Livestock Insurance programme hawngin Bana Kaih hnuaia Vaimim chi sem tur vailiam a ni

National Livestock Mission hnuaia Livestock Insurance programme chu nimin khan Champha-ah AH&Vety Minister, C. Lalsawivunga chuan hawngin Mizoram Bana kaih kaltlanga ranchaw intodelhna project ‘Maize and Soyabean contract farming for Animal Feed Production’ hnuaia Vaimim chi sem tur a vailiam nghal bawk.

Hemi puala District Vety. Hospital, Champhai-a hun hman ah AH&Vety Minister, C. Lalsawivunga chuan Vaimim lei nan Department-in sum tam tak a seng thin tih sawiin, duhkhawp a hmuh thin loh avangin State hrang hrang bakah, Burma atang te a lakluh a nih thin thu a sawi a. Vaimim hi Department in a mamawh reng avang leh Market awmsa a nih avangin Mizo kuthnathawktute kaltlanga an harsatna te sutkian theih a nih thu a sawi a, he project atan hian Bana kaih hnuaiah cheng nuai 408 hmuh a ni a, District pathum Champhai, Saitual leh Khawzawl-a khaw 10-ah kalpui tum a nih thu leh loneitu chhungkaw 464 in Vaimim tharchhuah runpui an kalpui dawn tih a sawi a ni.

Mizoram hi ranvulh atangin kan intodelh thei reng tih pawh Vety Minister chuan sawiin, “Intodelh thei turin mi tinin tan kan lak a ngai,” a ti a. “Mahni hnaa rinawmna hi a pawimawh em em a, rinawmna hian taimakna te, thawhrimna te leh dikna te a keng tel vek,” tiin kuthnathawktute pawh an hnathawhna apianga rinawmna neia, rinawm taka hna thawk turin a chah a. Bekang leh Vaimin an semchhuah te pawh tha taka tharchhuak turin a chah a, Mizoram mipuiin mamawhna sang tak an neih vangin an thawh that chuan an hlawkpui ngei ang tih a sawi bawk. Animal insurance pawh ranvulh te tana thlamuanna siamtu tha tak a ni dawn tih sawiin, Insurance man pangngai aia tlawm daihin an neih theih dawn thu a sawi bawk.

Nimin-a loneitute tana Vaimim chi vailiam zat hi quintal 38.29 a ni a, he project hi kum hnih (2) chhung kalpui tur a niin a tum ber chu ranchaw atana Vaimim mamawh Mizo loneitute kaltlanga tharchhuah a ni a. Department of Agriculture te nena hmalak ho niin Vaimim tharchhuah hi AH & Vety. Department chuan kg-ah Rs. 28 in loneitute kawtkai-ah a leisak thin dawn a ni. AH & Vety Department chuan Vaimim hi Deparment Feed Plant-ah thla tin quintal 500 vel mamawh a nih thin thu an sawi a, he Project atang hian quintal 8200 tharchhuah beisei a ni bawk.

NLM hnuaia Insurance hi Bawng leh Sial-ah Rs. 2979/- niin State sawrkar in Rs. 331/- a tum anga, ranvulhtuten Rs. 584 an tum a ngai a, Vawk-ah Rs. 140/- niin State sawrkar in Rs. 165 a tum anga, Beneficiary ten Rs. 292/- an tum dawn a ni. Kel leh Beram vulhtute tan Rs. 348 niin Sawrkar in Rs. 39/- a tum anga beneficiary ten Rs. 67 an tum dawn a. Hand Holding Policy hnuaia beneficiary te tan chuan chawi a awm dawn lo a ni.