Social Media-a hmeichhe Candidate te beihna awm thin MNF in pawi an tih thu an sawi

MNF Legal Board hruaitute chuan Inthlan dawn apianga Hmeichhe Candidate-ten mawi lo tak taka Social Media-a beih an tawk thin chu pawi an tih thu sawiin, India rama literacy rate sanna State tih atan chuan a mawi lo ni mai lovin tih loh tawp tur a nih thu an sawi bawk. 

MNF Legal Board hruaitute chuan nimin khan Aizawl Press Club-ah thuthar thehdarhtute kawmin Inthlan dawn apianga hmeichhe Candidate-ten mawi lo tak taka Social Media-a beih an tawk thin chu pawi an tih thu leh hetiang thil hi hmeichhiate hmuhsitna-ah an ngaih thu an sawi a, Hmeichhe Candidate-te Social Media kaltlanga mawi lo tak taka beihna a lo chhuak thin chu hmeichhiate dinhmun rahbehnaah an ngai tih an sawi a ni. MNF Legal Board Treasurer Zothansangi Hmar chuan tunhnai-ah MNF ten AMC inthlanna lo awm tura Ward IV-na a an Candidate R. Lalnunthari (Nunui Rualheng) chuan mawi lo tak tak, hmeichhiat mipatna rawngkai leh hmeichhiate zahawmna tibawrhbang thei zawnga beihna a tawk nasa hle tih sawiin, hemi chungchang hi an ngai thutak hle tih a sawi bawk.

MNF Legal Board hruaitute chuan State Election Commission-in inkaihhruaina tha tak a siam chung pawhin mi thenkhatte chuan an duhthawh luatah tunhnai lawkah social Media lamah an khingpuite mimal nun leh an nihna dik lo takin, mipuite rilru hruaikawi tur zawngin, thlalak leh thu post an siam nasa hle niin an sawi a. Model Code of Conduct 2026 Bung II (c)-na ah khingpuite leh party hruaitute mimal nun, mipui rawngbawlna lam nena inkaihhnawih ni si lo, insawichhiatna hi a khap tlat tih an sawi a. Inthlan a nih avanga Candidate hmeichhiate zahawmna leh mawina tibawrhbang zawnga thu leh thlalak thehdarh te hi India ram Criminal Law hnuaia pawikhawihna a nih thu leh Court thubuai neih theihna leh thiamloh chan phei chuan lung In tan emaw, pawisa chawi emaw theihna a ni tih a sawi a ni. Zothansangi chuan ramin changkan lam a pan mek emaw tih laia inthlan apianga a hnufual zawng leh hnungtawlh zawnga inbeihna awm thin chu India rama literacy rate sanna State tih atan hian a mawi lo takzet ni mai lovin tih loh tawp tur a nih thu a sawi bawk.