Chief Minister Lalduhoma’n Thenzawl-ah ‘Thenzawl PWD Road Division’ thar a hawng

Serchhip Bialtu MLA leh Chief Minister Lalduhoma chuan Zirtawpni khan ‘Thenzawl PWD Road Division’ hawngin he Office hi thla thar April 1 atangin mipuite tan dawr theih a ni ang.
Thenzawl PWD Complex-a ‘Thenzawl PWD Road Division’ hawnna hunah hian Chief Minister Lalduhoma chuan PWD tana ni chhinchhiahtlak, Thenzawl mipuite tana chanchin lawmawm, Mizoram in hma kan sawn zelna kawnga kan tangkaipui tur ‘Thenzawl PWD Road Division’ thar an hawng thei ta chu Sawrkar pawh an lawm hle tih sawiin, “Mizoram in kum 20 zet rambuai kan tawrh avangin hmasawnna lamah kan hnufual bik a, Infrastructure-ah te, Industry leh Investment lamah te State dangte kan phak lo hle a. Kan road density te hi state dangte nena khaikhinin a la hniam bik hle a. India ram road density chawhrual hi km 100 bial-a km 116 zel a nih laiin Mizoram in kawngpui a neih zat chu Km 100 bial-ah Km 46.37 chauh a la ni a. India ram average zatve pawh kan la phak lova, hnathawh tur hi kan la ngah hle a ni,” a ti a. “Thawh tur a tam a, hma kan la nasa a. Hna a pun a, thawktu lam kan pun si loh chuan kan kal chak thei si lova. Chak zawka hna kan thawh theih nana pawimawh tak pakhat chu Thenzawl Division thar leh Biate Sub-Division thar hawn hi an ni,” a ti.

PWD Thenzawl Sub-Division chuan Aizawl – Thenzawl – Lunglei kawng, Mizoram State Highway pawimawh ber a enkawl mek thu leh Kawng pawimawh dang Thenzawl - Buarpui a enkawl bawk tih Chief Minister chuan sawiin, “Hna thar lo awm tur ngaihtuah tel miah lo pawh ni ila, he Division thar hian thawh tur a ngah sa em em tho a ni,” a ti a. “Vawi tam tak kan lo sawi tawh thin angin Thenzawl-ah hian PEACE CITY din tur a ni a, Master Plan kan siam mek a. SASCI atangin Peace City chhunga kalpui turin Greenfield City Project kan thehluh tawh bawk a. Tourism lam project lian tak tak, Ropeway te, Vanva lui khuah te, Lau project te, Heliport te, Sericulture P3 Unit te leh thil dang dang kalpui kan tum mek bawk a. Neihloh khua hi Disaster thil avangin hmun danga sawn tumin hma kan la mek bawk si a. Helai velah hian PWD khawih chi project hi tam tham tak a rawn piang dawn a. Chuvang chuan, Thenzawla Division hawn hi thil tul tak a ni,” tiin Office thara thawktute leh PWD Office hrang hranga thawktute duhsakna hlanin, a hnathawhte leh an ruahmannate chuan kan ram hmakhua a hril a ni tih hre chung a, theihtawp chhuaha lo thawk zel turin a chah a ni.

‘Thenzawl PWD Road Division’ hawnna hun hi PWD changtu Commissioner & Secretary, V. Lalsangliana chuan kaihruaiin PWD E-in-C Er. H. Zoramliana chuan report a pe a. Thenzawl Road Division thar atan hian EE  post 1, JE post 2, UDC post 2 leh a dangte sawrkarin a siam tawh a, post thenkhat lak phalna pek an ni tawh a, thawktu awmsate siam remin April ni 1, 2026 atang hian mipuite dawr theih an ni ang.