Serchhip-ah Reserved Forest chungchang ngaihtuah
Supreme Court thupek angin Land Revenue & Settlement Department chuan Contour-based Mapping of District area -wise Reserved Forest chu MIRSAC Director hma la turin a hriattir tawh a. District tina Assistant Commissioner (Revenue) te chu an District huam chhung theuha Reserved Forest huamchhunga mimal ram nei te list lo peihfel tura tih an ni bawk a. Ram relocate ngai te, Land-Holding cancel tul te leh harsatna awm apiangte sawiho turin March 2026 chawlhkar thumna ah SIT, GAD Meeting neih tur niin Council of Minister pawmpuina chu April 2026 chhunga lak tur a nih bakah Supreme Court thupeka hmalakna Affidavit/report file chu May 2026 chhungin tihfel tur a ni bawk a. Supreme Court order angin Forest Reserve area-a ram nei te chu an enkawl dan a zira Category siamfel a ngai a, a hmuna endik (Field verification) kalpui vek tur niin April ni 15, 2026 hmaa inpeih fel tura beisei an ni. Forest Department chuan verification an lo buaipui anga, VC te pawhin an huamchhunga mi te ngun taka lo enfel turin an chah nghal a ni.
Nimin-a hemi chungchang ngaihtuaha thukhawm Serchhip DC Meeting Hall-a neih ah hian Addl. DC Lalrinzuala, SDO (Sadar) Rebecca Laldinmawii Hrahsel, Assistant Commissioner (Revenue) Gaston Vanlalhriatpuia, SDC C. Vanlal-chhanhimi, DFO Thenzawl Dr. R. Lalnungrenga, DFO N.Vanlaiphai Thanliana Hauhnar te bakah Thenzawl West, Neihloh, Hualtu leh Hmuntha VC aiawh te an tel a ni.
Comments
Post a Comment
I ngaihdan i sawi hian mipui ngaihdan i tarlang a ni!