Mamit leh Kolasib District atanga Aieng lei MT 71 chu Kolasib atangin vailiam a ni

Mizoram State Rural Livelihood Mission (MzSRLM) hnuaia din Ropuiliani Women Farmer Producer Company Limited (FPC) chuan Mamit leh Kolasib District-a an Shareholders te tharchhuah Aieng an lei Metric Ton 71 (kg 71,600) chu nimin khan Kolasib DC Office Complex atangin vailiam a ni.

Nimin-a heng Aieng te vailiamna hun hi Thingdawl RD Block-a Block Mission Director/Block Development Officer, BMMU Dr. Doris Lalrinawmi chuan kaihruaiin Kolasib DRDO Project Director leh District Mission Director, Lalmuanpuia chuan Mizoram State Rural Livelihoods Mission (MzSRLM) hnuaia Agri-Marketing Value Chain atana din Ropuiliani Women FPC in Kolasib leh Mamit District huamchhunga a shareholders te hnen atanga a leisak Aieng MT 71 zet, SSB AGRO LLP, Mizoram hnena hralhchhuah a ni chu lawmawm a tih thu a sawi a ni.

Ropuiliani Company chu kuthnathawktu Self Help Group (SHG) te tana innghahna tlak ni ngei tura Ministry of Rural Development-in a din a nih thu leh MzSRLM chu he Company bultantu an nih thu Lalmuanpuia chuan a sawi a. SHG chu mi taima tan chuan chhungkaw eizawnna nghahchhan nghet a nih theih thu leh sawrkar flagship programme-ah pawh Sawhthing, Aieng leh Hmarcha te chu kuthnathawktute tharchhuah zara ramin hma a sawn theihna tur atana tum ber a nih thu a sawi a. Hengte hi hlawhtling thei turin Ropuiliani company chuan ruahmanna mumal tak a nei a, a thawktute pawhin a puitlin nan theihtawp chhuah turin a chah a ni.

Ropuiliani Women Farmer Producer Company Limited hian tun dinhmunah District 7 leh R.D Block 16 huam tel tawhin, Shareholders (SHG) mi 9,500 chuang an inziaklut tawh a. An member-te hnen atang hian Sawhthing leh Mizo Hmarcha te lo leisak tawhin, tun dinhmunah Aieng leh Sawhthing chu District dang atanga lei leh turin ruahmanna kalpui mek a ni a. He company hian heng thlaite hi a hringa hralhchhuah piah lamah, Company Processing Unit, Chhingchhip-ah Value Addition kalpui mekin hmalak chhunzawm zel tum a ni. He hunah hian Ropuiliani Women FPC -a CEO Henry Saingura chuan Company report tawi a pe bawk a ni.