ADB leh Finance hotu kawm

Minister of State Lalnghinglova Hmar chuan nimin khan New Delhi-ah Asian Development Bank (ADB) hotute kawmin Sports leh Tourism hmasawnna tura ADB atanga tanpuina awm thei te an sawi a; Finance Ministry lam nen an inkawm bawk.

Tourism Minister Lalnghinglova Hmar hi India rama ADB hotu lu, Country Director Mio Oka-i hovin an lo dawngsawng a. Tourism Minister hian Mizoram-a tourism lama hmasawnna thleng mek thantir zel tur leh tourist thahnem zawk dawngsawng thei turin State budget ringawt a tawk loh avangin Externally Aided Project kaltlanga ADB atanga loan mamawh a nih thu a sawi a. “Kan khawpui ber Aizawl hi khualzin tana zan thum châmna daiha siam hi kan thupui pakhat a ni a, chutihlaiin thingtlang lamah eco-tourism kalpui a, khawtlang nen tangkawpa community based tourism kalpui hi kan thupui a ni bawk, Wildlife tourism kalpui turin Environment & Forest Department nen pawh thawhhona kan ziak tawh a ni,” a ti.

Sports Minister ni bawk Lalnghinglova chuan, “Sports hi intihhlimna satliah ni lovin tunah chuan eizawnna a ni a, India sawrkar pawhin a dah pawimawh tawh hle. Infrastructure piah lama infiammite tihhmasawn tura Man Power Development lama kal nat kan duh a, ADB puihna kan mamawh hle a ni,” tiin Sports Tourism chu State tana sum lakluhna tha a nih theih thu a sawi bawk.

ADB hotu Mio-i chuan Mizoram sawrkar inhawnna lawmawm a tih thu sawiin, tunhma deuha dilna an thehluh an lo hnawl tawh chu Urban Development project an neih mekte nen kaikawpa a hranpaa kalpui dan an ngaihtuah tur thu a sawi a, Finance Ministry lamah bawhzui a tum thu a sawi bawk. Lalnghinglova Hmar hian Department of Economic Affairs, Finance Ministry lama Joint Secretary (ADB changtu) Baldeo Purushartha IAS pawh kawmin ADB lama EAP kaltlanga loan dilna awm mek a sawipui bawk a ni.