Minister in Maite khuaa Community Nursery tlawh

Rural Development Department Minister leh Tawi Bialtu MLA, Prof. Lalnilawma chuan Ningani khan a Bial chhung Maite khuaa Community Nursery siam chu a hmunah a tlawh.

Minister Prof. Lalnilawma chuan Nursery an siam chu ram tana rotling leh nakin thlenga ram leilung fate tana chhenfakawm thil a nih thu sawiin, hma latu RD Department te thawhrimna leh inpekna chu lawmawm a tih thu a sawi a, “Kumtin ram vah chereuva, a dah belh lam a tlem si chuan kum reilote ah mihring ten kan tuar mai dawn a ni,” tiin mipuite chu theih ang tawka RD Department hmalakna te chu thlawp turin a chah bawk.

He Project hi RD Department hnuaiah kum thum (3) chhung atan plan siam niin a tum ber chu rambua te phun khah lehna ni a, MGNREGA hnuaiah mipuiten ramngaw siam a nih leh theih nana hmalakna pawimawh leh lian tak a ni bawk. Project cost hi cheng nuai 80 niin kumin (2026) hi a kum 2-na a ni a, Nursery-ah hian thing variety chi hrang hrang 28 kuittiah a enkawl mek niin thing tiak hi 50,000 (singnga) vel neih mek a ni.

Nursery-a thing kuitiahte hi thing zai chi (commercial tree) te, damdawi (medicinal) atana hman chi thing te leh avenue/ornamental tree te an ni a, thlai tiak ho hi engemaw zat chu kumin chhunga sem chhuah hman tum niin ni pawimawh bik leh Green Mizoram Day ah-te, convergence hna atan te bakah School ten a thlawna phun tura sem chhuah tur a ni.