MJA General Conf. neih a ni

Mizoram Journalist Association (MJA) chuan Zirtawpni kalta, March 27, 2026 khan General Conference vawi 52-na hmangin an pawl hruaitu tur an thlang nghal bawk.

Aizawl-a I&PR Auditorium-a MJA General Conference hi Finance Department changtu Secretary Ramchuana chuan khuallian nia hmanpuiin Chanchinbu mite chu chawlh pawh nei mumal lo khawp a thawkrim an ni tih sawiin, Social Media karah Journalist-te chu thudik chauh chhuah tur leh an thuchhuah reng rengah tan lam nei lo a, an thu ziah te chu midang ti na lo thei ang ni turin leh mimal zalenna inzahsak tawn turin a chah a. Chanchinbumite pawimawhna chu hrethiam a, an hmasawnna atana sawrkar hmalakna hrang hrangte tarlangin, thawhhona tha tak an neih zel a beisei thu a sawi a. MJA chu pawl hlun leh pawimawh tak a ni tih sawiin, a chhunga pawl mite pawh, ram rawngbawlna hna pawimawh tak chelhtute leh thil thlengte thlifim a, mipuite hriatna tizautu an ni tih inhre reng turin a chah a. Khawvel changkang zelah, Chanchinbu hlutna chu an kutah a awm tlat tih hre reng turin a fuih nghal bawk.

MJA General Conference hi an pawl Vice President C. Lalhmachhuana chuan kaihruaiin Report hrang hrang ngaihthlak a nih bakah an President, C. Lalrambuatsaiha chuan thu a sawi a. Chawhnu lamah Rorelna leh hruaitu thlanna neiin kum 2026-2028 chhunga President atan Vanlalrema Vantawl (Zalen); Vice President-ah C. Lalhmachhuana (Youth Herald) leh Treasurer-ah Zohmingmawia (The Aizawl Post) bakah Executive Member tur mi 11 thlan an ni a, an pawl hmalakna tur hrang hrang an rel bawk.

Tun dinhmunah Mizoram-ah MJA Member 191 an awm mek a, an zinga 92 chu General Headquarters (Aizawl) a mite an ni. Record atanga a lan danin  MJA hi kum 1972 March 23 a din niin member nih laia chatuan ram pan mi 76 an awm tawh a ni.