Thihna hnehna Isua Krista Thawhlehna ni lawm a ni

Kristian te ni pawimawh, Lal Isua Krista thihna hneha a thawhlehna ni, Easter Sunday chu Mizoram chhunga Kohhran hrang hrang ten nimin khan urhsun takin an hmang. Serchhip-ah chuan nimin zing khawvar hma khan Salvation Army thalai te chuan rimawi nen khawlai fangin Isua thawh-lehna thu hi an puang a, Kohhran tam tak chuan zingkar-ah Biak In chhung leh Biak In kawt hmun remchang ah Inkhawm nei bawkin Kohhran tam zawkah chuan Chawhma, Chawhnu leh Zanah Easter Sunday pualin hun hman chhunzawm a ni a, Kohhran thenkhat chuan nizan thleng khan zai-khawmin hun an hmang bawk a ni.

Presbyterian Kohhran chuan Easter Sunday-ah hian thupui thuhmun hmangin Pathian thu an ngaithla a, Baptist Kohhran tam zawkah chuan chawhma leh zanah Easter Sunday pualin hun an hmang a, chawhma banah puitling leh naupang in a hrangin Sunday School an nei tel bawk a ni. Salvation Army chuan zingkarah Isua Krista thawhlehna puangin Corp hrang hrangah Band ten rimawi an tum a, chhun leh zanah Easter Sunday pualin inkhawm leh hun hrang hrang an buatsaih bawk. 

United Penticostal Church - Mizoram leh North East India te chuan an remchan angin anmahni Kohhran theuhah hun an hmang a, Kohhran thenkhat chuan tlaiah ruai an theh bawk a ni. 

Catholic kohhran chuan Inrinni zan khan Easter Vigil hmangin Isua thawhlehna Easter chu ropui takin an hmang a. ‘Krista chu eng a ni’ tih lantir nan Easter Vigil-ah hian mei thar lak a ni a, Biak In kawt atangin Sathau khawnvar te chhi kaiin Biak In chhungah kawng zawh luh a ni a, inkhawm urhsun in a chhunzawm a, Thawhlehna puanchhuahna ‘Easter proclamation’ hun hman a ni a. Easter inkhawm hi Catholic Kohhran ah chuan inkhawm zawnga urhsun ber niin nimin khan Mass buatsaih leh a ni a, tualchhung kohhran tam tak, a bikin thingtlang lamah chuan Easter ruai an theh  bawk.