AMC Inthlanpui lo awm tur atan Political Party ten ngawrh takin Campaign an kalpui mek

April 21, 2026-a Aizawl Municipal Corporation (AMC) inthlanpui lo awm tur atan Political Party hrang hrang ten ngawrh takin Campaign an kalpui mek.

ZPM party chuan nimin khan Aizawl-a an party Office-ah Chhung Inkhawm neiin he hunah hian an hruaitu leh Chief Minister Lalduhoma chuan Mizoram khawpui berah kalphung hlui kaihhruai sawrkar AMC a la ding chu kalphung tharah chuan sawrkar lai thawhpui thei tur AMC an thlan ngei a ngai tawh tih sawiin, “AMC tha zawk tih hi kan auhla tur a ni,” a ti a. “Solid Waste Management Centre (SWMC), Tuirial a paihna tur siam nan AMC-in JCB 3 nei sa renga mimal JCB hawhin cheng vbc. 1.26 an seng a, thil mak tak a ni. SIPMIU-in a thlawnin AMC hnenah Tipper 50 leh pik-up 4 an pe a. October, 2022-a an neih kha a kumleh-ah hralh an duh ta mai a. Cheng nuai 24 chuanga an neih kha cheng nuai 5 awrhin an hralh leh. Thil dik lo hi kan do tur a ni a. AMC Sports Complex, Bawngkawn chungchangah mi 16 hnena hna inpek chungchang thlengin thil dik tawk lo tam tak a awm mek niin a lang,” a ti bawk.

AMC-a Rorellai MNF Party pawhin ngawrh taka Campaign neiin nimin khan Aizawl Mizo Hnam Run-a Chhung Inkhawm an neih ah MNF President Zoramthanga chuan AMC inthlan lo awm tur atana an party Manifesto a tlangzarh a, MNF Manifesto-ah hian Aizawl khawpui chuan kum 136 a tling a, Zofate Jerusalem a nih angin khawpui nuam, fai leh thianghlim, hmasawn leh zual ni tura theihtawpa thaa enkawl chu MNF party chuan tul a tiin a ngai pawimawh hle tih tarlangin, AMC Election 2026-ah hian MNF party in Pathian leh mipuite zara sawrkarna a siam chhunzawm leh a nih chuan Aizawl khawpui enkawl tura hmalak an tum dan pawimawh zualtean tarlang a ni. He hunah hian MNF Sr. Vice President Dr. R. Lalthangliana chuan MNF chuan Aizawl khawpui chu khawpui a nihna angin cheina tur tam tak a la awm avangin AMC inthlan lo awm turah MNF-in sawrkarna a chang leh a nih chuan Aizawl khawpui chei tha turin hma an la dawn tih a sawi a, mipuite chu MNF vote turin a sawm bawk a ni.

MPCC Sr. Vice President Lalnunmawia Chuaungo chuan nimin-a Congress Bhavan-a an party Political Session-ah thusawiin, ram rorelna fawng chelh leh turin Congress chu an inbuatsaih mek tih sawiin, hemi an inbuatsaihna kawnga pawimawh em em AMC inthlan a awm dawn tih a sawi a. Aizawl khawpui leh AMC enkawl turin Congress candidate te chu an tha tawk tih pawh sawiin, vote turin mipuite a sawm bawk a ni.

Hetihlai hian BJP Mizoram President Dr. K. Beichhua pawhin AMC inthlan lo awm turah hian an party chuan khawtlang leh ram tana ngaihtuahna hmang thintu Candidate fel tak tak mi 11 an neih thu leh an chhuang hle tih sawiin, AMC-ah hian sawrkarna an lak chuan Aizawl hmasawnna chu an thupui ber a nih tur thu a sawi bawk.