Hnahthial-ah Patient Attendant Shelter hawng

Hnahthial District Hospital-a damlo awmpuitute hahdamna leh riahna hmun tur - Patient Attendant Shelter chu nimin khan Bialtu MLA Jeje Lalpekhlua chuan a hawng.

Patient Attendant Shelter hawnna hunah hian South Tuipui Bialtu MLA chuan damlo enkawl tura kalpui, thlenna neih that loh vanga harsatna tawk thinte chu a hriatthiampui thu sawiin, chu harsatna sutkian nan Hnahthial District-ah Patient Attendant Shelter hawn a ni ta chu lawmawm a tih thu a sawi a. He building awm theih nana hma latu leh thawktu zawng zawngte chungah lawmthu sawiin, a nihna tur dik taka hmang a, mi harsa zawkte duhsak nachang hre thin turin a chah bawk.

Hnahthial District-a Patient Attendant Shelter hi Shelter For Urban Homeless Scheme hnuaiah Urban Development & Poverty Alleviation (UD&PA) Department chuan Rs. 38,80,440 sengin an sa a. March ni 6, 2024 khan sak tan niin May ni 26, 2025 khan sak zawh a ni. He Building-ah hian floor hnih awmin Ground Floor-ah hian Bedroom pahnih (2), Sitting Room pakhat (1), Toilet pakhat (1) leh Choka pakhat (1) a awm a. First floor-ah hian Bedroom pakhat(1), Dormitory pakhat (1), Toilet pahnih (2) leh Sitting Room pakhat (1) a awm bawk. Patient Attendant Shelter hi District Hospital bul lawkah awmin a enkawl chhunzawm hna hi Hnahthial District Hospital kutah dah a ni.