Nikum chhungin Mizoram-ah TB vei 2275 hmuh an ni

Zonuna Kawlni /

Kum kalta 2025 chhung khan Mizoram-ah TB natna vei mi 2275 hmuhchhuah niin TB vanga thi mi 145 an awm bawk.

Nimin khan khawvel pumah TB natna dona ni, World TB Day chu hman a ni a, he huna tarlan a nih danin kum kalta 2025 chhung khan Mizoram-ah TB vei mi 2275 hmuhchhuah niin TB natna dam har chi, MDR-TB vei mi 146 hmuhchhuah an ni bawk a, TB natna leh HIV vei kawp mi 267 hmuhchhuah ni bawkin TB vanga thi mi 145 an awm a, TB vei hmuhchhuah atanga za zela 84 te chu enkawl dam an ni bawk. Global TB Report 2025-in a tarlan dan chuan kum 2024 khan khawvel pumah mi maktaduai 10.7 (vaibelchhe khat) chuang TB vei an awm a, TB vang hian mi maktaduai 1.23 vel an thi a. India TB report 2024-in a tarlan dan chuan India ramah kum 2023-ah mi nuai khat zelah mi 199-in TB natna an vei a, mi nuai khat zelah mi 23 TB vangin an thi a. Mizoram-ah hian kum 2025 khan TB vei mi 2275 (166 per lakh) hmuhchhuah niin, mi 145 (10 per lakh) TB vangin an thi bawk.

World TB Day pual hian Aizawl-ah chuan Taxation Auditorium-ah hun hman niin ‘100 days TB campaign’ leh ‘TB Mukt Ward’ kalpui tur chu hawn nghal a ni a, he hun hmanpuitu NHM Mizoram-a Mission Director Dr. R. Lalchhuanawma chuan TB natna hrik hmuhchhuah ni hriatreng nana ‘World TB Day’ hi kumtin hman thin a nih thu a sawi a. Kumin a he ni thupui chu ‘Mipuite chakna ringa TB natna umbo’ a nih angin thawktute, ram hruaitute, vantlang roreltu leh mipuite kan zavaia TB dona kawngah kan thawh theuh chuan TB hi kan umbo thei ngei dawn a ni, a ti a. TB hi a damdawi hmuhchhuah a nih hma chuan natna tihbaiawm tak, thihpui ngei ngei natna, a veite pawh mi ten an thinhrik leh an hlauh em em a ni thin tih sawiin, Damdawi hmuhchhuah anih hnu leh khawl tha tak tak hmanga rang taka natna hmuhchhuah theih a nih hnu chuan tihdam theih alo nih tak thu te a sawi bawk a ni.

Mizoram-ah hian TB awmlohna khua ni tura inelna thianghlim - TB Free Village chu kalpui mek niin kum 2025 chhung khan Mizoram-ah TB awmlohna khuaa puan theih khaw 150 an awm a. Heng zingah hian khaw 74-te chu kum khat TB Free Village ni thei an ni a, khaw 58-te chu kum hnih azawna TB Free Village ni thei an ni a, khaw 18-te chu kum thum chhung TB Free Village ni thei an ni bawk.

TB umbo na tura Sawrkar laipui ruahman ‘TB Mukt Bharat Abhiyaan’ hnuaiah hian thawktute vak chhuakin TB endikna hi kalpui thin a ni a. Khaw tinah TB vei awlsam bik te chu ngaihpawimawh niin a thlawn vekin thawktuten screening an neih sak thin a. Mihring awmkhawm tamna hmun leh TB inkaidarh awlsamna– Jail, Home etc ah te endikna hi a zing thei ang berin neih a ni bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »