Agriculture Minister in Cocoa chin a zirchiang

Agriculture & Farmers’ Welfare Department changtu Minister PC. Vanlalruata chuan Kerala tlawhin Cocoa chin kawnga an hmalakna hrang hrangte a zirchiang.

Agriculture & Farmers’ Welfare Department Minister PC. Vanlalruata hian Ningani khan Koch (Kerala)-a Directorate of Cashew Nut & Cocoa hotute leh Spices Board of India te an pisa-ah tlawhin an inkawm a, Directorate of Cashew Nut & Cocoa hi sawrkar laipui Ministry of Agriculture & Farmers’ Welfare hnuaia awm niin an Director Dr. Femina leh a thawhpui te’n Minister hi an lo dawngsawng a. An inkawmna ah hian Dr Femina chuan Presentation te pe-in, Mizoram a Cocoa that theih dan te sawifiahin loneitute hmasawnna tur atan uar taka Cocoa ching ve turin Minister chu a lo sawm a; hemi kawngah hian sawrkar laipui chuan kawng hrang hrangah tanpuina pek an inhuam thu a sawi.

Hemi ni vek chawhnu lamah Minister hian Spices Board of India (Ministry of Commerce & Industries, Government of India) hotute Meeting neihpui lehin Secretary P. Hemalatha-i chuan Minister a lo dawngsawng a. Spices Crop lamah Mizoram hmasawnna tur hrang hrang a awm thute leh a bikin Mizo hmarcha (Mizo Birds Eye Chilli)-ah market demand a that thu a lo sawi a, nasa lehzual zawka tharchhhuah a nih theih nan Government of India leh Mizoram Sawrkar te’n thawhhona tha zawk neih chhoh zel ni se an ti bawk.

Minister PC. Vanlalruata hian Zirtawpni khan Kochi (Kerala) bulhnaia khaw pakhat, Kurisumooti, Kattayam hmun vela Cocoa an chinna hmun hrang hrang tlawhkualin Cocoa an chin dan a zirchiang bawk a. Minister hi Kerala-a Cocoa chingtu langsar zualte zinga mi Dominic Sebastian chuan an Cocoa chinna te kawhhmuhin a hruai a. Cocoa hi Kerala ram ah hian altitude meter 500 hnuai lama awm ramah te an ching nasa ber a. Kuhva, Coconut, Rubber leh Oil Palm kung karah te an ching nasa hle a. Mizoram chhunga altitude meter 500 chinah pawh Cocoa hi hlawhtling taka chin theih ngei beisei a ni. Minister hi Agriculture & Farmers’ Welfare Department atangin Secretary Ramdinliani, Consultant Tlangtimawia Zote leh ADAO Lalrinzuala te’n an tawiawm a ni.