AMC-a MNF sawrkar Motor tihral dan ZPM in tarlang

ZPM Thalai Hqrs. President Jeje Lalpekhlua MLA chuan MNF kaihhruai AMC sawrkar in Mizoram leh Aizawl mipuite hnam angin a ti mual-pho tih a sawi.

Inrinni-a thuchhuah an siamah Jeje Lalpekhlua chuan CAG Report in MNF Sawrkarna hnuaia Aizawl Municipal Corporation (AMC) chu bawlhhlawh paihna Truck 45 a tihral danah a sawisel a, hei vang hian State sum cheng nuai 3 sing 1 leh sang 6 a hloh tih a sawi a. MNF Sawrkar-a AMC te thil tih dan CAG Report-in a tarlan danin, SIPMIU, Aizawl chuan October ni 3, 2017 khan khawpui chhunga bawlh-hlawh paihna tur lirthei thar Truck (Tipper) 50 leh Pickup pali (4) te chu MNF kaihhruai AMC hnenah an hlan tih a sawi a. A vaiin cheng vbc. 10.28 man niin heng an motor hlan te hi kum 2018 khan MNF kaihhruai AMC Sawrkar khan tlawm uchuak takin a tiral leh vek tih a sawi a ni.

Mizoram Condemnation and Disposal of Government Vehicles Rules, 2011-in a tarlan danin lirthei te hi kum 10 a tlin hnuah emaw, km nuai hnih a tlan hnuah chauh tihral phalna a pe tih Jeje Lalpekhlua chuan a sawi a. Lirthei-in chetsual a tawk palh a, sum leh pai lama siamthat theih loh a nih chauhvin a hun hmain an tiral thei ang tih danah hian a awm bawk tih a sawi a. AMC Board of Councillors chuan December 2018 khan bawlhhlawh paihna truck-te chu Privatise turin thutlukna an siam a tih a sawi a. Technical Inspection-ah lirthei te hi an dinhmun a tha tih finfiah chungin Official-te chuan ‘Economic repair atan an fit tawh lo’ tiin an thutlukna an siam a, Motor pakhat zelah Rs. 5,64,000 chauh in an duhsak zawngte hnenah a pe tih a sawi a. Hetiang taka CAG report in MNF AMC Sawrkar avanga Aizawl mipuite leh Mizo mipuite induhsakna uchuak tak hmanga hmai a ti bal ta mai chu ZPM Thalai chuan pawi an tih thu a sawi a ni.