Vangchhia Haw Runpui Bialtu MLA hovin hman a ni

East Tuipui Bial chhunga awm Vangchhia khua chuan nimin khan ‘Haw Runpui’ neiin Bialtu MLA, Ramthanmawia chuan khuallian niin a hmanpui a ni.

Vangchhia Haw Runpui-ah hian Bialtu MLA chuan Vangchhia khua chu Mizoram khua te zinga khawhlun leh pawimawh tak mai, Pi leh Pu te lo thlangtlakna hmasa AD 500 - 1500 vel pawha mi lo khawsak tawhna, Mizo History sawia sawi tel ziah ngai, Pu leh pute sulhnu hlu tak tak te leh Kawtchhuah Ropui awmna, Mizoram khua te zinga Khualzin te tlawh chak ber pawl a nih thu sawiin, Khualzin tam zawk lo dawngsawng thei tura in buatsaih chhoh a tul thu leh Pi leh pute sulhna tha tak a humhalh chhoh zel a pawimawh thu a sawi a. Vangchhia khua in khawchhuak tlang hrang hranga awm tawh te in hmuhkhawmna hun tha tak mai an buatsaih chu tha a tih thu sawiin, he hun hian Vangchhia khua leh tuite in unauna ti zual zel se a duh thu leh taksa leh thinlung lamah hmasawnna duhawm tak nei tura a duhsak thu a sawi a ni.

Vangchhia khua hi kum 1885-a Sailo Lal Thawmpuia, F Liansuaka leh Neihchungnunga te unau in an sah a ni a. Vangchhia khua hi Hualngo leh Vangchhe hnam te a hlawma an lo khawsak tawhna niin kum 141-na a hmang mek a, Chenna In 170 khuaa chhal niin mihring 1000 bawr an khawsa bawk a ni.

Tun tuma Vangchhia Haw Runpui hi March ni 24-26 2026 chhunga hman tur a ni a. Hun khatna nimin-a Vangchhia Community Hall a neih hi Organising Chairman F. Malsawmtluanga chuan kaihruaiin Vice Chairman T. Lalzuimawia chuan inlawmna thu a sawi a, Khuallian leh Bialtu MLA Ramthanmawia bakah Lal chhungkua atang te, Vangchhe Hnam atang te leh Aizawl Welfare te atangin thusawi ngaihthlak a ni a. Special Item hrang hrang bakah kum 70 chunglam te hnenah lawmpuina hlan a ni bawk.