District Hospital Serchhip-a Dialysis Unit hman theih turin Bialtu MLA in a hawng

District Hospital, Serchhip-a Dialysis khawl bun thar chu hman theih tura peihfel a nih hnuah nimin khan Bialtu MLA leh Chief Minister, Lalduhawma chuan hawngin Vawiin atang hian a mamawhte tan hman tan tum a ni a, tun dinhmunah he khawl hmang tangkai tur hi mi pasarih an awm mek nia thudawn a ni.
District Hospital, Serchhip TRAUMA Building-a Dialysis Unit siam thar hi nimin chawhnu lam khan Serchhip Bialtu MLA leh Chief Minister Lalduhoma chuan hawngin hemi puala inkhawm tawi Serchhip CMO Conference Hall-a neih ah hetiang khawl hmang mamawh hi kan District leh kan khawtlang-ah mi thahnem tak an awm thu a sawi a, heng mite tana hman tangkai theih tura Dialysis Unit hawn a ni ta chu lawmawm a tih thu sawiin, he damdawi In-a thawktute chu anmahni pantute tana dawr nuam ni turin a fuih a. Damdawi In-a thawktute chu an hnathawh chu Pathian rawngbawlna a ni tih an hriat a pawimawh thu sawiin, hemi rilru hi pu turin a chah a, Pathian rawngbawltu nih inhria chu eng hna pawh thawk se midang tan dawr an nuam tih sawiin, ‘Chumi rilru nen chuan Pathian in kan khawl neih ve chhun te leh thawktute zawng zawng hi malsawm che u se tih ka duhsak che u a ni,,” a ti a, he damdawi In rawn pantute pawhin hlim tak leh dam taka mahni In lam an pan theih a duh thu a sawi bawk.

Chief Minister chuan tunah hian District Hospital Building nei chhe ber te zinga mi kan nih thu leh damdawi In Building thar sak mekah hmasawnna a awm zel thu leh Main Building sakna tur sum cheng vbc. 50 pawh NESIDS (OTRI) atangin sanction hmuh a nih tawh thu sawiin, Tender tih vat a nih tur thu a sawi a, tha taka hna thawh a nih theih nan khawtlang mipui ten an vilpui a pawimawh rualin duhdan hrang erawh neih a hun tawh loh thu a sawi a. Damdawi In building sak zawh a nih hnuah khawl leh hmanraw tha zawk te pawh dah zel tur a nih thu a sawi bawk.

District Medical Superintendent Dr. ZD. Lalmuanawma kaihhruai he hunah hian Dialysis Unit enkawltu Sr. Medical Officer, Dr. Lalhriatpuia Chhangte chuan Technical Report pein Dialysis khawl hi June 5, 2025-ah an dawn thu leh khawl hi pahnih dawngin tunah hian thawktu mi panga, Doctor pakhat, Technician pakhat, Staff Nurse pahnih leh RO incharge mi pakhat an awm thu sawiin, Technician hi Bialtu MLA in MLA Fund atanga a rawih a ni a. Dialysis tih mamawh an lakkhawm atangin mi 11 in hriattir an awm thu leh an zingah hian ICU mamawh leh natna dang enkawl tel ngai nei te an awm avangin an zinga mi pasarih te chu tun dinhmunah enkawl tura an inruahman thu a sawi. Dialysis khawl pakhat ah hian chawhma lamah mi pakhat leh chawhnu lamah mi pakhat enkawl theih an nih dawn thu pawh sawiin, sawrkar chawlh leh damdawi In chawlh tih loh ni tinin mi pali zel enkawl thei tura an inbeisei thu a sawi a. Tuna an enkawl turte hi chawlhkar khat-a ni hnih (2) zel Dialysis tih ngai te an nih thu a sawi bawk a. Vawiin, April 2, 2026 hian hman tan tum a nih thu a sawi bawk.

He hunah hian DMS Office-a UDC, R. Vanlalhmangaihzuali pawhin Financial Report pein District Hospital, Serchhip-a Dialysis Unit bunna tur hian MLA Fund leh thildang atangin Rs. 15,04,000/- an hmuh thu leh khawl bun mai bakah hian Damdawi In Building sak mek a nih avangin Blood Bank Room chu pindan lailawk a nih thu a sawi a, he sum hmang hian a theih ang anga hma an lak thu leh tuna sum leh pai an la mamawh te pawh Bialtu MLA hnen atanga hmuh leh an beisei thu a sawi a. Technician rawihna tur hi thla 11 atan Bialtu MLA hnen atangin an dawn tawh thu a sawi bawk.

District Hospital Serchhip-a Dialysis Unit hawnna hunah hian Serchhip DC, Paul L. Khuma leh SP, Gavit Gogna bakah sawrkar Department hotute, tlawmngai pawl hrang hrang hruaitute leh khawtlang hruaitu VC leh thuthar thehdarhtute an tel a ni.