MISA General Conference 2026 neih a ni

Mizoram Information Service Association (MISA) chuan nimin khan Aizawl-a I&PR Conference Hall, Lianchhiari Run-ah General Conference an hmang.

Nimin-a MISA General Conference hi IPRP&S Department changtu Secretary Betsy Zothanpari Sailo chuan khuallian nia hmanpuiin MISA Member-te fuihna thu leh lut tharte lawmna thu a sawi a, MISA Conference hlawhtling taka hman theih a ni chu lawmawm a tih thu sawiin, MISA Member-te chu intuaithar a, ram leh hnam tana chhenfakawm lehzuala sawrkar kum thar tana inhlan thar turin a chah a. Mipui vantlang tana information pawimawhna leh sawrkar hmel tarlangtu an nihna dinhmun pawimawhnate ngun taka ngaihtuah a, Conference chu hlawk taka hmang theuh turin duhsakna a hlan nghal a ni.

MISA General Conference hawnna pual inkhawm hi MISA Vice President Pratap Chhetri chuan kaihruaiin an President, Malsawmsanga chuan kalkhawmte lawmna thu a sawi a. MISA General Secretary Andrew H. Lalremruata hnen atangin report ngaihthlak a nih bakah I&PR Director leh MISA Patron K. Vanlalsangi hnen atangin thusawi ngaihthlak a ni a, Treasurer C. Lalremruati chuan lawmthu sawiin hawnna hun hi a khar a ni.

MISA General Conference hi chawhma lamah hawnna hun hman niin, nikum lama MPSC buatsaih Civil Services Combined Competitive Examination-a lut thar MIS Officer-te lawm luh nghal an ni a. Chawhnu lamah rorelna an neih bakah MJA General Headquarters hruaitute kaihhruaiin kum 2026-28 atana MISA hruaitu tur an thlang nghal bawk.

Mizoram Information Service Association (MISA)-ah hian Member mi 28 awm mekin Mizoram sawrkar-ah sanctioned post 39 a awm a, Aizawl bakah District tinah thawktu hi an awm a ni.