Mizo thalaite chu pianpui thiamna nei tha leh thawkrim an nih thu Larsap in a sawi

Mizoram Larsap General (Dr) Vijay Kumar Singh chuan Mizo thalaite chu pianpui thiamna nei tha leh thawkrim an nih thu a sawi.

Nimin khan ICFAI University Mizoram Campus, Durtlang-ah ‘One Day Skills Development Conclave’ neih niin khuallian nia he hun a hmanpuina ah Larsap General (Dr) Vijay Kumar Singh chuan Mizo thalaite chu pianpui thiamna nei tha leh thawkrim an nih thu sawiin, “India leh khawvel pum inelnaa langpha turin thiamna dik tak, inphochhuahna hun tha leh inrintawkna neih chu tun dinhmuna an mamawh a ni,” a ti a. Thalaite chu India leh khawvel huap ang pawha inphochhuahna hun remchang an lo hmu anih pawhin, mahni hnam ziarang leh chawrchhuahna hlamchhiah lova nghet taka vuan zel turin a chah a; hetiang tih nachang an hriat phawt chuan hlawhtlinna lian zawkin a umzui ang tih a sawi a. Ram leilung mawi, hnam ziarang hausa leh ralmuang anih avangte in Mizoramin tunlaia Sector thang duang ber Service Sector hnuaiah hlawkna a tel thu a sawi a. Kutthemthiamna tipung turin chin dan thar leh mahni kutkawih eizawnna kalkawp tir thiam a tul tih sawiin, Skills Conclave chu sawihonaah tawp mai lo se, hmalam panna, kawng dik inkawhhmuhna, infuihtharna leh danglamna thlentuah tang se a duh thu a sawi bawk a. Thalaite chu State leh rampum tana rohlu leh innghahna an nih thu a sawi bawk.

ICFAI University Mizoram leh Labour, Employment, Skills Development & Entrepreneurship Department buatsaih he Conclave-ah hian ICFAI University Mizoram Vice Chancellor, Prof (Dr.) Ginlianlal Buhril chuan inlawmna thu sawiin, Prof. YR Haragopal Reddy, Chancellor, ICFAI University Mizoram leh John Tanpuia, Director, LESDE Department-te pawhin thu an sawi a. Hemi hnu hian Resource Person atana thlan mithim pathum ten Topic thlan bik pahnih ‘From Mizoram to the world’ leh ‘Mizo Youths reaching out to Pan India’ tih thupui hmangte in zirtirna an pek bakah sawihona hun hman a ni bawk.