District Level Workshop on Handholding Scheme nei; Serchhip District-ah Loan dilna 29 pawm a ni tawh
Serchhip DC Pisapui Hall-a ‘District Level Workshop on Handholding Scheme’ hi Serchhip Bawrhsap Paul L. Khuma chuan kaihruaiin he hun rawn hmanpuitu Mizoram State Policy Coordination Committee (MSPCC)-a CEO, Lalfakzuala chuan Handholding Scheme chungchang a bulthum atanga chipchiar taka sawiin, CM Special Package chu Loan la thei dinhmuna ding ve lo te tana pek an nih thu leh Loan Component ah chuan cheng nuai 50 thleng Loan dil theih a nih thu a sawi a. Online hmangin englai pawha dil theih a nih thu te, dil hun bi a awm loh thu te, a dawng zat tur bithliah a awm loh thu te a sawi a. Online hmanga dil dan thiam lote tan pawh Serchhip DC Office, SDO leh BDO hrang hrangte Office-ah kalin an tanpui theih reng thu a sawi a. Handholding Scheme kaltlanga Loan hmuh that bikna sawifiahin CEO chuan, kum tina Annual Guarantee Fee (AGF) pek ve a ngaih loh thu te, loan rul tha te chu thla ruk (6) hnu zelah an Loan laka pung (interest) chu sawrkarin a rulh let leh thin thu a sawi a. A diltu hi kum 18-60 inkar, CIBIL Score 700 aia hniam lo, chhungkaw pakhatah mi pakhat zel tan dil theih a ni tih a sawi bawk.
Kisan Credit Card (KCC) chungchang sawifiahin MSPCC CEO Lalfakzuala chuan, KCC Loan chu loneitu tana duan a nih thu te, cheng nuai 2 chinah dahkham leh Guarantor a ngaih loh thu te, loan pung zat 7% atanga 3% chu Loan rul tha te hnenah sawrkar laipuiin a pek let dawn thu te a sawi a. Bana Kaih policy nena kaihkawpa dil thei te chu kum 18-60 inkar an nih a ngai a, Sawrkar Laipui in 3% a rulh bakah Bana Kaih atangin sawrkarin 4% chu Farmer te a rulhlet dawn thu leh a pung engmah rulh ngai lovin KCC leh Bana Kaih kaihkawp hmang hian Farmer ten Loan an la thei tih a sawi a. KCC Loan dil nan document tam tak (DPR, Quotation leh a dangte) a ngai ve lo bawk a. Loan hi rulh zawh a nih chuan a tir atanga dilna buaipui that leh ngai lovin kum 5 a ralhmain lak nawn leh mai theih a ni bawk tih a sawi a. Bana Kaih hnuaiah KCC dilna hi chak zawka kalpui a nih theih nan ruahmanna siam a nih thu a sawi bawk.
He hunah hian Mizoram State Policy Coordination Committee (MSPCC) Member Zohmingthanga leh Lalchhuanawma Hrahsel te pawhin thu sawiin Handholding chu hmalak tak tak tum, kal ngaihna hre si lo te kaihchhuahna tura sawrkar ruahmanna a nih thu an sawi a. Serchhip District-ah Loan Component diltu an la tlem hle tih pawh sawiin, a tam thei ang berin dil se an duh thu an sawi a, Line Department te pawh Bana Kaih Loan diltute dinhmun dik tak zirchiang tur leh Progress partner te an hlawhtlin theih nan tanpui turin an chah bawk a ni.
Nimin-a Serchhip-a District Level Workshop on Handholding Scheme-ah hian SDO (Sadar) leh District Monitoring Committee Member Secretary, Rebecca Laldinmawii Hrahsel chuan Serchhip District dinhmun tlangpui a tarlang a, Lead District Manager report-a a lan danin Serchhip District-a Bank hrang hrangah Bana Kaih hnuaia Loan dilna lut 32 a awm tawh a, chung zinga 29 te chu Bank in an pawm sak hnuah Sanction fel a ni tawh a. Loan an pek chhuah zat belhkhawm hi cheng nuai 288.79 a tling tawh a. Hmalakna enfiah tawh ah tha taka hmalakna kalpui hmuh tur an awm tawh thu leh Department thenkhat hnuaia hmalakna te pawh enfiah tura ruahmanna siam mek a awm thu tarlan a ni bawk.
He hunah hian Sawrkar Official te bakah VC te, Progress partner te, Bank aiawh te leh mi pawimawh dang te an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!