Sudden Muanga Bu ziahna Museum-a dah turin hlan

Manipur-a Lamka Branch YMA te chuan Mizo Comics lar tak, ‘Sudden Muanga’ tih ziaktu, Lalsangzuala’n he Comics a ziakna hmanrua leh a bungraw hlui dangte chu Mizoram State Museum-a dah turin Central YMA kutah an hlan.

Heng bungrua te hi tunkar Thawhtanni khan Lamka Branch YMA te chuan Central YMA kutah hian hlanin he hun kaihruaitu Central YMA General Secretary Prof. Malsawmliana chuan Sudden Muanga thawnthu kha a hun laia Mizo Comics ah chuan a lar ber leh a chhuah hlan an nghahhlelh thin, thawnthu awmze nei leh darh zau a nih thu leh Mizo literature-ah hmun pawimawh tak luahtu a nih thu a sawi a. Lalsangzuala chhungten Mizo mipui tam zawkin a sulhnu an hmuh theihna tura langsar zawka phochhuah an remti leh Central YMA kuta an hlan chu lawmawm a tih thu a sawi.

He hunah hian Lamka Branch YMA President F. Lalhmingmawia chuan Lalsangzuala sulhnu te hi a bo thlau nasa tawh a, Sudden Muanga Bu pawh a kim lo nasa tawh a, neih kim leh dan awm se tiin Central YMA General Secretary kutah heng bungrua te hi a hlan a. He hunah hian Central YMA hruaitute leh Lamka Branch YMA hruaitu thenkhat te an tel bawk a ni.

Sudden Muanga Comics hmasa ber hi Laisaizawk tia hriat thin, Lalsangzuala hian kum 1977 March thla khan a tichhuak a, bu tam tak ziakin a hun laia Mizote nunphung leh Mizoram politic bakah Sakhuana thlengin a tarlang thin a. Serchhip-a hla phuah thiam LT. Muana Khiangte chuan ‘Sudden Muanga’ tih hla pawh siamin sak hlawh tak pawh a ni a. Kum 2016 khan ‘Sudden Muanga: Hmunkhawhar City’ tih chu film-in tihchhuah a ni bawk. He Comics ziaktu Lalsangzuala hi June 15, 2016 khan kum 65 mi niin Shija Hospital & Research Institute, Imphal, Manipur-ah a thi a ni.