoram chu Silk chi 4 - Mulberry, Eri, Muga leh Oak Tasar tharchhuahna State anih thu a sawi a, “Silk hrang hrang tharchhuah tamna khawpui ni turin theihna kan nei a, hemi tur hian tan erawh kan lak nasat lehzual a tul a ni,” a ti a. Mizoram chu Silk pangang khawi nana sik leh sa duhawm tak nei anih thu sawiin, khawvel pumah leilung nena inrem Natural Fibre Silk mamawhna a sang zel a, hemi avang hian Mizoram Eri Silk chu khawvel market-a hralh tla tur tak a nih thu a sawi a. Sericulture chu thingtlang hmasawnna leh hmeichhiate dawmkan nana inmil tak, hna dang nen pawha thawh kawp theih, sum lakluhna hnar tha tak anih thu sawiin, Ei leh bara intodelh theihna, hnam ziarang vawnhimna leh hmasawnna ngelnghet dinna a nih thu a sawi a, Mizoram hmasawn nana a fawng pawimawha siam turin pangang khawitu, sawrkar, zirbing mi leh khawtlang inkarah tanrualna tha neih a tul thu a sawi bawk.

Larsap chuan Sericulture Sector tihhmasawn nana pawimawh hrang hrangte tarlangin, Inzirtirna changtlung, hmanraw tha zawk chhawpchhuah, tunlai thiamnate chhawr tangkai, hmasawnna ruhrel din leh a hralhna lam ngaihtuah, zirbingna nasa zawk neih, thalai tam zawk hip, sawrkar atanga tawiawmna tam zawk pek leh hmasawnna ngelnghet dinte chu ngaipawimawha neih hmasak a tul thu a sawi a. Hmarchhak State nena inzawmna thuk tak nei Muga Silk tharchhuah ah Mizoram in hma a hruai theih thu sawiin, a chaw tur thlai chin uar, Mizoram pual Muga Brand siama chawilar, Pangang khawi inzirtirna changtlung zawk neih, Mawihnai zawka chhuah thei tura sawngbawl, Khualhip nana hman thiam, Digital platform leh e-commerce nena thlunzawm, Designer leh Fashion Industry-te nena thawhhona neih bakah sawrkar puihna hmangtein Muga Silk chawilar theih a nih thu a sawi bawk.

Sawrkar laipui-a Ministry of Textiles hnuaia Development Commissioner (Handlooms) leh Mizoram sawrkar Sericulture Department bakah National Handloom Development Corporation (NHDC) te tangho buatsaih he hunah hian Sericulture Secretary Florence Zotluangpuii chuan inlawmna thu sawiin, Chief Secretary Khilli Ram Meena leh Dr. Naresh Babu N, Joint Secretary (Tech.) & CEO, Silk Mark Organisation of India (SMOI), Central Silk Board-te hnen atangin thusawi ngaihthlak a ni a, Fashion designer Tluangpuii Hmar leh Violeta by Sangzuali te kutchhuak Silk thuam mawi tak takte phochhuah a ni bawk.