Election MCC bawhchhia a inpuhna lut a tam

Tun thla April ni 21-a Aizawl Municipal Corporation (AMC) Bial/Ward 19 inthlan vote thlak lo awm tura Election Model Code of Conduct (EMCC) bawhchhia a puhna tam tham tak a lut tawh a. Hriat theih chinah Principal Chief Conservator of Forests (PCCF) pisa-in March ni 21-a LDC (provisional employee) atana mi 15 lakna tur advertisement an lo chhuah chu State Election Commission chuan a ngai thutak hle a. EMCC bawhchhiatna a nih thu PCCF leh Advertisement lo tihchhuahsaktu Director, Information & Public Relations chu insawifiah tura tih an ni a. State Election Commission hmaah inlanin, an thil tih cancel tira ngaihdam an ni.

Thla hlui (March) ni 18-a AMC inthlan puan a nih atanga ni 28 thleng khan hna lak, Advertisement chhuah, hna lakna atana interview leh sawrkarin inkhawm buatsaih ang chi dilna chi hrang hrang 16 chu SEC-ah a lut a. EMCC tlawh-chhana dilna 16 lut zinga 6 hi tih khapsak an ni a. Dilna 6 chu intiamkamna nen phalsak an ni a, pakhat chu exempt a ni a, a dang zawng chu thurawn pek an ni. State Election Commissioner Dr. H. Lalthlangliana chuan hna leh ruahmanna kal laklawh lai chu ngaihhnathiam a nih rualin thil thar, eng political party berin emaw inthlanna a hlawkna an tel theihna tur ang chi chu khap a nih thu a sawi a ni.