Thenzawl-ah Artificial Football Turf phah dawn
Artificial Football Turf phah tur lungphum phumna hunah hian Minister B. Lalchhan-zova chuan Thenzawl leh a chhehvel khaw mipuiten he Football Field siam tur chu ral thlir lova neitu thinlung pu-a vil turin a chah a, “He hmun hian Thenzawl hlutna a tipung anga, tlawh chaktu an lo tam anga, Thenzawl khaw mipuite inpumkhatna a ti tha lehzual dawn a ni,” tiin ruahman anga hna hi thawh a ni em tih lo vil zui turin a chah bawk a ni.
He hunah hian Mizoram State Sports Council Secretary Henry C. Lalrawnkima chuan Technical Report pein Thenzawl Lothazawl-a Artificial Football Turf tur hian Ministry of Minority Affairs, Govt. of India hnuaia Pradhan Mantri Jan Vikas Karyakram (PMJVK) Scheme atangin June ni 11, 2025 khan cheng vbc. 11.856 sanction dawn a ni a. Hnathawktu tur Contractor zawnna atan Open Tender chhuah niin he hnathawk tur hian M/s Décor India, Guwahati, Assam te thlan an ni a, February 24, 2026 khan Work Order pein Work Order amount chu cheng vbc. 10.33 a ni.
He Project chhungah hian hna hrang hrang thawh tura ruahman niin Artificial Football Ground a dung metre 111 leh a vang metre 76-a phahin RCC Kerbing Wall metre 0.60-a sang-a hung kual vek tur a ni a, Perforated pipe hmangin tui paih chhuahna siam vek tur niin Football Play area hi a dung metre 105 leh avang metre 70 a ni anga, Line pawnah Free Area metre 3 a awm kual vek bawk ang. Artificial Football Turf hi FIFA approved Quality 60 mm (pile height) phah tur a ni. Football Ground hi hung tur a ni dawn a, metre 2 dan zelah ban phun tur niin, a hnuai lam 0.60 metre hi brick wall a ni ang a, a chunglam 1.80 metre hi Angle iron leh Steel net hmanga hung tur a ni. Gate pathum (3) goal hnung ve ve ah 1.2 metre-a zau leh Pavilion hmaah 6 metre a zau dah tur a ni.
Hei bakah hian RCC Pavilion pawh chhawng hnih (G+1) a sak tur niin, a dung metre 23.65 leh a vang metre 5.90-a zau a ni anga. Ground Floor-ah hian Changing Room 2 leh Toilet dahin, 1st Floor hi Pavilion atana ruahman a ni a, chair 200 vel dah theihna tur a ni ang. Pavilion sirah RCC Gallery siam ve ve tur a ni a, Gallery hi a dung metre 225, a vang metre 6 tur niin Ground Floor hi Parking atana ruahman a ni a, 1st Floor hi Gallery atana ruahman a ni a, hetah hian mi 230 ve ve leng thei tura ngaih a ni. Mipa leh Hmeichhe tana inthiarna tur Public Toilet a awm anga, PwD (Persons with Disability) te tana hman tur inthiarna 2 siam tel a ni bawk anga. RCC Water Tank, tui litre 1,00,000 leng ruahman tel a ni bawk.
Comments
Post a Comment
I ngaihdan i sawi hian mipui ngaihdan i tarlang a ni!