Sesah lui-a tui luanna tur siamthat hna thawh a ni

Serchhip Dinthar Veng Sesah Lui-a tui luanna chu siamthat tum niin hei vang hian Serchhip paltlang tur lirthei thenkhat tlan dan tih danglam a ni.
Serchhip Dinthar Veng-a Sesah lui-a tui te hi kawngpui-ah luang tlangin mihring kalkaina tur Lei dawh a ni thin a, he Lei hi nikum-a ruahtui tla ah Sabereka Khuangkaih chuan tichhiain mihring kal kaina hi a chhia a, Thing hmanga siamchawp rih niin mipui ten harsatna nasa tak an tawk a. Serchhip Dinthar VC leh Serchhip Block ZPM hruaitute chuan Bialtu MLA leh Chief Minister Lalduhoma bakah Serchhip Bawrhsap hnenah he harsatna hi thlenin Chief Minister chuan Ser-chhip DC chu Department te nen a tul anga hma lo la turin a rawn ti ta nia thudawn a ni.

Thudawn danin tuna ruahmanna an siam thar ah chuan Sesah lui-a tui te hi kawngpui ah luang tlang tawh lovin kawngpui hi lai chatin Box Culvert dah a ni tawh dawn a, hemi atan hian PWD Serchhip Division chuan ruahmanna siamin a hmaa mihring kalna tur Lei dawh pawh a hran a siam tawh lovin Footpath pangngai siam a ni tawh anga, he hna thawhna atan hian cheng nuai 22 ruahman niin Serchhip District-a kawngpui siam hna thawktu Sri Giri lnfracon (SGI) Pvt. Ltd. te chuan he hna hi an thawk a, Fur ruahtui tlak hmaa kawng hi siam zawh hman tum niin tunah hian kawngpui zatve chu lai chatin Culvert siam hna hi thawh tan a ni a, hei hi zawhfel a nih hnuah a zatve dang lai lehin Culvert hi dah leh a ni ang. He kawng hi siam zawh a nih hunah chuan kawng hi meter 6.5 vela zau ni tura ruahman a ni.

Hetianga Sesah lui-a kawng laih a nih avang hian Serchhip SP chuan lirthei ke 12 nei leh a chunglam te chu Serchhip khawpui chhung paltlangin Kikawn atanga Sailiamkawn-ah tlan phal a nih loh thu nimin khan thuchhuah siamin a tarlang a. He thupek hi nimin (March 24, 2026) atanga hman tan tur niin hetiang lirthei te tan hian Serchhip by-pass road-ah kal tur a ni ang.